ވެރިކަން ބަދަލުވާ މަރުހަލާގައި ލިޔެކިޔުން ނައްތާލުން ހުއްޓުވުމަށް އޭސީސީން ފުލުހަށް!
ދައުލަތުގެ ލިޔެކިޔުން ނައްތައިލުން ހުއްޓުވައިދިނުމަށް އެންޓި ކޮރަޕްޝަން ކޮމިޝަނުން ދިވެހި ފުލުހުންގެ ކިނބައިން އެދިއްޖެއެވެ.
އޭސީސީން މިއަދު ނެރުނު ބަޔާނެއްގައި ބުނެފައިވަނީ ދައުލަތުގެ ބައެއް އިދާރާތަކާއި ސަރުކާރާއި ސަރުކާރު ކުންފުނިތަކުގެ ލިޔެކިޔުން ނައްތައިލަމުންދާކަމުގެ ޝަކުވާ އެ ކޮމިޝަނަށް ހުށަހެޅި، އެކަމުގެ ކަންބޮޑުވުން ފާޅުކުރަމުންދާތީއާއި ކޮމިޝަނުގެ ސަމާލުކަމަށް އެކަން އައިސްފައިވާ ކަމަށެވެ.
އަދި ދައުލަތުގެ ލިޔުންތަކަށް ބަދަލުގެނައުމާއި ލިޔެކިޔުން ނައްތައިލުމާއި ފޮރުވަން އުޅުން ފަދަ ކަންކަމަކީ ކޮމިޝަނުގެ ތަހުގީގުތަކަށް އެކަމުގެ ސަބަބުން ހުރަސްއެޅޭނެ އަމަލުތަކެއް ކަމަށްވާތީ އެފަދަ އަމަލުތައް ހުއްޓައިލަން އެ ކޮމިޝަނުން ވަނީ އަންގާފައެވެ.
އަދި ލިޔެކިޔުން ނައްތައިލަން ނުވަތަ ފޮރުވަން ނުވަތަ އެއަށް ބަދަލުގެނައުމަށް އެއްވެސް ފަރާތަކުން އަންގައިފިނަމަ، އެފަދަ ކަންކަން ކުރުމުން ދުރުހެލިވެ ނަޒާހަތްތެރިކަން އިސްކުރުމަށް އެ ކޮމިޝަނުންވަނީ އިލްތިމާސްކޮށްފައެވެ. އަދި އެފަދަ ކަމެއް ހިނގާނަމަ ކަމުގެ ތަފުސީލު މައުލޫމާތު ކޮމިޝަނާ ހިއްސާކުރުމަށްވެސް އޭސީސީން އެދިފައިވެއެވެ.
މިއާއެކު އޭސީސީގެ ބަޔާނުގައި ބުނީ، ދައުލަތުގެ ލިޔުންތަކަށް ބަދަލުގެނައުމާއި ނައްތައިލުމާއި ފޮރުވުން ފަދަ ކަންކަމަކީ ރާއްޖޭގެ ޤާނޫނުތަކުން ކުށްކަމަށް ކަނޑައަޅާފައިވާ އަމަލުތަކެއްކަަމަށާ، އެކަންކަން އެ ކޮމިޝަނުން ދިވެހި ފުލުހުންގެ ޚިދުމަތުގެ ސަމާލުކަމަށް މިހާރު ގެނެސްފައިވާ ކަމަށެވެ.
އަދި ސަރުކާރާއި ސަރުކާރު ހިއްސާވާ ކުންފުނިތަކުގައި ހުރި ދައުލަތުގެ ލިޔެކިޔުންތައް ބަދަލުކުރުމާއި ނައްތައިލުމުގެ އަމަލުތައް، ޕީސީބީން ހުއްޓުވައިދިނުމަށް އެ ބޯޑުގައި ކޮމިޝަނުން އެދިފައިވާނެ ކަމުގައިވެސް އޭސީސީން ބުނެފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
