ބޭން އިލްރާއިލްގެ ނަމުގައި ޕެޓިޝަނެއްގައި ސޮއިކުރަން ފަށަނީ

އިޒްރާއިލްގެ ޕާސްޕޯޓުގައި ދިވެހިރާއްޖެއަށް އެތެރެވުން ހުއްޓުވުމަށް ގޮވާލާ "ބޭން އިންރާއިލް" ގެ ނަމުގައި ޕެޓިޝަނެއްގައި ސޮއިކުރަން ތައްޔާރުވެއްޖެ އެވެ.

މި ޕެޓިޝަން ލޯންޗުކޮށްފައިވަނީ ދިވެހިރާއްޖޭގެ ސާފާސް އެސޯސިއޭޝަންގެ އިސް ނެގުމުގެ މަތިން، އެމްބީބީއޭ އަދި އިންޓަނޭޝަނަލް އެއިޑް ކެމްޕޭން (އައިއޭސީ) ގުޅިގެންނެވެ.

އެ ޕެޓިޝަނާއި ގުޅޭ މައުލޫމާތު ދިނުމަށް ބޭއްވި ޕްރެސް ކޮންފަރެންސްގައި ސާފާސް އެސޯސިއޭޝަންގެ ފަރާތުން ބުނީ ބޭން އިޒްރާއިލްގެ ނަމުގައި ހިންގާ ޕެޓިޝަނުން މައިގަނޑު ގޮތެއްގައި ތިން ކަމަކަށް ސަރުކާރަށް ގޮވާލާ ކަމަށެވެ.

އޭގެ ތެރޭގައި ހިމެނެނީ:

1. އެއްވެސް ބޭނުމަކަށް އިޒްރާއިލްގެ ޕާސްޕޯޓުގައި ރާއްޖެ އެތެރެވުން މަނާކުރުން

2. މާޒީގައި އިޒްރާއިލްގެ މީހުންގެ ފަރާތުން ރާއްޖޭގެ ރާޅާއެރުމުގައި ހުޅޭ ފަރާތްތަކަށް ލިބިފައިވާ އަނިޔާތައް ބަލައި ފިޔަވަޅު އެޅުން

3. ސާފިން ކޮމިއުނިޓީއަށް އިޒްރާއިލް ފަތުރުވެރިންގެ ފަރާތުން ލިބޭ އަނިޔާތައް ކުށްވެރިކޮށް އެކަންކަން ހުއްޓުވުމަށް މަސައްކަތްކުރުން

ޕެޓިޝަން އިންތިޒާމުކުރާ ފަރާތުން ބުނެފައިވަނީ ބޭން އިޒްރާއިލްގެ ނަމުގައި ހިންގާ ޕެޓިޝަނުގައި ސޮއިކުރުމަށް ހުޅުވާލީ 28 އޮކްޓޫބަރުން ފެށިގެން ކަމަށެވެ.

އިޒްރާއިލުން ހުއްޓުމެއްނެތި ފަލަސްތީނުގެ މައުސޫމު ރައްޔިތުންނަށް ދެމުންދާ ހަމަލާތައް ހަރުކަށި އިބާރާތުން ކުށްވެރިކުރާ ކަމަށާއި، އެކަމާއި ދެކޮޅަށް ދިވެހިން އެކި ލެވަލްގައި ކުރާ މަސައްކަތް ފާހަގަކުރާ ކަމަށް އެ އެސޯސިއޭޝަނުން ވަނީ ބުނެފައެވެ.

އަދި އިޒްރާއިލްގެ އަނިޔާތަކާއި ދެކޮޅަށް ކުރެވޭ މަސައްކަތްތަކުގައި ދިވެހި ރައްޔިތުންގެ ފަރާތުން ދޭ އެއްބާރުލުންވެސް ފާހަގަކުރާ ކަމަށާއި، އެ ޕެޓިޝަނަށް ވެސް ދިވެހިރައްޔިތުންގެ ފުރިހަމަ އެއްބާރުލުން ލިބިގެންދާނެކަމަށް އުންމީދުކުރާކަމަށް ޕެޓިޝަން އިންތިޒާމުކުރާ ފަރާތްތަކުން ވަނީ ބުނެފައެވެ.