ހުވާ ކުރެއްވިޔަ ނުދޭނެ ކަމަށާ، ކެބިނެޓަށް ރުހުން ނުދޭނެ ކަމަށް ބުނުމަކީ ނާތަހުޒީބުކަމެއް: އަމްރު
އިންތިހާބީ ރައީސް ޑރ. މުޙައްމަދު މުޢިއްޒު ހުވާ ކުރުން ހުއްޓުވާނެ ކަމަށާ، އެމަނިކުފާނުގެ ކެބިނެޓަށް ރުހުން ނުދޭނެ ކަމަށް ބުނުމަކީ ވަރަށް ނާތަހުޒީބު ކަމެއް ކަމަށް އެސްޓީއޯގެ ކުރީގެ މެނޭޖިންގ ޑިރެކްޓަރ, ހުސެއިން އަމްރު ވިދާޅުވެއްޖެއެވެ.
މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް މައްސަލަ ނުބާއްވާ ނަމަ އެހެން އެއްވެސް މަސައްކަތެއް ކުރުމަށް އެއްބާރުލުން ނުދޭނެ ކަމަށާ، އެގޮތުން އިންތިހާބީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހުވާ ކުރެއްވުމަށް ބާއްވާ ޖަލްސާއަށް ވެސް އެއްބާރުލުން ދެވެން ނޯންނާނެ ކަމުގައި އިއްޔެ މަޖިލީހުގެ މެޖޯރިޓީ ޕާޓީ، އެމްޑީޕީން ވަނީ ބުނެފަ އެވެ.
"އެ ޖަލްސާ (ހުވާ ކުރާ ޖަލްސާ) އެހެން (ނަޝީދު ރިޔާސަތުގައި ބައިންދަވައިގެން) ކުރިއަށް ގެންދަވައިފި ކަމުގައިވާނަމަ އެ ރައީސުލްޖުމްހޫރިއްޔާ ފޮނުވާ ކެބިނެޓާއި އެހެން ކަންކަމަށް އަޅުގަނޑުމެންނަށް ކަނޑައެޅިގެން ނޯ ޖަހާނީ އިނގޭތޯ. މިއީ ވަކި ޕްރޮސެސް އެއް އޮންނަ ކަމެއް،" އެމްޑީޕީ މެންބަރު ނާޝިޒު ވިދާޅުވެފައި ވެއެވެ.
މިކަމާއި ގުޅިގެން އެކްސްގައި ކުރެއްވި ޕޯސްޓެއްގަިއ އަމްރު ވިދާޅުވީ މަޖިލިހުގަ ދިމާވެގެން އުޅޭ ދެބަަސްވުމެއްގައި ރައްޔިތުން ހޮވާފަ ހުރި މީހާ ރައީސްކަމުގެ ހުވާކުރުން ހުއްޓުވާނެ ކަމަށް މެންބަރުން އެންމެ ގިނަ ޕާޓީއިން ބުނުމާ ކެބިނެޓަށް ރުހުން ނުދޭނެ ކަމަށް ބުނުމަކީ ވަރަށް ނާތަހުޒީބު ކަމެއް ކަމަށެވެ.
އަދި ރައްޔިތުންގެ މަޖިލީހަކީ ދެބަސްވުމާ، މަޝްވަރާއާ ހައްލު ހޯދާތަން ކަމަށާއި އެކަމުގެ ތެރެއަށް ހުވާކުރަން ތައްޔާރުވެފަ ހުރި ރައީސްއާ ރައްޔިތުން ނުވެއްދުމަށްވެސް އަމަރު ވަނީ އެދިވަޑައިގެންފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
