ޑޮލަރުގެ ރޭޓު %15 އަށް ކުޑަކޮށްދޭނަން: ރައީސް ޞާލިހު

ރާއްޖެއަށް އެތެރެވާ ޑޮލަރުގެ %30 މި ގައުމުގައި ހިފަހައްޓައި ޑޮލަރުގެ ރޭޓު 15ރ. އަށް ވުރެ ތިރިކޮށްދެއްވާނެ ކަމުގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ވައުދުވެވަޑައިގެންފިއެވެ.

ރިޔާސީ އިންތިހާބުގެ ދެވަނަބުރުގެ ކެމްޕެއިންގައި ރައީސް އައްޑޫ ސިޓީއަށް ކުރައްވަމުން ގެންދަވާ ކެމްޕެއިން ދަތުރުފުޅުގެ ތެރެއިން އެމްޑީޕީން ބޭއްވި ޖަަގަހަ ޖަލްސާގައި ވާހަކަ ދައްކަވަމުން ރައީސް ވިދާޅުވީ، ރާއްޖޭގެ ވިޔަފާރިވެރިންނާއި އާންމުނަށް ކުރިމަތިވެފައި އޮތް ޑޮލަރުގެ ދަތިކަމަށް ހައްލެއް ހޯދައިދިނުމަށް އެދެމުންދާ ކަމަށާއި އެ ހައްލު ގެނެސްދެއްވާނެ ގޮތް މެނިފެސްޓޯގައި ވަރަށް ތަފްސީލްކޮށް ހާމަކޮށްފައިވާނެ ކަމަށެވެ.

އެގޮތުން ރާއްޖޭގެ އިގްތިސޯދުގެ ސައިޒު ކުރިއަށް އޮތް ފަސް އަހަރު ނިމޭއިރު 170 ބިލިއަން ރުފިޔާއަށް އަރައިގެންދާނެ ކަމުގައު ވިދާޅުވެ ރައީސް ޞާލިހް ވަނީ އޭގެ ތެރެއިން ބޮޑު ބަޔަކީ ޑޮލަރުން ރާއްޖެއަށް ވަންނަ އާމްދަނީ ކަމުގައި ވިދާޅުވެފައެވެ. އެގޮތުން އޭރުން ހަ ބިލިއަނަށްވުރެ ގިނަ ޑޮލަރު އާމްދަނީގެ ގޮތުގައި ރާއްޖެއަށް އެތެރެވަމުންދާނެ ކަމުގައި ރައީސް ވަނީ ވިދާޅުވެފައެވެ. ވުމާއެކު ޑޮލަރަށް ދަތިވާންވީ އެއްވެސް ސަބަބެއް އޭރުން އޮންނަން ނުޖެހޭ ކަމަށްވެސް ރައީސް ވިދާޅުވިއެވެ.

ބޭނުންވާ މީހަކަށް، ބޭނުންވާ ވަރަކަށް ރަނގަޅު އަގުގައި ޑޮލަރު ލިބޭނެ އުސޫލުތަކެއް ގާއިމް ކުރެވެން ޖެހޭ. މި ދައުރުގައި އެ މަސައްކަތް ފެށިގެން. އެއް ކަމަކަށް މަސައްކަތް ކުރީ ރާއްޖޭގެ އެތެރޭގެ ވިޔަފާރީގެ ހުރިހާ މުއާމަލާތެއް ދިވެހި ރުފިޔާއިން ކުރާ ގޮތަށް ހަމަޖެއްސުން. އޭރުން ޑޮލަރު ލިބޭ މީހުން ވެސް ޖެހޭނީ ޑޮލަރު މާރުކުރަން. އެ މީހުން ގަންނަ ހުރިހާ އެއްޗަކާ ދޭ މުސާރަވެސް ދޭންޖެހޭނީ ރުފިޔާއިން. އެހެންވީމަ އެމްއެމްއޭއިން ކަނޑައަޅާ އުސޫލަކުން ޑޮލަރު މާރުކުރަން ޖެހޭނީ. އެހެން ކަމަށް ވަންޏާ ރާއްޖޭގައި ރައްޔިތުން ބޭނުންވާވަރަށް ބޭންކުތަކުން ޑޮލަރު ލިބޭނެ

ރައީސް އިބްރާހިމް މުހައްމަދު ޞާލިހް

މީގެ އިތުރުން ޑޮލަރުގެ މައްސަލައަށް ހައްލު ގެނައުމަށް އޮތް ދެވަނަ ގޮތަކީ ރާއްޖެއަށް އެތެރެވާ ޑޮލަރުގެ ވަކި އިންސައްތައެއް ރާއްޖޭގައި ހިފެހެއްޓުން ކަމަށް ވިދާޅުވެ ރައީސް ވަނީ އެތެރެވާ ޑޮލަރުގެ 30 އިންސައްތަ ނަމަވެސް ރާއްޖޭގައި ވަކި މުއްދަތަކަށް ބަހެއްޓުން ކަމަށާއި އެކަމަށް އެއްބަސްވުމަކަށް ވެސް އާދެވުނު ކަމުގައި ވިދާޅުވެފައެވެ.

ރާއްޖެއަށް ވަންނަ ޑޮލަރު 30 އިންސައްތަ ހިފެހެށްޓުނު ކަމަށްވީ ނަމަވެސް ޑޮލަރުގެ ރޭޓް 15 ރުފިޔާއަށްވުރެ ތިރިއަށް ގެންދެވޭނެ ކަމަކީ ޔަގީންކަމެއް ކަމަށް ރައީސް ވިދާޅުވިއެވެ.ކުރިއަށް އޮތް ދައުރުގައި އިންތިހާބުވުމަށްފަހުގައި އެ ދެ ގޮތުން ކުރެ އެއްގޮތެއް ވެރިކަމުގެ ފުރަތަމަ އަހަރުގެ ތެރޭގައި ތަންފީޒުކުރައްވާނެ ކަމަށް ރައީސް ވަނީ ވިދާޅުވެފައެވެ. އޭރުން ޑޮލަރަށް ލިބިފައިވާ ދަތިކަމަށް ދާއިމީ ހައްލެއް ލިބިގެންދާނެ ކަމަށް އެމަނިކުފާނު ވިދާޅުވިއެވެ.