އިންސާނިއްޔަތު ހިމާޔަތްކުރުމަށް އދ ނުކުޅެދިއްޖެ: ހާލާ ހަމީދު
އިންސާނިއްޔަތު ހިމާޔަތް ކުރުމަށް އދ ފެއިލްވެއްޖެކަމަށް އދ ގެ ސަލާމަތީ މަޖިލީހުގައި ދިވެހިރާއްޖެ ތަމްސީލުކުރެއްވި ހާލާ ހަމީދް ވިދާޅުވެއްޖެ އެވެ.
ބުރާސްފަތި ދުވަހު ބޭއްވި އދ ގެ ސަލާމަތީ މަޖިލީހުގެ ބައްދަލުވުުގައި އިޒްރާއިލުން ހުއްޓުމެއްނެތި ފަލަސްތީނަށް ދެމުންދާ ހަމަލާތައް ހުއްޓުވުމަށް ގޮވާލާ ހުށައެޅި ގަރާރަށް ދިވެހިރާއްޖޭގެ ފަރާތުން ވާހަކަދައްކަވަމުން ހާލާ ވިދާޅުވީ އދ. އަކީ އިންސާނިއްޔަތު ހިމާޔަތްކުރުމުގެ މަތިވެރި މަގްސަދުގައި އުފައްދާފައިވާ ޖަމުއިއްޔާއެއް ކަމަށެވެ.
އެހެން ނަމަވެސް، އެ މަޤްސަދު ހާސިލްކުރުމަށް އެ ޖަމުއިއްޔާ ނުކުޅެދެމުންދާ މަންޒަރު ފެންނަމުންދާ ކަމަށާއި، އެއީ މާޔޫސްކަން ގެނުވާ ކަމެއްކަމަށް އޭނާ ވިދާޅުވި އެވެ.
ހާލާ ވިދާޅުވީ އިސްރާއީލުން ފަލަސްތީނަށް ހަމަލާތައް ދެމުންދާއިރު އާންމު ރައްޔިތުންނާއި ހޮސްޕިޓަލްތަކުގެ މުވައްޒަފުންނަށް އަމާޒުކޮށްގެން ނުރައްކާތެރި ހަމަލާތަކެއް ދެމުންދާ ކަމަށެވެ.
ހުއްޓުމެއް ނެތި ދެމުންދާ އެ ހަމަލާތަކުގެ ސަބަބުން ފަލަސްތީނުގެ ރައްޔިތުންނަށް ސަލާމަތާއި ރައްކާތެރިކަން ކަށަވަރުކުރެވޭނެ އެއްވެސް ގޮތެއް ނެތްކަމަށާއި، އިޒްރާއިލްގެ އެ ޓެރަރިޒަމްގެ އަމަލުތައް ވަގުތުން ހުއްޓުވެން ޖެހޭ ހާލަތަށް މަޝްރަހު ގޯސްވެފައިވާކަން ހާލާ ފާހަގަކުރެއްވި އެވެ. އެއާއި ގުޅުވާ އޭނާ ވިދާޅުވީ އެ ހަމަލާތައް ހުއްޓުވުމަށް އދ އަށް އެކަށީގެންވާ ފިޔަވަޅުތަކެއް އެޅިފައި ނުވާތީ ވެސް ހިތާމަކުރައްވާ ކަމަށެވެ.
ފަލިސްތީނު މައްސަލައިގައި، އިންސާނިއްޔަތު ހިމާޔަތްކުރުމަށް އދ ފެއިލްވެފައިވާ މިންވަރު ފެނިގެންދާކަން ހާމަކުރައްވާ ހާލާ އިތުރަށް ވިދާޅުވީ އިޒްރާއިލުން ފަލިސްތީނަށް އަޒާމުކޮށް ދެމުންދާ ހަމަލާތަކުގައި ރަހީނުކޮށްފައިވާ އާންމުން ވަގުތުން ދޫކޮށްލަން އދ އަށް ނޭންގުނުކަމީ ވެސް އިންސާނިއްޔަތު ހިމާޔަތްކުރުމުގެ މަސައްކަތުގައި އދ ފެއިލްވެފައިވާ މިންވަރު ފެނިގެންދާ މިސާލެއް ކަމަށެވެ.
އޭގެ އިތުރުން ފަލަސްތީނުގެ މައުސޫމު ރައްޔިތުންނަށް ބޭނުންވާ ޒަރޫރީ ވަސީލަތްތައް ފޯރުކޮށްދިނުމުގެ މަސައްކަތުގައި ވެސް އދ ގެ އެހީތެރިކަން ލިބިފައި ނުވާކަން ހާލާގެ ވާހަކައިގައި ފާހަގަކުރެއްވި އެވެ.
ފަލަސްތީނު މައްސަލައިގައި އދ އަށް އެކަށީގެންވާ ފިޔަވަޅުތަކެއް އެޅިފައި ނުވާތީ ގިނަ ފާޑުކިޔުންތަކެއް އަމާޒުވެފައިވާއިރު، ޔަހޫދީ ފައުޖުތަކުން ޣައްޒާގައި ހިންގަމުންދާ ގަތުލުއާންމު ހުއްޓުވުމަށް ގޮވައިލާ އ.ދގެ ސަލާމަތީ މަޖިލީހަށް ހުށަހެޅި އިތުރު ދެ ޤަރާރުވެސް ވަނީ ފެއިލްކޮށްލާފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
