ޢާއިލީ ވެރިކަމަށް އެންމެ ފާޑުކީ ޓީމުން، އާއިލީ ވެރިކަން ދިފާއުކުރަން އުޅުމަކީ ހުތުރު ނަމޫނާއެއް: ސައުދު

ޢާއިލީ ވެރިކަމަށް އެންމެ ފާޑުކީ ބޭފުޅުން، ޑިމޮކްރަސީ ފަހަތަށް ޖައްސަވައި، އާއިލީ ވެރިކަން ދިފާއުކުރުމަށް މަޖިލިސް ހުއްޓުވުމަކީ ހުތުރު ނަމޫނާއެއް ކަމަށް ވިދާޅުވެ ވިލިނގިލި ދާއިރާގެ މެންބަރު ސައުދު ހުސައިން މަޖިލީހުގެ ނާއިބު ރައީސާ އީވާ އަބްދުالله އާއި އެބޭފުޅާގެ ދެބެންގެ ދެދަރި ބޭބޭފުޅު އަދި މަޖިލީހުގެ ރައީސް މުހައްމަދު ނަޝީދަށް ފާޑުވިދާޅުވެއްޖެއެވެ.

ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ރިޔާސަތުން ވަކިކުރުމަށް 49 މެމްބަރުންގެ ސޮޔާއެކު މަޖިލީހަށް ހުށަހަޅައި އެމަނިކުފާނަށް 14 ދުވަހުގެ ނޯޓިސް ފޮނުވައި، ނޯޓިސްގެ މުއްދަތު ހަމަވުމާއިއެކު މިއަދު ވަނީއެ މައްސަލަ އެޖެންޑާ ކޮށްފައެވެ. 
ނަމަވެސް މިއަދަށް އެ ޖަލްސާ އެޖެންޑާ ކުރި މައްސަލަ މަޖިލީހުގެ ނައިބު ރައީސާ އީވާ އާލާސްކަންފުޅާއި އުޅުއްވާތީ ކުރިއަށް ގެންދެވޭގޮތް ވަނީ ނުވެފައެވެ.

އެކަން ހާމަ ކުރައްވަމުން މަޖިލީހުގެ އަމީން އާއްމު ނިޔުޝާ ވިދާޅުވީ, މަޖިލީހުގެ ރައީސް މަޤާމުން ވަކިކުރުމަށް ބާއްވާ ބަހުސެއްގެ ރިޔާސަތު މަޖިލީހުގެ ރައީސް ބަލަހައްޓައިގެން ނުވާނެކަމަށާއި، އެފަދަ ޖަލްސާއެއްގެ ރިޔާސަތު ބެލެހެއްޓުމުގެ މަސްއޫލިއްޔަތަކީ މަޖިލީހުގެ ނައިބު ރައީސާއި މަޖިލީހުގެ ގަވައިދުން ހަވާލުކޮށްފައިވާ މަސްއޫލިއްޔަތެއްކަމަށެވެ.
ނަމަވެސް މަޖިލީހުގެ ނައިބު ރައީސް އާލާސްކަންފުޅާއި އުޅުއްވާކަން ބަޔާންކޮށް މިއަދު ބޭއްވުމަށް ހަމަޖެހިފައިވާ ޖަލްސާއަށް ސަލާން ފޮނުވާފައިވާތީ މިއަދު އެ ގަރާރަށް ބަހުސްކުރުން ކުރިއަށް ގެންދެވެން ނެތްކަމަށް މަޖިލީހުގެ އިދާރާއިން ވަނީ ހާމަކޮށްފަ އެވެ.

އެކަމާއި ގުޅިގެން ނުރުހުން ފާޅުކުރައްވައި ސައުދު ކުރެއްވި ޓްވީޓެއްގައި ވިދާޅުވީ، ނާއިބު ރައީސާ އަށް ރިޔާސަތަށް ނޭރޭ ހިނދެއްގައި ކަން ކުރަންވީގޮތްވެސް މަޖިލީހުގެ ގަވާއިދުގަޔާއި ގާނޫނު އަސާސީގައިވާ ކަމަށެވެ. އަދި މަޖިލިސް ހުއްޓުމަކަށް ގެނެވޭނެ އެއްވެސް ހާލަތެއް ނެތްކަން އެއިން ސާފުކޮށް އެނގޭ ކަމަށްވެސް ސައުދު ވިދާޅުވި އެވެ.

"މީގެ ކުރިން ޢާއިލީ ވެރިކަމަށް އެންމެ ފާޑުކިޔާ އުޅުނު ޓީމުން، ޑިމޮކްރަސީ ފަހަތަށް ޖައްސަވައި، އާއިލީ ވެރިކަން ދިފާއުކުރުމަށް މަޖިލިސް ހުއްޓުވުމަކީ ހުތުރު ނަމޫނާއެއް" ސައުދު ވިދާޅުވި އެވެ.

މިއަދުގެ މަޖިލިސް ކުރިއަށް ނުގެންދިޔުމުން އެމްޑީޕީ މެންބަރުން ވަނީ މަޖިލީހުގައި އިހްތިޖާޖު ކޮށް އަޑު އުފުލާފައެވެ. އަދި ނަޝީދުގެ މައްސަލަ ކުރިއަށް ގެންދަން ސްޕްރީމްކޯޓުގެ ލަފާ ހޯއްދަވާނެ ކަމަށް އެ ޕާޓީން ވަނީ ބުނެފަ އެވެ.