ޣައްޒާގެ ގިނަ ބަޔަކު ކަރުހިއްކުން ފިލުވަމުން ދަނީ ލޮނުފެނުން

ފަލަސްޠީނުގެ ޣައްޒާގެ އެތަައް ހާސް ބަޔަކު ކަރުހިއްކުން ފިލުވުމަށް ބޭނުން ކުރަމުންދަނީ ލޮނުފެން ކަމަށް އަލްޖަޒީރާއިން ބުނެފިއެވެ.

އަލްޖަޒީރާގައި ބުނެފައިވަނީ ޙާލުގައި ޖެހިފައިތިބި ޣަައްޒާގެ ރައްޔިތުންގެ ތެރެއިން ގިނަ ބަޔަކު ކަރުހިއްކުމަށް ބޭނުން ކުރަމުންދަނީ ލޮނުފެނާއި ސާފުނުކުރާ ނުރައްކާތެރި ފެނުން ކަމަށެވެ.

އިޒްރާއިލްގެ ހާޒްރަތް ނިއުސްއަށް ހަވާލާދީ އަލްޖަޒީރާގައި ބުނެގައިވަނީ ޣައްޒާގައި ތިބި 52000 މާބަނޑު އަންހެނުންނާއި، 6 މަހުން ދަށުގެ 30000 ކުޑަކުދިނަށް ސާފު ނުކުރާ ފެނާއި ލޮނުފެން ބޭނުން ކުރަން ވަނީ މަޖުބޫރުވެފައި ކަމަށެވެ.

އިޒްރާއިލުން ވަނީ ޣައްޒާއަށް ދޫކުރާއި ފެނާއި ކަރަންޓު އަދި ތެޔޮ ދޫކުރުން ހުއްޓައިލައިފައެވެ. ކަރަންޓް ނުލިބުމުގެ ސަބަބުން ފެން ސާފުކުރާ ޕަމްޕުތަކުގެ މަސައްކަތް ވަނީ ހުއްޓިފައެވެ.

ސާފުފެން ނުލިބުމުގެ ސަބަބުން ބަލިމަޑުކަމެއް ފެތުރިދާނެ ކަމުގެ ބިރުވެރިކަން ޣައްޒާގައި ވަނީ މިހާރު ފެތުރިފައެވެ.

ޣައްޒާއަށް އިޒްރާއިލުން ދެމުންދާ ހަަމަލާތަކުގެ ސަބަބުން ޝަހީދުވި މީހުންގެ ޢަދަދު 8000 މައްޗަށް އަރައިފައިވާއިރު އޭގެ ތެރެއިން 3000 ޝަހީދުންނަކީ ކުޑަކުދިންނެވެ. 2000 ޝަހީދުންނަކީ އަންހެނުންނެވެ. މީގެ އިތުރުން 20،000 މީހުން ދަނީ އެކިވަރުގެ ޒަޚަމްތަކަށް ފަރުވާ ހޯދަމުންނެވެ.