ޓްރަމްޕް ސައުދީ ވަލީއަހުދަށް މަލާމާތް ކުރައްވައި ވާހަކަދައްކަވައިފި
ލިޔުންތެރިޔާ
އަޙްމަދު އާހިލް ސަޢީދު
އެމެރިކާގެ ރައީސް ޑޮނަލްޑް ޓްރަމްޕް، ސައުދީ އަރަބިއްޔާގެ ވަލީއަހުދު މުހައްމަދު ބިން ސަލްމާނާ މެދު ދެގައުމުގެ ދެމެދުގައި އޮތް ގުޅުމާ ބެހޭގޮތުން ވަރަށް ފާޅުކަން ބޮޑު ގޮތެއްގައި ވާހަކަފުޅު ދައްކަވައިފިއެވެ.
ޓްރަމްޕް ވަނީ ވަލީއަހުދު އޭނާއާ މެދު ބަހައްޓަވާ ގާތްކަމާއި، އެމެރިކާގެ ނުފޫޒަށް ސައުދީން ބޯލަނބަން ޖެހިފައިވާ މިންވަރާ ބެހޭގޮތުން ހަރުކަށި ބަސްމަގަކުން ވާހަކަ ދައްކަވާފައެވެ. ޓްރަމްޕް ވިދާޅުވި ގޮތުގައި، ވަލީއަހުދު މުހައްމަދު ބިން ސަލްމާން އޭނާގެ ފަހަތުން އުޅުއްވަން ޖެހިވަޑައިގަންނަވާނެ ކަމަށް ކުރިން އުއްމީދު ކުރައްވާފައި ނުވާކަމަށެވެ. ނަމަވެސް މިހާރުގެ ހާލަތު އޮތްގޮތުން ވަލީއަހުދާމެދު ވަރަށް އޯގާތެރިކޮށް އަދި ރަނގަޅަށް ކަންތައް ކުރަން މަޖުބޫރުވެފައިވާ ކަމަށް ޓްރަމްޕް ފާހަގަކުރެއްވިއެވެ.
ޓްރަމްޕް އިތުރަށް ވިދާޅުވީ، ހުދު ވަލީއަހުދުވެސް އޭނާއާ މެދު "ރަނގަޅަށް ކަންތައް ކުރަން ޖެހޭނެ" ކަމަށެވެ. އަދި އެކަން އެގޮތަށް ކުރަން ޖެހެނީ އެހެން އެއްވެސް އިހުތިޔާރެއް ނެތުމުން ކަމަށް ދޭހަވާ މޭރުމަކުން ޓްރަމްޕް ވަނީ ވާހަކަދައްކަވާފައެވެ. މިއީ ސައުދީގެ އެންމެ އިސްވެރިޔަކާ މެދު އެމެރިކާގެ ރައީސަކު މިފަދަ އާންމު މަޝްރަހެއްގައި ބޭނުންކުރެއްވި ވަރަށް ބޮޑާ ބަސްމަގުތަކެއްކަމަށް ބައެއް ފަރާތްތަކުން ވަނީ ފާަހގަކޮށްފައެވެ.
މި ވާހަކަފުޅުތަކަކީ ދެގައުމުގެ ދެމެދުގައި އޮތް ސިޔާސީ އަދި އިގްތިސާދީ މަސްލަހަތުތަކުގެ މައްޗަށް ބިނާކޮށް، އެމެރިކާގެ ބާރުވެރިކަން ދެއްކުމަށް ޓްރަމްޕް ކުރެއްވި ކަމެއްގެ ގޮތުގައި ބެލެވޭކަމަށް ބައެއް ފަރާތްތަކުން ވަނީ ފާހަގަކޮށްފައެވެ. ވަލީއަހުދަށް އަމާޒުކޮށް މިފަދަ މަލާމާތުގެ ރާގަކަށް ވާހަކަ ދެއްކެވުމުން، ބައިނަލްއަގުވާމީ މީޑިއާތަކުގެ ސަމާލުކަން މިކަމަށް ވަނީ ވަރަށް ބޮޑަށް ހުއްޓިފައެވެ.
ރައީސް ޓްރަމްޕްގެ މި ބަޔާނާ ގުޅިގެން ސައުދީ އަރަބިއްޔާގެ ސަރުކާރުން ރަސްމީކޮށް އަދި އެއްވެސް އެއްޗެއް ބުނެފައެއް ނުވެއެވެ. ނަމަވެސް މިފަދަ ވާހަކަތަކުގެ ސަބަބުން ދެގައުމުގެ މެދުގައި އޮންނަ ޑިޕްލޮމެޓިކް ގުޅުމަށް އަސަރުކޮށްފާނެ ކަމަށް ބައެއް މާހިރުން ލަފާކުރެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
