މެދުއިރުމަތީގެ ހާލަތާ ގުޅިގެން ބައިނަލްއަޤުވާމީ ފައިސާގެ ބާޒާރުގައި ޑޮލަރުގެ އަގު ބޮޑުތަނުން މަތިވެއްޖެ

މެދުއިރުމަތީގައި ހަމަނުޖެހުން ބޮޑުވެ ތެލުގެ އަގު އުފުލުމާ އެކު އެމެރިކާ ޑޮލަރުގެ އަގު ދެ ހަފުތާ ތެރޭ ވަރަށް މައްޗަށް ޖެހިލައިފިއެވެ.

ޔެން އާއި ޔޫރޯ ހިމެނޭ ގޮތަށް ހަ ފައިސާގެ ބާވަތަކާ އަޅައި ބަލާ ޑޮލަރު އިންޑެކްސް 0.11 އިންސައްތަ އިތުރުވެ 99.79 ގައި ހުރީ ފައިތުވި ދެ ހަފްތާގައިވެސް ނުދާހާ މަތީގައެވެ. ޔޫރޯ 0.13 އިންސައްތަ ދަށަށް ގޮސް 1.1577 ޑޮލަރުގައި ހުރިއިރު ޑޮލަރުގެ އަގު މަތިވެފައިވަނީ ޓްރެޒަރީ ބޮންޑުގެ ފައިދާ ބޮޑުވެ ފެޑެރަލް ރިޒާވުން އިންޓަރެސްޓް ރޭޓު އުފުލާނެ ކަމަށް ލަފާކުރެވޭތީއެވެ.

އެމެރިކާއިން އަންގާރަ ދުވަހު އީރާނަށް ވައިގެ ވަރުގަދަ ހަމަލާތަކެއް ދީ ރައްދުގައި އީރާނުން ހަމަލާ ބަދަލުކޮށްފައިވާ އިރު މިއީ ފާއިތުވެ ދިޔަ ހަފުތާތަކުގެ ތެރޭ ހާލަތު އެންމެ ބޮޑަށް ގޯސްވި ފަހަރެވެ.

ބުދަ ދުވަހު ބްރެންޓް ފިއުޗާޒް 1.15 އިންސައްތަ އުފުލި ފީފާއެއް 95.74 ޑޮލަރުގައި ހުރި އިރު ވެސްޓް ޓެކްސަސް އިންޓަމީޑިއެޓް (ޑަބްލިއުޓީއައި) ކްރޫޑް 0.85 އިންސައްތަ މައްޗަށް ގޮސް ފީފާއެއް 91.05 ޑޮލަރަށް އެރިއެވެ.

ޖެނެޖާނީ ޔެންގެ އަގު 0.08 އިންސައްތަ ދަށްވެފައިވާއިރު ބެންކް އޮފް ޖެޕެން (ބީއޯޖޭ)ގެ ގަވަރުނަރު ކާޒުއޯ އުއެޑާ އާ ބައްދަލުކުރައްވައި ޔެންގެ ބަލިކަށިކަމާ ދެކޮޅަށް "ހަރުދަނާ" ފިޔަވަޅު އެޅުމަށް އެމެރިކާގެ ޓްރެޒަރީ ސެކްރެޓަރީ ސްކޮޓް ބެސެންޓް ވިދާޅުވި ކަމަށް ޓްރެޒަރީ ޑިޕާޓްމެންޓުން ބުންޏެވެ. ބީއޯޖޭގެ ބޯޑު މެންބަރު ހަޖިމެ ޓަކާޓާ ބުނީ އިންފްލޭޝަންގެ ހާލަތާ އެއްވަރަށް ހަލުއި ގޮތެއްގައި ރޭޓު ބޮޑުކުރަން ޖެހޭ ކަމަށެވެ.

ސީއެމްއީ ގްރޫޕުގެ ފެޑްވޮޗް ޓޫލުން ދައްކާ ގޮތުގައި ސެޕްޓެމްބަރުގައި ފެޑުން ރޭޓު ބޮޑުކުރާނެ ކަމުގެ ފުރުސަތު މިހާރު 68 އިންސައްތައަށް އެރީ ހަފުތާއެއް ކުރިން ގާތްގަނޑަކަށް 40 އިންސައްތައިގައި ހުރެފައެވެ. ފެޑް ގަވަރުނަރު މައިކަލް ބާ އަންގާރަ ދުވަހު ބުނީ އިންފްލޭޝަން އަވަހަށް ތިރި ނުވެއްޖެ ނަމަ ރޭޓު ބޮޑުކުރަންވީ ވަގުތު ޖެހުނީ ކަމަށެވެ.

އެމެރިކާގެ 10 އަހަރުގެ ބެންޗްމާކް ނޯޓުގެ ޔީލްޑް 4.81 އިންސައްތައަށް އެރީ 2023 ވަނަ އަހަރުގެ ނޮވެމްބަރުގެ ފަހުން އެންމެ މަތީ ހިސާބަށެވެ. ޖެޕެނީޒް 10 އަހަރުގެ ޔީލްޑް ވެސް 3.01 އިންސައްތައަށް ވާސިލުވިއެވެ.