އެމެރިކާ އާއި އީރާނުގެ ސުލްހައިގެ އެއްބަސްވުމުގައި ލުބުނާނު ހިމެނުމަށް ފަރަންސޭސިވިލާތުން ގޮވާލައިފި
އެމެރިކާ އާއި އީރާނުގެ ސުލްހައިގެ އެއްބަސްވުމުގައި ލުބުނާނު ހިމެނުމަށް ފަރަންސޭސިވިލާތުން ގޮވާލައިފިއެވެ.
ފަރަންސޭސިވިލާތުން މިހެން ބުނެފައިވަނީ އެމެރިކާ އާއި އީރާނާ ދެމެދު އެކުލަވާލާފައިވާ ވަގުތީ ސުލްހައިގެ އެއްބަސްވުމަށް ފަރަންސޭސިވިލާތުގެ ރައީސް އިމަނުއެލް މެކްރޮން މިއަދު މަރުހަބާ ވިދާޅުވަމުންނެވެ.
މެކްރޮން ވިދާޅުވި ގޮތުގައި މި އެއްބަސްވުމަކީ މެދުއިރުމަތީގެ މަސްރަހު ފިނިކުރުމަށް އެޅުނު ވަރަށް ރަނގަޅު ފިޔަވަޅެކެވެ. ނަމަވެސް، މި އެއްބަސްވުމުގެ ދާއިރާ މިހާރަށްވުރެ ފުޅާކުރަން ޖެހޭ ކަމަށް އޭނާ ފާހަގަކުރެއްވިއެވެ.
މެކްރޮން ބަޔާންކުރެއްވި ގޮތުގައި ލުބުނާނުގެ މިހާރުގެ ހާލަތަކީ ވަރަށް ނާޒުކު ހާލަތެކެވެ. އެހެންކަމުން، އެމެރިކާ އާއި އީރާނާ ދެމެދު ވެވުނު ސުލްހައިގެ އެއްބަސްވުމުގެ ތެރޭގައި ލުބުނާނު ވެސް ހިމަނަން ޖެހޭ ކަމަށް ބުނެ އޭނާ ވަނީ ބާރުއަޅުއްވާފައެވެ. ލުބުނާނުގެ މަސްރަހު ހަމައަކަށް ނޭޅި، މުޅި ސަރަހައްދަށް ދާއިމީ ސުލްހައެއް ނާންނާނެ ކަމަށް ފަރަންސޭސިވިލާތުން ދެކެއެވެ.
މިހާރު އެކުލަވާލާފައިވާ އެއްބަސްވުމުގެ ދަށުން އެމެރިކާ އާއި އީރާނާ ދެމެދު އޮތް ނުތަނަވަސްކަން ކުޑަކުރުމަށް ވަނީ މަގުފަހިވެފައެވެ. މި އެއްބަސްވުމުގައި އިސްރާއީލުގެ މަސްލަހަތުތައް ވެސް ހިމެނޭއިރު، މައިގަނޑު އަމާޒަކީ ސަރަހައްދީ ހަމަލާބަދަލުކުރުންތައް މަދުކުރުމެވެ. އެހެންނަމަވެސް، އިސްރާއީލާއި ލުބުނާނުގެ ހިޒްބުالله ޖަމާއަތާ ދެމެދު ހިނގަމުންދާ ކުރިމަތިލުންތަށް މި އެއްބަސްވުމުގައި ނުހިމެނޭކަމަށް އިސްރާއީލްގެ ބޮޑުވަޒީރު ނަތަންޔާހޫ ދަނީ ބުނަމުންނެވެ.
ފަރަންސޭސިވިލާތަކީ ތާރީޚީ ގޮތުން ލުބުނާނާ ގާތް ގުޅުމެއް ބާއްވާ ގައުމަކަށް ވުމާއެކު، އެ ގައުމުގެ ސަލާމަތީ ކަންކަމާ މެދު މެކްރޮން ވަނީ ކަންބޮޑުވުން ފާޅުކުރައްވާފައެވެ.
އެމެރިކާގެ ރައީސް ޑޮނަލްޑް ޓްރަމްޕް ރޭ އީރާނަށް ވަރުގަދަ ހަމަލާތަކެއް ދޭނެ ކަމުގެ އިންޒާރު ދިންތާ މާ ގިނައިރެއް ނުވަނީސް އީރާނާއި އެމެރިކާއިން 2 ހަފްތާ ވަންދެން ހަމަލާބަދަލުކުރުން ހުއްޓާލަން އެއްބަސްވެފައިވާކަން އެ ގައުމުތަކުން ވަނީ އިއުލާން ކޮށްފައެވެ. އަދި މި އެއްބަސްވުމުގައި އީރާނުން ކޮށްފައިވާ ޑިމާންޑްތަކާއި ބެހޭ އިތުރު މަޝްވަރާތައް މި 2 ހަފްތާ ތެރޭގައި ކުރިއަށް ދާނެކަމަށް އެމެރިކާއިން ބުނެއެވެ.
ނަމަވެސް، ލުބުނާނުގެ މައްސަލަ މި އެއްބަސްވުމުގެ ތެރެއަށް ވަންނާނެތޯ ނުވަތަ ނޫންތޯ އަދި އޮތީ ސުވާލެއްގެ ތެރޭގައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
