ސައުދީގެ ތެޔޮ ޓޭންކަރުތަކަށް އަމާޒުކޮށް ފޮނުވާލި ޑްރޯން ހަމަލާތަކެއް ހުއްޓުވައިފި

ސައުދީ އަރަބިއްޔާގެ އިރުމަތީ ޕްރޮވިންސާއި ވެރިރަށް ރިޔާޟްގައި ހުރި ތެޔޮ ޓޭންކަރުތަކަކަށް އަމާޒުކޮށް ދިން ނުރައްކާތެރި ޑްރޯން ހަމަލާތަކެއް އެގައުމުގެ ވައިގެ ދިފާއީ ބާރުތަކުން ހުއްޓުވައި، ނައްތާލައިފައިވާ ކަމަށް ސައުދީ ސަރުކާރުން ހާމަކޮށްފިއެވެ.

ސައުދީ ޑިފެންސް މިނިސްޓްރީގެ ތަރުޖަމާނު މޭޖަރ ޖެނެރަލް ތުރުކީ އަލް މާލިކީ ހޯމަ ދުވަހު ވިދާޅުވީ، ވޭތުވެދިޔަ ގަޑިއިރުތަކުގެ ތެރޭގައި ދޭން އުޅުނު މި ހަމަލާތަކަކީ އިރާގުގެ ތެރޭގައި ހަރަކާތްތެރިވާ، އީރާނުގެ މަދަދުލިބޭ ހަނގުރާމަވެރި ޖަމާއަތްތަކުން ދީފައިވާ "ޓެރަރިސްޓް" ހަމަލާތަކެއް ކަމަށެވެ.

އަލް މާލިކީ އިތުރަށް ވިދާޅުވީ، ގައުމުގެ ސަލާމަތާއި، ރައްޔިތުންނާއި، އަދި ގައުމުގެ މުހިންމު ވަސީލަތްތައް ދިފާއުކުރުމުގެ ގާނޫނީ ހައްގު ސައުދީ އަރަބިއްޔާއަށް ލިބިގެންވާ ކަމަށެވެ. އަދި މި ހަމަލާތަކަށް އެންމެ އެކަށީގެންވާ ވަގުތާއި ތަނުގައި ރައްދު ދިނުމުގެ އިޚްތިޔާރު ސައުދީއަށް އޮތްކަން އޭނާ ފާހަގަކުރެއްވިއެވެ.

މި ހާދިސާއާ ގުޅިގެން ސައުދީ ފޮރިން މިނިސްޓްރީން ނެރުނު ބަޔާނެއްގައި، އިރާގުގައި ތިބި އީރާނަށް ތާއީދުކުރާ ޖަމާއަތްތަކުން ދިން މި ހަމަލާތައް ވަނީ ވަރަށް ހަރުކަށި އިބާރާތުން ކުށްވެރިކޮށްފައެވެ. އެ މިނިސްޓްރީން ބުނީ ގައުމުގެ އިސްތިގުލާލާއި ސަލާމަތް ރައްކާތެރިކުރުމަށާއި، މިފަދަ ހަމަލާތައް ދޭ ފަރާތްތަކަށް ހައްގު އަދަބު ދިނުމަށް ސައުދީ އަރަބިއްޔާ އޮތީ ސާބިތުކަމާއެކު ކަމަށެވެ.

މީގެ އިތުރުން، އިރާގުގެ ބިން ބޭނުންކޮށްގެން ސައުދީއަށް ހަމަލާދިނުން ހުއްޓުވުމަށްޓަކައި އަޅަންޖެހޭ ހުރިހާ ފިޔަވަޅުތަކެއް އެޅުމަށް ސައުދީ ސަރުކާރުން ވަނީ އިރާގު ސަރުކާރަށް ގޮވާލާފައެވެ.