އެމެރިކާއިން އިސްރާއީލަށް 3.5 ބިލިއަން ޑޮލަރުގެ އިތުރު އަސްކަރީ އެހީ ދެނީ

އެމެރިކާއިން ހައްދު ފަހަނައަޅާފައިވާ ޔަހޫދީ ސަރުކާރަށް 3.5 ބިލިއަން ޑޮލަރުގެ އިތުރު އަސްކަރީ އެހީ ދޭން ނިންމައިފިއެވެ.

ޣައްޒާގައި ހިނގަމުންދާ ލާއިންސާނީ ހަނގުރާމައި ގައި އިސްރާއީލަށް އިތުރު 3.5 ބިލިއަން ޑޮލަރުގެ އަސްކަރީ އެހީ ފޯރުކޮށްދޭން ނިންމައިފައިވާ ކަމަށާއި މި ފައިސާ ބޭނުންކުރެވޭނީ އެމެރިކާގައި އުފައްދާ އަސްކަރީ ހަތިޔާރާއި  އާލާތްތައް ގަތުމަށް ކަމަށް ޔުނައިޓެޑް ސްޓޭޓްސްގެ ސްޓޭޓް ޑިޕާޓްމަންޓުން ބުނެފައެވެ.

ސްޓޭޓް ޑިޕާޓްމަންޓުގެ ތަރުޖަމާނެއް ހުކުރު ދުވަހު ބުނެފައިވާގޮތުން، އިސްރާއީލަށް ބިލިއަން ޑޮލަރުގެ އަގުހުރި އަސްކަރީ އެހީ ދޭން ގަސްދުކުރާ ކަމުގެ މަޢުލޫމާތު ބުރާސްފަތި ދުވަހު ކޮންގްރެސްއަށް އަންގާފައިވާ ކަމަށާއި މި ފައިސާ ނެގޭނީ އޭޕްރީލް މަހު ކޮންގްރެސްއިން ފާސްކުރި 14.5 ބިލިއަން ޑޮލަރުގެ އިތުރު ފަންޑިންގ ބިލުންނެވެ. އަދި މިއީ އެމެރިކާއިން އިސްރާއީލަށް އަހަރަކު ދޭ 3 ބިލިއަން ޑޮލަރުގެ އިތުރުވުމެކެވެ

މި އިތުރު އެހީގެ ބައެއް ލިބޭނީ، އިސްރާއީލުގެ އަސްކަރީ ޔުނިޓަކަށެވެ. އެމެރިކާއިން ޔުނިޓުގެ ނަން ހާމަކޮށްފައި ނުވިޔަސް، އެއީ އިސްރާއީލުގެ "ނެޓްޒާ ޔެހުދާ" ބެޓަލިއަން ކަމަށް ބެލެވޭއިރު، މިއީ އާންމުކޮށް ވެސްޓް ބޭންކުގައި މަސައްކަތްކުރާ ބެޓަލިއަނެކެވެ. މި ޔުނިޓަކީ ވެސްޓް ބޭންކުގައި ފަލަސްތީނުގެ އިންސާނީ ހައްގުތަކަށް އަރައިގަންނަމުންދާ ޔުނިޓެކެވެ.

ސްޓޭޓް ޑިޕާޓްމަންޓުން ބުނެފައިވަނީ، މި ޔުނިޓަށް ދެވޭ އެހީ ހުއްޓުވުމަށް ނިންމާފައި ނުވާ ކަމަށާއި އެއީ މި ޔުނިޓުން ކޮށްފައިވާ ކަންތައްތައް ރަނގަޅުކުރުމަށް އިސްރާއީލުން ކުރަމުންދާ މަސައްކަތްތަކާމެދު ހިތްހަމަޖެހޭތީކަމަށެވެ.

ވެސްޓް ބޭންކުގައި އޮކްޓޯބަރު 7 ކުން ފެށިގެން މިއަދާހަމައައް 500 އަށް ވުރެ ގިނަ މުސްލިމުން ޝަހީދު ކޮށްލާފައިވާއިރު މިގެ ތެރޭގައި 100 އަށް ވުރެގިނަ ކުޑަކުދިން ހިމެނެއެވެ.