ހަނިއްޔާ ޝަހީދުކޮށްލުމުގެ ބަދަލު ހިފުމަށް އީރާނުން އިސްރާއީލަށް ހަމަލާ ނުދީފާނެކަމުގެ އިޝާރާތެއް

ފަލަސްޡީނު މިނިވަންކުރުމަށް ޖިހާދުކުރަމުންދާ ހަމާސް ޖަމާޢަތުގެ ސިޔާސީ ގޮފީގެ ލީޑަރު ޝަހީދު އިސްމާއިލް ހަނިއްޔާ ޝަހީދުކޮށްލުމުގެ ބަދަލު ހިފުމަށް އީރާނުން އިސްރާއީލަށް ދޭނެކަމަށް ބުނި ހަމަލާ ދިނުން ލަސްކޮށް އެފަދަ ހަމަލާއެއް ނުދީފާނެކަމުގެ އިޝާރާތެއް އެގައުމުން ދީފިއެވެ.

އީރާނުގެ މި ހަމަލާދޭނެކަމަށް ބުނީ، ޖުލައި 31 ގައި ހަނިއްޔާ އަވަހާރަކޮށްލުމާއި، އޭގެ ކުރިން ބެއިރޫތުގައި ލެބަނަންގެ ހިޒްބުﷲގެ އިސް ކޮމާންޑަރެއް ކަމަށްވާ ފުއާދު ޝުކުރު ޝަހީދުކޮށްލުމާ ގުޅިގެން މަޝްރަޙް ހަލަބޮލިވެފައިވާ ދަނޑިވަޅެއްގައެވެ.

ޣައްޒާގައި ހިނގަމުންދާ ހަނގުރާމަ ހުއްޓުވުމަށް ކުރެވޭ މަސައްކަތްތަކަށް ހުރަސް ނޭޅުމަށްޓަކައި، ހަމާސްގެ ސިޔާސީ ބިއުރޯގެ ވެރިޔާ އިސްމާއީލް ހަނިއްޔާ އަވަހާރަކޮށްލި ހަމަލާއަށް އިސްރާއީލަށް ދޭން ގަސްދުކުރާ ޖަވާބު ފަސްކުރަން ޖެހިދާނެ ކަމަށް އީރާނުން ބުނެފައިވެއެވެ.

ޣައްޒާގައި ހަނގުރާމަ ދާއިމީ ގޮތެއް ހުއްޓާލުމަށް އެގައުމުން އިސްކަންދޭ ކަމަށާއި ހަމާސްއިން ގަބޫލުކުރާ ކޮންމެ އެއްބަސްވުމެއް އީރާނުން ވެސް ގަބޫލުކުރާނެ ކަމަށް އދ. ގައި ހުންނަ އީރާނުގެ ދާއިމީ މިޝަނުން ނެރުނު ބަޔާނުގައި ހާމަކޮށްފައިވެއެވެ.

އަދި މީގެއިތުރުން ތެހެރާނުގައި ހަނިއްޔާ އަވަހާރަކޮށްލުމަކީ އީރާނުގެ ގައުމީ ސަލާމަތާއި މިނިވަންކަމަށް އަރައިގަތުމެއް ކަމަށް ބުނެ ިކަން ކުށްވެރި ކޮށްފައިވެއެވެ. އަދި އީރާނަށް އަމިއްލަ ދިފާއުގެ ހައްގު އޮތް ކަމަށް ބުނެފައިވީ ނަމަވެސް، އީރާންގެ ޖަވާބަކުން ހަނގުރާމަ ހުއްޓުމެއް ގެނައުމަށް ކުރެވޭ މަސައްކަތްތަކަށް ހުރަސް ނޭޅޭނެ ކަމަށް ބުނެފައިވެއެވެ.