އީރާނުގައި އެންމެ ދުވަހަކު، 29 މީހުންނަށް މަރުގެ އަދަބު ދީފި

އީރާނުގެ ޖަލުތަކުގައި އެއް ދުވަހުގެ ތެރޭގައި 29 މީހުންނަށް މަރުގެ އަދަބު ތަންފީޒުކޮށްފައިވާކަމަށް މީޑިއާ ރިޕޯޓުތަކުން ބުނެފިއެވެ.

މީގެ ތެރެއިން 26 މީހުންނަށް މަރުގެ އަދަބުދީފައިވަނީ އިރާނުގެ ވެރިރަށް ތެހެރާނުގެ ބޭރުގައި އޮންނަ ގެޒެލް ހެސާ ޖަލުގައި ގްރޫޕެއްގޮތަށް ބައިތިއްބައިގެންކަމަށާއި އިތުރު ތިން މީހަކު މަރާލާފައިވަނީ ކަރާޖުގެ ސިޓީ ޖަލުގައި ކަމަށް ނޯވޭގައި ހުންނަ އިރާން ހިއުމަން ރައިޓްސްއިން ބުނެފައިވެއެވެ.

އީރާނުން އެ މީހުން ދަންޖައްސައިފައި ވަނީ 2022 ވަނަ އަހަރުގެ މުޒާހަރާތަކާ ގުޅުންހުރި މީހަކަށް މަރުގެ އަދަބު ދިން މައްސަލައިގައި ބައިނަލްއަގުވާމީ ފާޑުކިޔުން އެ ގައުމަށް އަމާޒުވެފައިވާ ދަނޑިވަޅެއްގައެވެ.

2022 ވަނަ އަހަރުގެ އިހުތިޖާޖުތަކާ ގުޅިގެން އިސްލާމިކް ރިވޮލިއުޝަނަރީ ގާޑް ކޯޕްސްގެ މެންބަރެއް މެރުމުގެ ކުށުގައި މަރުގެ އަދަބުދިން 30 އަހަރުގެ ޣުލަމްރެޒާ ރަސާއީއަކީ މި މައްސަލައާ ގުޅިގެން މަރުގެއަދަބުދިން 10 ވަނަ މީހާއަށް ވާއިރު އިންސާނީ ހައްގުތަކާ ބެހޭ ޖަމާއަތްތަކުން ވަނީ މިކަން ކުށްވެރިކޮށްފައެވެ.

އަދި މީގެ ތެރޭގައި އަފްޣާނިސްތާނުގެ ދެ ރައްޔިތުންވެސް ހިމެނެއެވެ. މި ދެ މީހުންގެ މައްޗަށް މީހަކު މެރުމާއި، މަސްތުވާތަކެތި އަދި ރޭޕްގެ ދަޢުވާ ސާބިތުވެފައިބާކަމަށް ވެސް އެވުޒާރާއިން ވަނީހާމަކޮށްފައެވެ.

މި އަހަރުގެ މިހާތަނަށް އީރާނުގައި 345 މީހުންނަށް މަރުގެ އަދަބުދީފައިވާ ކަމަށް އީރާން ހިއުމަން ރައިޓްސްގެ މަޢުލޫމާތުން ދައްކައެވެ.

އީރާނުގެ ސަރުކާރުން ބުނާގޮތުގައި މަރުގެ އަދަބަކީ ކުށްކުރުން ހުއްޓުވުމަށާއި، މުޖުތަމަޢުގެ ރައްކާތެރިކަން ކަށަވަރުކުރުމަށް މުހިންމު އަދަބެކެވެ.

ޗައިނާ ފިޔަވައި އެންމެ ގިނައިން މަރުގެ ޙުކުމް ތަންފީޛުކުރާ ޤައުމަކީ އީރާނެވެ.

އިންސާނީ ޙައްޤުތަކަށް މަސައްކަތްކުރާ ޖަމްޢިއްޔާތަކުން ދެކޭގޮތުގައި އީރާނުން މަރުގެ ޙުކުމް ތަންފީޛުކުރަނީ މުޖުތަމަޢުގައި ބިރުވެރިކަން އުފެއްދުމަށެވެ.