ސަޢޫދީ އަށާއި ހޮރްމުޒް ކަނޑުއޮޅިއަށް ދިން ހަމަލާތަކާ ގުޅިގެން ތެލުގެ އަގު 2 އިންސައްތަ އުފުލިއްޖެ

ސަޢޫދީ ޢަރަބިއްޔާއަށް ހޫތީން ދިން އައު ހަމަލާތަކަކާއި، ޚަލީޖުގެ ކަނޑުގެ ސަރަޙައްދުގައި އުޅަނދުފަހަރަށް ދިން ހަމަލާތަކާ ގުޅިގެން ދުނިޔޭގެ ބާޒާރުގައި ތެލުގެ އަގު 2 އިންސައްތައަށް ވުރެ މައްޗަށް އުފުލިއްޖެއެވެ.

މި ބަދަލު އައިސްފައިވަނީ ސަޢޫދީގެ މުހިންމު ތެޔޮ ހޮޅިއެއް ބަންދުކުރުމާ ގުޅިގެން ތެޔޮ ފޯރުކޮށްދިނުމަށް ހުރަސްއެޅިދާނެ ކަމުގެ ބިރު ބޮޑުވެފައިވާ ދަނޑިވަޅެއްގައެވެ.

މިއަދު މާކެޓް ހުޅުވުނުއިރު އަގުތައް 3 އިންސައްތައަށް އުފުލުނު ނަމަވެސް، ފަހުން ބްރެންޓް ކްރޫޑް ފިއުޗާސްގެ އަގު ވަނީ ފީފާއަކަށް 2.90 ޑޮލަރު (2.77 އިންސައްތަ) އިތުރުވެ، 107.51 ޑޮލަރަށް އަރާފައެވެ. އަދި ޑަބްލިއުޓީއައި ފިއުޗާސްގެ އަގު 2.27 ޑޮލަރު (2.27 އިންސައްތަ) މައްޗަށް ގޮސް، ފީފާއަކަށް 102.32 ޑޮލަރަށް ވަނީ އަރާފައެވެ. ފާއިތުވި ހަފުތާގެ ތެރޭގައި ތެލުގެ އަގު 8 އިންސައްތަ މައްޗަށް ގޮސްފައިވާއިރު، މިއީ މިދިޔަ ޖުލައި މަހަށްފަހު ތެލުގެ އަގު 100 ޑޮލަރަށް ވުރެ މައްޗަށް ދިޔަ ފުރަތަމަ ފަހަރެވެ.

ސަޢޫދީގެ ދެކުނު ޖާޒާން ޕްރޮވިންސަށް ހޫތީން ދިން ހަމަލާތަކެއްގައި ގޭގެ އަށާއި މިސްކިތަކަށް ގެއްލުން ލިބިފައިވާ ވީޑިއޯތަކެއް އެ ޤައުމުގެ ދައުލަތުގެ މީޑިއާއިން ވަނީ ޢާންމުކޮށްފައެވެ. އަދި އަވައްޓެރި ޕްރޮވިންސެއްގައި ހުންނަ ސަޢޫދީ އަސްކަރީ މަރުކަޒަކަށް ވެސް ހަމަލާދީފައިވާނެ ކަމަށް ހޫތީން ވަނީ ބުނެފައެވެ. މީގެއިތުރުން، އިރާޤުގެ ތެރެއިން ފޮނުވާލި ޑްރޯން ހަމަލާއަކާ ގުޅިގެން ސަޢޫދީގެ އީސްޓް-ވެސްޓް ތެޔޮ ހޮޅި މިދިޔަ ހުކުރު ދުވަހު ވަނީ ބަންދުކޮށްފައެވެ. މިއީ ހޮރްމުޒް ކަނޑުއޮޅި ބޭނުންނުކޮށް ސަޢޫދީން ތެޔޮ ބޭރުކުރާ މައިގަނޑު މަގަށްވުމާއެކު، މި ހޮޅި ބަންދުވުމަކީ ދުނިޔޭގެ ތެލުގެ ސަޕްލައިގެ 4 އިންސައްތައަށް ނުރައްކާވާނެ ކަމެކެވެ.

ހަމައެއާއެކު، ހޮރްމުޒް ކަނޑުއޮޅިން ދަތުރުކުރި އުޅަނދަކަށް ހަމަލާއެއް އަރައި އަލިފާން ރޯވުމުގެ ސަބަބުން، އޭގެ ފަޅުވެރިން ސަލާމަތްކުރަން ޖެހުނު ކަމަށް އިނގިރޭސިވިލާތުގެ މެރިޓައިމް ސެކިއުރިޓީ އެޖެންސީ އިން ވަނީ ހާމަކޮށްފައެވެ. އަދި އީރާނުގެ އައްސޭރިފަށުން އެ ޤައުމުގެ ވިޔަފާރި އުޅަނދަކަށް ދިން ހަމަލާއެއްގައި އެކަކު މަރުވެ، ހަތަރު ފަޅުވެރިން ޒަޚަމްވެފައިވާ ކަމަށް އީރާނުން ބުނެފައިވެއެވެ. އަނެއްކޮޅުން، ޔަމަނުގެ ހޫތީން ވަނީ ސްޓްރެޓީޖިކް ރަށެއް ކަމަށްވާ ޕެރިމް އައިލެންޑަށް އަރައި، ދުނިޔޭގެ ތެލުގެ 4-5 އިންސައްތަ ދަތުރުކުރާ ބާބުލް މަންދަބް ކަނޑުއޮޅީގެ ކޮންޓްރޯލް ވަރުގަދަކުރަން ފަށާފައެވެ.

އައިޖީ މާކެޓް އެނަލިސްޓް ޓޯނީ ސައިކާމޯ ވިދާޅުވި ގޮތުގައި، ޢުމާނުގައި ބާއްވާ މަޝްވަރާތަކުން ނަތީޖާއެއް ނުނުކުމެ ނުވަތަ ސަޢޫދީގެ ތެޔޮ ހޮޅި އަވަހަށް އަލުން އޮޕަރޭޝަނަށް ނުގެނެވިއްޖެނަމަ، ތެލުގެ އަގު ފީފާއަކަށް 119.48 ޑޮލަރާ ހަމައަށް އުފުލުމުގެ ފުރުޞަތު އެބައޮތެވެ.

ނަމަވެސް، ހޮރްމުޒް ކަނޑުއޮޅީގެ މައްސަލައިގައި ޚަލީޖުގެ ޤައުމުތަކާއި އީރާނާ ދެމެދު ޢުމާނުގައި ހޯމަ ދުވަހު ބޭއްވުމަށް ހަމަޖެހިފައި އޮތް ބައްދަލުވުން ފަސްކުރެވިފައިވާ ކަމަށް ޢުމާނުގެ ޚާރިޖީ ވަޒީރު ބަދްރު އަލްބުސައިދީ ވަނީ 'އެކްސް' މެދުވެރިކޮށް އިޢުލާނު ކުރައްވާފައެވެ.

އެމެރިކާއާއި އިސްރާއީލުން ފަށާފައިވާ ހަނގުރާމައަށް ހަ މަސް ފާއިތުވެފައިވާއިރު، މިދިޔަ ޖޫން މަހު ވީ ވަގުތީ އެއްބަސްވުން ރޫޅުނު ފަހުން މިހާތަނަށް ޞުލްޙައިގެ އެއްވެސް މަޝްވަރާއެއް ބޭއްވިފައެއް ނުވެއެވެ.