އިސްރާއިލުން އީރާނަށް ހަމަލާދިނީ ޣައްޒާ ޤަތުލުޢާއްމަށް ލިބިފައިވާ ސަމާލުކަން އަނބުރާލަން: އުރުދުޣާން

އިސްރާއިލުން އީރާނަށް ދިން ހަމަލާއަކީ ޣައްޒާގައި ހިންގަމުންދާ ޤަތުލުޢާއްމަށް ލިބިފައިވާ ސަމާލުކަން އެހެން ދިމާލަކަށް އަނބުރާލުމަށް ކުރި މަސައްކަތެއް ކަމަށް ތުރުކީގެ ރައީސް ރަޖަބް ތައްޔިބު އުރުދުޣާން ވިދާޅުވެއްޖެއެވެ.

ސައުދީ އަރަބިއްޔާގެ ވަލީއަހުދު މުޙައްމަދު ބިން ސަލްމާނާއެކު ކުރެއްވި ފޯނު ކޯލެއްގައި އުރުދުޣާން ވިދާޅުވެފައިވަނީ އިސްރާއިލުގެ ބޮޑުވަޒީރު ނެތަންޔާހޫ އަކީ އެ ސަރަޙައްދުގެ ހަމަޖެހުމަށް އޮތް އެންމެ ބޮޑު ނުރައްކާ ކަމުގައެވެ. އަދި އިސްރާއިލުގެ ޢަމަލުތައް ހުއްޓުވުމަކީ އެ ސަރަޙައްދުގެ ހަމަޖެހުމަށް ކޮންމެހެން ބެން ބޭނުންވާ ކަމެއް ކަމަށާއި، ނިއުކްލިއަރ ހަތިޔާރާ ގުޅޭގޮތުން އުފެދިފައިވާ ޚިޔާލުތަފާތުވުންތައް ޙައްލުކުރެވޭނީ މަޝްވަރާގެ މަގުން ކަމަށް އުރުދުޣާން ވިދާޅުވިއެވެ.

މީގެ އިތުރުން، އުރުދުޣާން ވަނީ އީރާނުގެ ރައީސް މަސްއޫދު ޕެޒެޝްކިއާންއާވެސް ފޯނުން ގުޅުއްވާ ވާހަކަ ދައްކަވާފައެވެ. މި ފޯނު ކޯލުގައި އުރުދުޣާން ވިދާޅުވެފައިވަނީ ނެތަންޔާހޫ މަސައްކަތް ކުރަމުންދަނީ މުޅި ސަރަޙައްދުގެ މަޝްރަހު ހޫނު ކުރުމަށް ކަމަށެވެ. އަދި އިސްރާއިލުން އީރާނަށް ދިން ހަމަލާގެ މަޤްޞަދަކީ ޣައްޒާގައި ހިންގަމުންދާ "ޤަތުލުޢާއްމު"ގެ ސަމާލުކަން އެހެން ދިމާލަކަށް އަނބުރާލުން ކަމަށްވެސް އުރުދުޣާން ވިދާޅުވިއެވެ.

ތުރުކީގެ ރައީސް އިތުރަށް ވިދާޅުވެފައިވަނީ އެ ސަރަޙައްދުގައި ހަނގުރާމައެއް ފެށިއްޖެނަމަ، އޭގެ ސަބަބުން ގިނަ އަދަދެއްގެ މީހުން އެހެން ޤައުމުތަކަށް ހިޖުރަ ކުރުމުގެ ފުރުޞަތު އޮތް ކަމަށެވެ.

އުރުދުޣާން މިހެން ވިދާޅުވެފައިވާއިރު، އިސްރާއިލުން މިދިޔަ ހުކުރު ދުވަހު އިރާނަށް ހަމަލާ ދީފައިމިވަނީ، ޣައްޒާއަށް ކާބޯތަކެތި ވެއްދޭނެ މަގުތައް ބަންދުކޮށް، ޣައްޒާގެ ރައްޔިތުން ހައިހޫނު ކަމުގައި ބައިތިއްބައިގެން، ހަމަލާދީ ޝަހީދު ކުރަމުންދާ ދަނޑިވަޅެއްގައިކަން ފާހަގަކޮށްލަންޖެހެއެވެ.

އެގޮތުން، ޣައްޒާއަށް އެހީ ހިފައިގެން ދިޔަ ބޯޓެއް ހިފަހައްޓައި އޭގައި ތިބި މީހުން ރަހީނުކުރުމަށްފަހު އިސްރާއިލުން ޑީޕޯޓް ކޮށްލާފައިވާއިރު، ޣައްޒާގެ އެހީދޭ ސަރަހައްދު ތަކަށް އެއްވާ މީހުންނަށް އަމާޒުކޮށްވެސް އިސްރާއިލުން އަންނަނީ ހުއްޓުމެއްނެތި ހަމަލާތައް ދެމުންނެވެ. އެ ހަމަލާތަކުގައި އެތައް ސަތޭކަ މީހުން ވަނީ ޝަހީދުވެފައެވެ.