އިޒްރޭލުން ޣައްޒާގައި ހިންގާ ގަތުލުއާންމު ޗައިނާއިން ކުށްވެރިކޮށްފި

އިޒްރޭލުން ޣައްޒާގައި ހިންގާ ގަތުލުއާންމު ޗައިނާއިން ކުށްވެރިކޮށްފިއެވެ.

ޗައިނާގެ ހާރިޖީ ވަޒީރު ވަންގް ޔީ ހައްދު ފަހަނަ އަޅާފައިވާ އިޒްރޭލުން ފަލަސްތީނުގެ ޣައްޒާގައި ހިންގަމުންދާ ގަތުލުއާންމު ކުށްވެރިކޮށް އެކަން ހުއްޓާލުމަށް ގޮވާލެއްވީ އދގެ ސަލާމަތީ މަޖިލީހުގެ ބައްދަލުވުމެއްގައި ވާހަކަފުޅު ދައްކަވަމުންނެވެ.

އިޒްރޭލުން ޣައްޒާގައި ހިންގަމުންދާ އަނިޔާވެރި ހަމަލާތަކަކީ އިންސާނިއްޔަތާ ހިލާފު އަމަލުތަކެއް ކަމަށާއި މިކަމުގެ ސަބަބުން ފަލަސްތީނުގެ އާންމު ރައްޔިތުންނަށް ލިބެމުންދާ ގެއްލުން ވަރަށް ބޮޑު ކަމަށް ވަންގް ޔީ ވިދާޅުވެފައިވެއެވެ.

އަދި މީގެ އިތުރުން ޣައްޒާގައި މިހާތަނަށް 40،000 އަށް ވުރެ ގިނަ ފަލަސްތީނު ރައްޔިތުން ޝަހީދުކޮށްލާފައިވާ ކަމަށާއި މީގެތެރޭގައި 16،000 އަށް ވުރެ ގިނަ ކުޑަކުދިން ހިމެނޭ ކަންވެސް އޭނާ  ވަނީ ފާހަގަކުރަށްވާފައެވެ.

އަދި ހައްދު ފަހަނަ އަޅާފައިވާ އިޒްރޭލުގެ ޔަހޫދީންގެ  އަނިޔާވެރި ހަމަލާތައް ވަގުތުން ހުއްޓާލުމަށާއި، ހަނގުރާމައިގެ ހާލަތު ނިމުމަކަށް ގެނެސް، ދެމެހެއްޓެނިވި ސުލްހައަކަށް މަގުފަހިކުރުމަށްވެސް އޭނާ ވަނީ ގޮވާލައްވާފައެވެ.

އަދި ބައިނަލްއަގްވާމީ މުޖުތަމައުން މިކަމާ މެދު އަވަސް ފިޔަވަޅުތަކެއް އެޅުމަށްވެސް ޗައިނާގެ ހާރިޖީ ވަޒީރު ވަންގް ޔީ ވަނީ ގޮވާލައްވާފައެވެ.