ތަފާތުބޮޑު ނަތީޖާއަކުން ފީއަލީ އަތުން މޮޅުވެ ދަރަނބޫދޫ އިން ފައިނަލުގެ އުންމީދު ދަމަހައްޓައިފި

ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް "ސޮނީ ސްޕޯޓްސް ގޯލްޑަން ފުޓްސަލް ޗެލެންޖު 2024" ގެ ފ. އަތޮޅު، އަތޮޅު ބުރުގައި މިއަދު ހަވީރު ދަރަނބޫދޫ އާއި ފީއަލި ވާދަކުރި މެޗު 9-1 ގެ ތަފާތުބޮޑު ނަތީޖާއަކުން މޮޅުވެ ދަރަނބޫދޫ އިން ފައިނަލުގެ އުންމީދު ދަމަހައްޓައިފި އެވެ.

މުބާރާތުގައި ދަރަނބޫދޫ އިން ކުޅުނު ފުރަތަމަ މެޗުގައި 3-0 ގެ ނަތީޖާއަކުން ބިލެއްދޫ އަތުން ބަލިވި ނަމަވެސް ދެވަނަ މެޗުގައި އެޓީމުން ވަނީ 1-8 ތަފާތުބޮޑު ނަތީޖާއަކުން މާގޫދޫ ބަލިކޮށްފައެވެ. އަދި ފީއަލީގެ ފުރަތަަމަ މެޗުގައި ބިލެއްދޫ އަތުން އެޓީމު ބަލިވީ 11-0 ގެ ތަފާތުބޮޑު ނަތީޖާއަކުންނެވެ.

މެޗުގެ ފުރަތަަމަ ހާފު 5-0 ގެ ނަތީޖާއަކުން ދަރަނބޫދޫ ކުރީގައި އޮވެގެން ނިމުނުއިރު ދެވަނަ ހާފުގައި އެޓީމުން ވަނީ އިތުރު ހަތަރު ލަނޑު ކާމިޔާބުކޮށްފައެވެ. އަދި މިމެޗުގައި ފީއަލީ ޓީމުން ކާމިޔާބުކުރި ހަމައެކަނި ލަނޑު މެޗުގެ ދެވަަނަ ހާފުގައި ކާމިޔާބުކޮށްދިނީ އެޓީމުގެ ޒިޔާން ހުސެއިން އެވެ.

ދަރަނބޫދޫ ޓީމުގެ މުހައްމަދު ސުލައިމާން، މަހުފޫޒު އުމަރު، މުޒްދާން ހަސަން މިއިން ކޮންމެ ކުޅުންތެރިއެއް ދެ ލަނޑު ކާމިޔާބުކުރި އިރު އެޓީމުގެ ކެޕްޓަން ސާޖިދު އަހުމަދު އިބްރާހިމް ގެ އިތުރުން މުއައްލިމް އުމަރު މިއިން ކޮންމެ ކުޅުންތެރިއެއް ވަނީ އެއް ލަނޑު ކާމިޔާބުކޮށްފައެވެ އެވެ. އަދި އެޓީމުގެ އަނެއް ލަނޑަކީ ފީއަލީގެ މުހައްމަދު ސަމީން އަތުން ބައިކޮޅަށް ވަން ލަނޑެކެވެ.

މިއާއެކު މެޗުގެ ކުޅުން ނިމިގެންދިޔައީ 9-1 ގެ ނަތީޖާއަކުން ދަރަނބޫދޫ ކުރީގައި އޮވެގެންނެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ ދަރަނބޫދޫ ޓީމުގެ ކެޕްޓަން ސާޖިދު އަހުމަދު އިބްރާހިމް އެވެ.

މިމެޗުން ލިބުނު ތިން ޕޮއިންޓާއެކު ކުޅުނު ތިން މެޗުން ދަރަނބޫދޫ އަށް ހަ ޕޮއިންޓް ލިބިފައިވާއިރު، މިމެޗުން ބަލިވި ފީއަލީ އިން ދެމެޗު ކުޅެފައިވާއިރު އެޓީމަށް އަދި ޕޮއިންޓެއް ނުލިބެއެވެ.

މިއަހަރުގެ މުބާރާތުގައި ޖުމްލަ 129 ޓީމު ބައިވެރިވެފައިވާއިރު، މުބާރާތުގައި 320 މެޗު ކުޅުމަށް ވަނީ ހަމަޖެހިފައެވެ. އަދި މިއަހަރުގެ މުބާރާތުގައި ފ. އަތޮޅުން ފަސް ޓީމު ބައިވެރިވެފައިވާއިރު، މިއަތޮޅުގެ އަތޮޅު ބުރު ކުރިއަށް ގެންދިއުމަށް ހަމަޖެހިފައިވަނީ ލީގު އުސޫލުން ކޮންމެ ޓީމެއް ކޮންމެ ޓީމަކާ އެއްފަހަރު ކުޅެ އެންމެ ގިނަ ޕޮއިންޓް ހޯދާ ދެޓީމު ފައިނަލަށް ހޮވޭގޮތަށެވެ. އަދި މިއަތޮޅުގެ ޗެންޕިއަން ޓީމަށް މުބާރާތުގެ ޒޯނު ބުރުން ފުރުސަތު ލިބިގެންދާނެ އެވެ.

މި އަހަރުގެ މުބާރާތުގައި ފ.އަތޮޅުން ބައިވެރިވެފައިވާ ޓީމުތަކަކީ، ފީއަލި، ނިލަންދޫ، ބިލެއްދޫ، ދަރަނބޫދޫ އަދި މަގޫދޫ އެވެ.