އީރާނުގެ ކުރީގެ ރޫޙާނީ ލީޑަރު ޚާމަނައީގެ ޖަނާޒާއަށް މޯދީއަށް ދަޢުވަތު ދީފި

އީރާނުގެ ކުރީގެ ރޫޙާނީ ލީޑަރު އާޔަތުالله ޢަލީ ޚާމަނާއީގެ ރަސްމީ ޖަނާޒާގައާއި ފަސްދާނުލުމުގެ ރަސްމިއްޔާތުގައި ބައިވެރިވުމަށް، އިންޑިއާގެ ބޮޑުވަޒީރު ނަރެންދުރާ މޯދީއަށް އީރާނުގެ ރައީސް މަސްޢޫދު ޕެޒެޝްކިއަން ދަޢުވަތު އަރުވައިފިއެވެ.

އުމުރުފުޅުން 86 އަހަރުގައި ޚާމަނާއީ އަވަހާރަވެފައިވާއިރު، އީރާނުގެ އެންމެ މަތީ ވެރިޔާގެ މަޤާމުގައި 36 އަހަރު އޭނާ ހުންނެވިއެވެ. އޭނާ އަވަހާރަވީ މިއަހަރުގެ ފެބްރުއަރީ މަހުގެ 28 ވަނަ ދުވަހު އެމެރިކާ އާއި އިސްރާއީލުން ގުޅިގެން ތެހެރާނަށް ދިން ވައިގެ ޙަމަލާތަކެއްގައެވެ.

އީރާނުގެ ދައުލަތުގެ މީޑިއާތަކުން ރިޕޯޓްކުރާ ގޮތުގައި، ގިނަ ދުވަސްތަކަކަށް ދެމިގެންދާ ޖަނާޒާގެ ރަސްމިއްޔާތުތައް ފެށުމަށް ހަމަޖެހިފައިވަނީ ޖުލައި މަހުގެ 4 ވަނަ ދުވަހުއެވެ. އަދި ޖުލައި 7 ވަނަ ދުވަހު ގުމްގައި ޚާއްޞަ ރަސްމިއްޔާތުތަކެއް ބޭއްވުމަށްފަހު، ޖުލައި 9 ވަނަ ދުވަހު އޭނާގެ އުފަން ރަށް ކަމަށްވާ މަޝްހަދުގައި ފަސްދާނުލުމަށް ވަނީ ނިންމާފައެވެ.

މި ޖަނާޒާގައި ބައިވެރިވުމަށް އިންޑިއާގެ ބޮޑުވަޒީރުގެ އިތުރުން ޕާކިސްތާނުގެ ބޮޑުވަޒީރު ޝެހްބާޒް ޝަރީފާއި ދުނިޔޭގެ އެކި ޤައުމުތަކުގެ އިސްވެރިންނަށް ވަނީ ދަޢުވަތު އަރުވާފައެވެ. ބޭރުގެ މީޑިއާތަކުން ލަފާކުރާ ގޮތުގައި މި ޖަނާޒާގައި ގާތްގަނޑަކަށް 20 މިލިއަން މީހުން ބައިވެރިވާނެއެވެ.

މިއީ 1989 ވަނަ އަހަރު އާޔަތުالله ޚުމައިނީގެ ޖަނާޒާގައި ބައިވެރިވި 10 މިލިއަން މީހުންގެ ރެކޯޑަށްވުރެ އިތުރު އަދަދެކެވެ.

ޚާމަނާއީ އަވަހާރަވުމާ ގުޅިގެން، އޭނާގެ ދަރިކަލުން މުޖްތަބާ ޙުސައިނީ ޚާމަނާއީ ވަނީ މާރިޗު 8 ވަނަ ދުވަހު އީރާނުގެ އެންމެ މަތީ ވެރިޔާގެ މަޤާމާ ޙަވާލުވެވަޑައިގަންނަވާފައެވެ.