މިދިޔަ 24 ގަޑިއިރުތެރޭ ޣައްޒާގެ 48 މީހުން ޝަހީދުކޮށްލައިފި

މިދިޔަ 24 ގަޑިއިރުތެރޭގައި ހައްދުފަހަނަ އަޅާފައިވާ އިޒްރާއީލުގެ ޔަހޫދީން ދިން ހަމަލާތަކުގައި ޣައްޒާގެ 48 މީހުން ޝަހީދުކޮށްލައިފައިވާކަމަށް ޣައްޒާގެ ހެލްތް މިނިސްޓްރީއިންބުނެފިއެވެ.

މިދިޔަ ހަފްތާއިން ފެށިގެން ހައްދުފަހަނަ އަޅާފައިވާ އިޒްރާއީލުގެ ޔަހޫދީން ޣައްޒާއަށް ދެމުންދާހަމަލާތަށް ވަނީ އިތުރުކޮށްފައެވެ.

ޣައްޒާގެ މެދުތެރޭގެ ސަލާހުއްދީން މަގުގައި ހުންނަ އަލް-ޒަވައިދާ ސަރަހައްދު ކައިރީގައި ހުރި ބްރިކްސް އަކަށާއި އަލް އަޖުލާ އާއިލާއަށް ނިސްބަތްވާ ގެއަކަށް އިސްރާއީލުން ދިން ހަމަލާތަކުގައި 15 މީހުން ޝަހީދުވެ ޒަހަމްވެފައިވާކަމަށް ސިވިލްޑިފެންސްއިންވަނީ ބުނެފައެވެ. މިހަމަލާގައި ޝަހީދުވެފައިވަނީ އަލް އަޖުލާ އާއިލާގެ 15 މީހުންނެވެ. މީގެ ތެރޭގައި 2 އަހަރުގެ ކުޑަކުއްޖެއްވެސް ހިމެނެއެވެ.

އަދި މީގެ އިތުރުން ޣައްޒާގެ މެދުތެރޭގައި ހުންނަ ނުސައިރިޔާތް ކޭންޕްގެ އަބޫ ސާލިހް އަބޫ މައްލާ އާއިިލާ އަށް ނިސްބަތްވާ ގެއަކަށް ހަމަލާދީ އަބޫ މައްލާ އާއިލާގެ 7 މީހުންވަނީ ޝަހީދުކޮށްލާފައެވެ.

ޣައްޒާގެ މެދުތެރޭގައި އޮންނަ ދީރް އަލް ބަލާހް އަށް މިއަދު ހެނދުނު ދިން ހަމަލާގައި ވަނީ 7 މީހުން ޝަހީދުކޮށްލާފައެވެ. އަދި ނުސައިރިއާތް ކޭމްޕަށް ދިންހަމަލާގައި ވަނީ 4 މީހުން ޝަހީދުކޮށްލާފައެވެ.