އިންޑިއާގެ ޑޮކްޓަރުނަށް ރައްކާތެރި މާހައުލެއް ގާއިމް ކުރުމަށް ޚާއްސަ ޕެނަލެއް

އިންޑިއާގެ ޑޮކްޓަރުންނަށް ރައްކާތެރި މާހައުލެއް ގާއިމުކުރުމަށް ޑޮކްޓަރުންގެ ޕެނަލެއް އެކުލަވާލަން އިންޑިއާގެ ސްޕްރީމް ކޯޓުން އަމުރުކޮށްފިއެވެ.

ކޯޓުން އެ އަމުރު ނެރުނީ އިންޑިއާގެ ކޮލްކަތާގެ ހޮސްޕިޓަލެއްގައި އުމުރުން 31 އަހަރުގެ އަންހެން ޑޮކްޓަރެއް ރޭޕްކޮށް މަރާލި މައްސަލައިގައި އުފެދިފައިވާ ކަންބޮޑުވުންތަކާ އެކު އިންސާފު ހޯދުމަށާއި ރައްކާތެރިކަން ހޯދައިދިނުމަށް އެދި ޑޮކްޓަރުން މުޒާހަރާ ކުރަމުންދާތީއެވެ.

ޑޮކްޓަރުންގެ ޓާސްކު ފޯސްގައި ހިމެނޭ ޕެނަލް މެދުވެރިކޮށް އެ ގައުމުގެ ޑޮކްޓަރުންނަށް މަސައްކަތުގެ މާހައުލުގައި ހުރި ދަތިތައް ބަލަައި ރަނގަޅު ކުރަންޖެހޭ ކަންކަން ހޯދައި ސަލާމަތީ ގޮތުން އެޅޭނެ ފިޔަވަޅުތައް ދިރާސާކޮށް އެއަށް އަމަލު ކުރުމަށް ކަމާބެހޭ ފަރާތްތަކަށްހުށަހެޅުން ހިމެނެއެވެ.

އިންޑިއާގެ އުއްތަމަ ފަނޑިޔާރު ދަނަންޖަޔާ ޔެޝްވާންތު ޗަންދްރަޗޫދު ވިދާޅުވީ  ޑޮކްޓަރުންނާއި އަންހެން ޑޮކްޓަރުންގެ ރައްކާތެރިކަން ހިމާޔަތްކުރުމަކީ ގައުމީ މަސްލަހަތާއި ހަމަހަމަކަމުގެ އުސޫލެއްކަމާއި މިހާރުން މިހާރަށް އަމަލު ކުރަންޖެހޭކަމަށްބުނެފައިވެއެވ އައިތުރު ރޭޕަކަށް މަޑެއް ނުކުރެވޭނޭކަމަށްވެސް އޭނާވަނީ ބުނެގައެވެ.

ސްޕްރީމް ކޯޓުން ނެރެގައިވާ އަމުރުގައި ވަނީ ތިން ހަފުތާގެ ތެރޭގައި ވަގުތީ ރިޕޯޓެއް ހުށަހެޅުމާއި ދެ މަސް ދުވަހުގެ ތެރޭގައި ފައިނަލް ރިޕޯޓެއް ހުށަހެޅުމަށް ޓާސްކްފޯހަށް އަންގާފައެވެ.

ޑޮކްޓަރު މަރާލާފައި އޮއްވައި ފެނުނީ އޭނާ މަސައްކަތްކުރާ ހޮސްޕިޓަލްގެ ސެމިނާ ހޯލުންނެވެ.

ގާތްގަޑަކަށް 4 ލައްކަ މެންބަރުން ހިމެނޭ އިންޑިއާގެ އެންމެ ބޮޑު ޑޮކްޓަރުންގެ ގްރޫޕް ކަމަށްވާ އިންޑިއަން މެޑިކަލް އެސޯސިއޭޝަން އިން ވަނީ މިދިޔަ ހަފުތާ ބަންދުގައި 24 ގަޑިއިރު ވަންދެން ހަޅުތާލުކޮށްފައެވެ.

ސުޕްރީމް ކޯޓުން ވަނީ ޑޮކްޓަރުންވެސް ވީހާވެސް އަވަހަށް މަސައްކަތަށް ނިކުތުމަށް އަންގާފައެވެ.

އިންޑިއާގެ ކަލްކަތާގެ ހޮސްޕިޓަލެއްގައި މި މަހުގެ 9 ވަނަ ދުވަހު، ގުރޫޕަކުން އަންހެން ޑޮކްޓަރަކު ރޭޕުކޮށް މަރާލުމުގެ މައްސަލަ ފެންމަތިވެ އެކަމަށް އިންސާފު ހޯދުމަށާއި ރައްކާތެރި މާހައުލެއް ގާއިމު ކުރުމަށް ގޮވާލައި ޑޮކްޓަރުން ވަނީ މަގުތަކަށް ނިކުމެ ބޮޑެތި މުޒާހަރާތައް ފަށާފައެވެ.