28 ބިދޭސީ ނަރުހަކަށް ދެމަސް ދުވަހުގެ މުސާރަ އަދިވެސް ނުލިބޭ!
ދިވެހިރާއްޖޭގައި މަސައްކަތްކުރާ 28 ބިދޭސީ ނަރުހުންނަށް ޖޫން އަދި ޖުލައި މަހުގެ މުސާރަ ނުލިބޭކަމަށް ބުނެފިއެވެ.
މިފަދައިން ބުނެފައިވަނީ ސިއްހީ ދާއިރާގައި މަސައްކަތްކުރާ ފަރާތްތަކުގެ ހައްގުގައި ވަކާލާތުކުރާ ޖަމްއިއްޔާއެއްކަމަށްވާ މޯލްޑިވްސް ހެލްތު ޕްރޮފެޝަނަލްސް ޔޫނިއަނުންނެވެ.
އެ ޔޫނިއަނުން ކުރި ޓްވީޓެއްގައި ބުނީ ބިދޭސީ 28 ނަރުހަކަށް، ޖޫން އަދި ޖުލައި މަހުގެ އަސާސީ މުސާރަ ހަމަޖެހިފައި ނުވުމުން އެކަމާއި މެދު ކަންބޮޑުވާކަމެކެވެ. އަދި ވީ އެންމެ އަވަސް، ފުރުސަތެއްގައި، މިފަރާތްތަކުގެ މުސާރަ ހަމަޖެއްސުމަށް ގޮވާލާކަމަށްވެސް ވަނީ ބުނެފައެވެ.
އޮންލައިން ނޫސް "މިހާރު"އަށް މައުލޫމާތުދެމުން ހެލްތު ޕްރޮފެޝަނަލްސް ޔޫނިއަންގެ އޮފިޝަލަކު ވިދާޅުވީ އެ ނަރުހުންނަށް މުސާރަ ލިބުން ލަސްވެފައިވަނީ ސިސްޓަމްގެ ތެރެއިން ލަސްތަކެއް އައިސްގެންކަމަށް ހެލްތު މިނިސްޓްރީން ބުނެފައިވެއެވެ. އެގޮތުން އެމީހުންގެ މުސާރަ ބޭންކްގައި ހުރިކަމަށް ބުނެފައިވާކަމަށްވެސް އޮފިޝަލް ވަނީ ވިދާޅުވެފައެވެ.
ނަމަވެސް އެއްވެސް ސަބަބަކާއި ގުޅިގެން މުސާރަ މިހާ ލަސްވުމަކީ ބަލައިގަނެވޭނެ ކަމެއް ނޫންކަމަށް އޮފިޝަލް ފާހަގަކުރެއްވިއެވެ. މި ނަރުހުންނަކީ މިހާރު ކޮވިޑް-19 ފެސިލިޓީ އެއްގައި މަސައްކަތްކުރަމުންދާ ފަރާތްތަކެކެވެ.
Advertisement
This content is created and paid for by advertisers and does not involve Voice Journalists