ސަރުކާރުގެ ހިކްމަތްތެރިކަމުން ޑޮލަރު ރޭޓްމިވަނީ 20 ރުފިޔާގައި ހިފެހެއްޓިފައި: ހަލީމް
މިސަރުކާރުގެ ހިކުމަތްތެރިކަމުގެ ސަބަބުން ޑޮލަރު ރޭޓް މިވަނީ 20 ރުފިޔާގައި ހިފެހެއްޓިފައިކަމަށް ބިލެއްދޫ ދާއިރާގެ މެންބަރު އަހްމަދު ހަލީމް ވިދަޅުވެއްޖެއެވެ.
ހަލީމް މިހެން ވިދާޅުވެފައިވަނީ މިއަދު ކުރިއަށް ދިޔަ މަޖިލިސް ޖަލްސާގައި ކުރީގެ އިޤްތިސާދީ ވަޒީރުކަން ކުރައްވާފައިވާ މިހާރުގެ މާވަށު ދާއިރާގެ މެންބަރު މުހައްމަދު ސައީދު ދެއްކެވި ވާހަކައަށް ރައްދުދެއްވައި ނެންގެވި ނިޒާމީ ނުގުތާއެއްގައި ވާހަކަދައްކަވަމުންނެވެ.
"މިސަރުކާރުގެ ހިކުމަތްތެރިކަމާއި އަޅުގަނޑުމެންގެ ގަވަރުނަރުގެ ހިކުމަތްތެރިކަމުގެ ސަބަބުން އަދިވެސް އަޅުގަނޑުމެން ޑޮލަރު ރޭޓް މިވަނީ 20ގައި ހިފަހައްޓާފައި" އަހްމަދު ހަލީމް ވިދާޅުވިއެވެ.
ހަލީމް އިތުރަށް ވިދާޅުވިގޮތުގައި ދުނިޔޭގެ މާލީ އިދާރާތަކުން އަންދާޒާކޮށްފައި ވަނީ ރާއްޖޭގެ ޓުއަރިޒަމް ހުއްޓިއްޖެނަމަ 25 ރުފިޔާއަށް ޑޮލަރު އަރާނެކަމަށް ބުނެފައިވާކަމަށެވެ.
ރާއްޖޭގެ ޓުއަރިޒަމް އަލުން ހުޅުވާލިކަމުގައި ވީނަމަވެސް މިހާތަނަށްވެސް ރައީސް ޞާލިހްގެ ސަރުކާރުން ޓުއަރިޒަމްއަށް އަންނާނެކަމަށް ލަފާކޮށްފައިވާ ޓުއަރިޒަމްގެ ބޫސްޓް އައިސްފައިނުވެއެވެ. ސަރުކާރުން މިހާރު ބުނަމުން އަންނަނީ ކުރިއަށް އޮތީ ދަތި 6 މަހަށް ވެގެންދާނެކަމަށެވެ.
މި ސަރުކާރުން ކޮވިޑް-19 އާއި ގުޅިގެން އިޤްތިސާދު މެނޭޖްނުކުރެވި ގިނަ ވިޔަފާރިވެރިންނާއި އާންމުން އަންނަނީ މީސްމީޑިއާގައި ސަރުކާރަށް ފާޑުކިޔަމުންނެވެ.
ބޭރުގެ ލޯނާއި، ހިލޭއެހީ ލިބިފައިވާ އިރު މީގެން އިޤްދިސާދު ހަމައަކަށް އެޅުމުގެ ބަދަލުގައި ބޮޑެތި ކޮރަޕްޝަންތަކެއް މިވަނީ ފެންމަތިވެފައެވެ.
ޑޮރަލުގެ އަގު އުފުލުމާއެކު މިހާރު ރާއްޖޭގެ ކާބޯތަކެތީގެ އަގުތައް އުފުލެންފަށާފައިވާ އިރު ސަރުކާރުންނާއި ސަރުކާރު މަޖިލިސް މެންބަރުން ދަނީ ސަރުކާރުގެ ނިންމުންތަކާއި ސިޔާސަތައް ތައުރީފްކުރަމުންނެވެ.
Advertisement
This content is created and paid for by advertisers and does not involve Voice Journalists