ޑޮލަރުގެ މައްސަލާގައި ޝާހިދުގެ ފާޑުވިދާޅުވުން ގަވަރުނަރަށް
އިގްތިސާދީ ބޮޑު ކާރިސާއެއް ބޯމަތިވަމުން ދާއިރު މަރުކަޒީ ބޭންކު އެމްއެމްއޭގެ ގަވަރުނަރު ހަނު ހުންނެވެމަކީ ޣައިރު ޒިންމާދާރު އަމަލެއް ކަމަށް ވިދާޅުވެ ގަވަރުނަރަށް, މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ރައީސް އަދި ކުރީގެ ހާރިޖީ ވަޒީރު އަބްދުﷲ ޝާހިދު ވިދާޅުވެއްޖެ އެވެ.
އެކްސްގައި ކުރެއްވި ޕޯސްޓެއްގައި ޝާހިދު ވިދާޅުވީ ޑޮލަރުގެ އަގު ދިވެހި ތާރީހުގައި ވެސް އުފުލިގެން ނުދާ މިންވަރަށް އުފުލި، ރައްޔިތުންގެ އަތްމަތި ދަތިވެފައިވާ ކަމަށެވެ. އަދި ކުދި އަދި މެދުފަންތީގެ ވިޔަފާރިތައް އިނދަޖެހި، ގައުމު އިގްތިސާދީ އަނދަވަޅަކަށް ވެއްޓެމުންދާ ކަމަށް ޝާހިދު ވިދާޅުވި އެވެ.
އިގްތިސާދު މި ހާލަތަށް ގޮސް، ރައްޔިތުން ހާލުގައި ޖެހި، އިގްތިސާދީ ބޮޑު ކާރިސާއެއް ބޯމަތިވަމުން ދާއިރުވެސް ގަވަރުނަރު ހަނު ހުންނެވެމަކީ ޣައިރު ޒިންމާދާރު އަމަލެއް ކަމަށާއި އެއީ ވަރަށް ބޮޑު އިހުމާލެއް ކަމަށް ސިފަ ކުރައްވައި، ގަވަރުނަރަށް ޝާހިދު ވަރަށް ބޮޑަށް ފާޑުވިދާޅުވި އެވެ.
ސިޔާސީ މީހުންގެ މުށުތެރޭގައި ނުހުންނަވައި، ގަވަރުނަރު މަގާމުގެ ޒިންމާ ފުރިހަމަޔަށް އަދާކުރެއްވުމަށް ވެސް ޝާހިދު ވަނީ ގޮވާލައްވާފަ އެވެ. އަދި ގައުމު ބަގުރޫޓުވެގެން ދިޔަ ނުދިނުމަށް އެމްއެމްއޭއިން އަޅާ ފިޔަވަޅުތައް ރައްޔިތުންނަށް ހާމަކޮށްދިނުމަށް ވެސް ޝާހިދު ގޮވާލެއްވި އެވެ.
ޑޮލަރުގެ ކަޅު ބާޒާރެއް ޑޮލަރެއްގެ އަގު ވަނީ 20 ރުފިޔާ އިން މަތިވެފަ އެވެ.
Advertisement
This content is created and paid for by advertisers and does not involve Voice Journalists
