ސެލްޓަ ވީގޯ ބަލިކޮށް ބާސާ ތާވަލުގެ ކުރިއަށް
ސްޕެނިޝް ލީގުގައި ރޭ ބާސެލޯނާ އަދި ސެލްޓަ ވީގޯ ވާދަކުރި މެޗް 3-0 ކާމިޔާބުކޮށް ބާސެލޯނާ ތާވަލުގެ ކުރިއަށް ޖެހިލައިފިއެވެ.
މެޗުގެ 11 ވަނަ މިނެޓުގައި ބާސެލޯނާއަށް ލީޑް ނަގައިދިނީ 17 އަހަރުގެ އަންސޫ ފާތީ އެވެ. މިއާއެކު ލީގުގައި އޭނާ ބާސެލޯނާއަށް ޖަހައިދިން ގޯލުގެ އަދަދު ވަނީ 10 އަކަށް އަރާފައެވެ. މިއީ ސްޕެނީޝް ލީގުގައި 17 އަހަރުގެ ކުޅުންތެރިޔަކު ބާސެލޯނާއަށް 10 ގޯލް ޖަހައިދިން ދެވަނަ ފަހަރެވެ. ފާތީގެ އިތުރުން މި ރެކޯޑް ހެދި އަނެއް ކުޅުންތެރިޔަކީ ބޯޖަންއެވެ.
ފުރަތަމަ ހާފް ނިމިގެން ދިޔައިރު ބާސެލޯނާގެ ފަރާތުން އެދެވޭ ކުޅުމެއް ފެނިގެން ގޮސްފައިނުވާއިރު ހާފް ނިމެން ކައިރި ވެފައިވަނިކޮށް އެޓީމުގެ ޑިފެންޑަރ ލެންގްލޭ އަށް ވަނީ ދެ ރީނދޫ ކާޑު ހަމަވުމުގެ ރަތް ކާޑު ދައްކާ ދަނޑުން ފޮނުވާލާފައެވެ.
ބާސެލޯނާގެ ދެވަނަ ގޯލަކީ ސެލްޓަ ވީގޯގެ ޑިފެންޑަރުންގެ ކައިރިން މެސީ ދެމިގަނެގެން ފޮނުވާލި ހަމަލާއެއް އިދިކޮޅު ކުޅުންތެރިޔާ އަތުން ބައިކޮޅަށް ވައިން ގޯލެކެވެ. ދެވަނަ ހާފުގެ އިތުރުގަޑީގައި ބާސެލޯނާގެ ތިންވަނަ ގޯލް ޖަހައިދިނީ ސާޖިއޯ ރޮބޭޓޯ އެވެ.
ކޯމަންގެ އިރުޝާދުގެ ދަށުން މި ސީޒަނައި ކުރިމަތިލި ބާސެލޯނާ ލީގުގައި ކުޅުނު ދެމެޗުން މޮޅުވެ އޮތީ ތާވަލުގެ ފަސް ވަނައިގައެވެ.
Advertisement
This content is created and paid for by advertisers and does not involve Voice Journalists