ކުރީގެ ރައީސް އަބްދުﷲ ޔާމީންގެ ބޭންކް އެކައުންޓްތައް ފްރީޒްކޮށްފައިވަނީ ގޯސްކޮށް ކަމަށްބުނެ ހައިކޯޓުން ކުރި ހުކުމަށް ސުޕްރީމް ކޯޓުންވެސް ތާއިދުކޮށްފިއެވެ.

ފުލުހުން ތަހުގީގުކުރަމުންދިޔަ ރައީސް ޔާމީންގެ މައްޗަށް ތުހުމަތު ކުރެވޭ މަނީ ލޯންޑަރިންގގެ މައްސަލައާއި ގުޅިގެން އެމަނިކުފާނުގެ އެކައުންޓްތައް ފްރީޒް ކުރުމަށް ކްރިމިނަލް ކޯޓުން އަމުރުކުރީ 2018 ވަނަ އަހަރުގެ ޑިސެމްބަރު މަހުގެ ތެރޭގައެވެ.

ކްރިމިނަލް ކޯޓުގެ އަމުރަކާއި އެކު ފްރީޒް ކުރީ ނެރުނު އަމުރަކުން، މޯލްޑިވްސް އިސްލާމިކް ބޭންކް (އެމްއައިބީ) ގައި ރައީސް ޔާމީންގެ ނަމުގައި ހުޅުވާފައިވާ 8 އެކައުންޓްތަކެވެ. ނަމަވެސް ހައިކޯޓުން ފަހުންވަނީ މި އަމުރު ބާތިލްކޮށްފައެވެ.

ހައިކޯޓުގެ އެ ނިންމުން ދައުލަތުގެ ފަރާތުން ސުޕްރީމް ކޯޓުގައި ފަހުން ވަނީ އިސްތިއުނާފްކޮށްފައެވެ. މި މައްސަލައިގައި ސުޕްރީމް ކޯޓުން ކުރި ހުކުމްގައި ބުނެފައިވަނީ ފްރީޒްކުރެވުނު އެކައުންޓްތަކާ އެމްއެމްޕީއާރްސީގެ ޚިޔާނާތުގެ މައްސަލަތަކުގެ ތެރެއިން ގއ.ވޮޑަމުއްލާ ކުއްޔަށްދީގެން ލިބުނު އެއް މިލިޔަން ޑޮލަރާއި ގުޅުމެއް އޮތްކަމަށް ދެއްކިފައި ނުވާކަމަށެވެ. 

ސުޕްރީމް ކޯޓުން މި މައްސަލަ ބެއްލެވީ ތިން ފަނޑިޔާރުންގެ ބެންޗަކުންނެވެ. އެއީ ފަނޑިޔާރު އަލްއުސްތާޛު ހުސްނުއްސުއޫދު ރިޔާސަތުގައި އިންނަވާ، ފަނޑިޔާރު އަލްއުސްތާޛާ އައިޝާ ޝުޖޫނާއި ފަނޑިޔާރު ޑރ. އަޒްމިރަލްދާ ޒާހިރު ހިމެނޭ ބެންޗެކެވެ.