ހުޅުމާލެ ފޭސް އެކެއްގައި ހުންނަ، އެޕޯލޯ ކްރިސްޓަލް ރެސިޑެންގެ އެޕާޓްމަންޓެއްގައި މިއަދު ރޯވި އަލިފާންގަނޑު ނިއްވާލީ ދޮރުހަލާކުކޮށްލައިގެން ވަދެކަމަށް ފުލުހުން ބުނެފިއެވެ.

މިކަމާ ގުލޭގޮތުން ފުލުހުން މިއަދު ބުނީ ފޭސް އެކެއްގައި ހުންނަ އެޕޯލޯގެ އެ ޓަވަރުގެ އެޕާޓްމަންޓްގައި އަލިފާން ރޯވިކަމުގެ މައުލޫމާތު ފުލުހުންނަށް ލިބުނީ 13:57 ހާއިރުކަމަށެވެ. އަލިފާން ރޯވީ އިމާރާތުގެ 8 ވަނަ ފަންގިފިލާގައި ހުންނަ އެޕާޓްމަންޓެއްގައެވެ. އަލިފާން ރޯވެ ދުން އަރަންފެށުމާއެކު، އާއްމުން އެކަން ރިޕޯޓްކުރުމާއެކު އެމްއެންޑީއެފްގެ ފަޔަރ އެންޑް ރެސްކިއުޓީމާއި ފުލުހުން ވަރަށް އަވަހަށް އެ ސަރަހައްދަށް އެޓެންޑްވި މަންޒަރު ވޮއިސްގެ ނޫސްވެރިންނަށް ވަނީ ފެނިފައެވެ.

ފުލުހުން ބުނީ އާންމުންގެ އެހީތެރިކަމާއެކު އެ އެޕާޓްމަންޓުގެ ދޮރު ހަލާކުކޮށްލައިގެން ވަދެ، އެތަނުގައި ރޯވެފައި ހުރި އަލިފާންގަނޑު ނިއްވާލިކަމަށެވެ.

މި ހާދިސާ ހިނގި ވަގުތު އެޕާޓްމަންޓްގައި އެއްވެސް މީހަކު ނެތްކަމަށް ފުލުހުން ބުންޏެވެ. އަދި މި ހާދިސާގައި އަލިފާން ރޯވެފައި ހުރީ ބެލްކަނީގައި ހުރި ލަކުޑި ތަކެއްގައެވެ.

ފުލުހުން ބުނީ މި ހާދިސާ ހިނގަން މެދުވެރިވި ސަބަބު ފުލުހުން ދަނީ ތަހުގީގު ކުރަމުންނެވެ