އިންޑިއާއިން ލަދާކް ބޯޑަރު ސަރަހައްދުން ހިފެހެއްޓި ޗައިނާގެ ސިފައިންގެ މީހަކު ދޫކޮށްލައިފި
ހިމާލިޔާގެ ލަދާކް ސަރަހައްދުން އިންޑިއާއިން ހިފެހެއްޓި ޗައިނާގެ ސިފައިންގެ މީހާ އިއްޔެގެ ވަގުތެއްގައި ދޫކޮށްލައިފިއެވެ.
ޗައިނާގެ ސިފައިންގެ މީހެއް ކަމަށްވާ ވަންގް ޔަ ލޮންގް އިންޑިއާއިން ހިފެއްޓުމަށް މެދުވެރިވީ ހުއިހައްޕާ މީހަކަށް އެހީވުމުގެ ގޮތުން ޔަކްތަކެއް ހޯދައިދިނުމުގެ މަސައްކަތުގައި އުޅެނިކޮށް މަގު އޮޅިގެން ލަދާކް ބޯޑަރު ސަރަހައްދުގެ އިންޑިއާއާއި ވީ ފަޅިއަށް އާދިއްތަ ދުވަހުގެ ހަވީރުގެ ވަގުތެއްގައި ހުރަސްކުރެވެމުން ކަމަށް ބޭރުގެ ބައެއް މީޑިއާތަކުން ވަނީ ރިޕޯޓްކޮށްފައެވެ.
މިދިޔަ ހޯމަ ދުވަހު އިންޑިއާގެ ކަމާއިބެހޭ ފަރާތްތަކުން އާންމުކުރި ބަޔާނެއްގައި އިންޑިއާއިން ބުނެފައިވަނީ ޗައިނާގެ ސިފައިންގެ މީހަކު ހިފައްޓާފައިވާ ކަމަށާއި އޭނާ ދޫކޮށްލާނީ ފުރިހަމަ ކުރަންޖެހޭ ރަސްމީ ކަންކަން ފުރިހަމަ ކުރުމަށް ފަހުގައި ކަމަށެވެ. މިކަމާއި ގުޅިގެން ޗައިނާގެ ޑިފެންސް މިނިސްޓްރީ އިން ވަނީ ބޯޑަރުގައި ސުލްހަމަސަލަސްކަން ދެމި ހުރުމަށް އެދޭނަމަ ވީހާވެސް އަވަހަށް އޭނާ ދޫކޮށްލުމަށް ގޮވާލާކަމަށް ބުނެފައެވެ.
މިއަހަރުގެ ޖޫންގައި ހިނގި ތަޅާފޮޅުމަށްފަހު ފަހު ޗައިނާއިންނާއި އިންޑިއާއިން ދަނީ ގިނަ އަދަދެއްގެ ސިފައިން ލަދާކް ސަރަހައްދަށް އެއްކުރަމުންނެވެ. އެ ސަރަހައްދުގައި ކުރިޔަށްދާ މި ކުރިމަތިލުމުގައި މިހާތަނަށް އިންޑިއާގެ ސިފައިންގެ 20 މީހަކު ވަނީ މަރުވެފައެވެ.
އަދި ޗައިނާގެ ސިފައިންގެ ލަޝްކަރުގެ މީހުންގެ ތެރޭގައިވެސް އަނިޔާވި ފަރާތްތައް ހިމެނޭކަމަށް ޤަބޫލުކުރެވުނު ނަމަވެސް ޗައިނާއިން ވަނީ މިކަމާއި ގުޅިގެން އެއްވެސް މައުލޫމާތެއް ދީފައެއް ނުވެއެވެ.
Advertisement
This content is created and paid for by advertisers and does not involve Voice Journalists