އެމެރިކާގެ ނިންމުން 2020: ޓްރަމްޕްގެ މިސްރާބު ސުޕްރީމް ކޯޓަށް!
އެއްވެސް ރަސްމީ ޔަގީންކަމެއް ނެތި އެމެރިކާގެ ރިޔާސީ އިންތިޚާބު "ކާމިޔާބުކުރެއްވިކަމަށް" އެގައުމުގެ މިހާރުގެ ރައީސް ޑޮނަލްޑް ޓްރަމްޕް އިއުލާންކުރައްވައިފިއެވެ.
ރިޕަބްލިކަން ޕާޓީގެ ކެނޑިޑޭޓް ޓްރަމްޕް މިފަދައިން އިއުލާންކުރެއްވީ ވައިޓް ހައުސްގެ އީސްޓް ރޫމްގައި ސަޕޯޓަރުންނާ މީޑިޔާގެ ފަރާތްތަކާ ބައްދަލުކުރައްވާ ވާހަކަ ދައްކަވަމުންނެވެ.
ޓްރަމްޕް ވިދާޅުވީ މިލިޔަނުން މީހުން ރިޕަބްލިކަން ޕާޓީއަށް ވޯޓުލާފައިވާ ކަމަށާއި، ނަމަވެސް އެމީހުން އެ ހައްގުން ދުރުކުރުމަށް ބަޔަކު މަސައްކަތްކުރަމުންދާ ކަމަށެވެ. އަދި އިންތިޚާބު ކާމިޔާބުކޮށްފައިވަނީ ރިބަޕްލިކަނުންކަމަށްވެސް ވަނީ ބުނެފައެވެ.
އެމަނިކުފާނު ވިދާޅުވީ ގާނޫނު ހެޔޮގޮތުގައި ބޭނުންކުރުމަށް ބޭނުންވެ ވަޑައިގަންނަވާ ކަމަށާއި، އެހެންކަމުން ސުޕްރީމް ކޯޓަށް ދާނެކަމަށެވެ. ޓްރަމްޕް ވިދާޅުވީ ވޯޓުލުން ހުއްޓުވަން ބޭނުންފުޅުވެ ވަޑައިގަންނަވާ ކަމަށާއި، ފަތިހު ހަތަރެއް ޖަހާއިރު ބެލޮޓެއް ފެނި އެ ލިސްޓަށްލުމަށް ނޭދޭކަމަށެވެ.
އިންތިޚާބުގެ ވޯޓުގުނުން ކުރިއަށްދާއިރު، ނަތީޖާ މިހާތަނަށް ނުލިބިވާ ގިނަ ސްޓޭޓްތަކުގެ ނަތީޖާއިން ފެންނަނީ ދެބޭފުޅުންވެސް ވަރަށް ގާތުން ވާދަކުރައްވަމުން ގެންދަވާ ތަނެވެ. ރާއްޖެގަޑިން 13:00 ހާއިރު އޭއެފްޕީއިން އާންމުކޮށްފައިވާ އެންމެ ފަހުގެ ނަތީޖާތައް ދައްކާ ގޮތުގައި ބައިޑަންއަށް ޔަގީންވެފައިވަނީ އިލެކްޓޯރަލް ކޮލެޖްގެ 235 ވޯޓެވެ. ޓްރަމްޕަށް ޔަގީންވެފައިވަނީ 213 ވޯޓެވެ.
އެމެރިކާގެ އިންތިޚާބީ ނިޒާމް ހަމަޖެހިފައިވާ ގޮތުން ރައީސްކަމުގެ މަގާމަށް ހޮވޭ ފަރާތެއް އައްޔަންކުރާނީ 538 އިލެކްޓަރުންގެ މައްޗަށް އެކުލެވޭ އިލެކްޓޯރަލް ކޮލެޖަކުންނެވެ.
މި އިލެކްޓޯރަލް ކޮލެޖް އެކުލެވިގެންވަނީ 435 ކޮންގްރެސް ރެޕްރެޒެންޓޭޓިވުން، 100 ސެނެޓަރުން އަދި ޑިސްޓްރިކްޓް އޮފް ކޮލަމްބިޔާގެ އިތުރު 3 އިލެކްޓަރުންގެ މައްޗަށެވެ. އެމެރިކާގެ ރައީސްކަމުގެ މަގާމަށް ހޮވޭ ފަރާތެއް ހޮވިގެންދާނީ މި އިލެކްޓޯރަލް ކޮލެޖްގެ ތެރެއިން އެންމެ ފުރަތަމަ މަދުވެގެން 270 ވޯޓު ހޯދައިގެންނެވެ.
Advertisement
This content is created and paid for by advertisers and does not involve Voice Journalists