ގާތްގަނޑަކަށް 10 މިލިއަން ރުޕީސްގެ އައިސް (ކްރިސްޓަލް މެތެމްފެޓަމީން) ސްރީލަންކާއަށް އެތެރެކޮށް ވިއްކަން އުޅުނު ކަމުގެ ތުހުމަތުގައި ދެ ދިވެއްސަކު އަވައްޓެރި ސްރީލަންކާއިން ހައްޔަރުކޮށްފިއެވެ.

ސްރީލަންކާގެ ނޫސްތަކުގައިވާގޮތުން މި ދެ މީހުންގެ ތެރެއިން އެކަކު ހައްޔަރުކޮށްފައިވަނީ ފުލުހުންގެ ނާކޮޓިކްސް ބިއުރޯ (ޕީއެންބީ) ގެ ޚާއްޞަ އޮޕަރޭޝަނެއްގައި ބަންޑާރަނައިކަ އިންޓަރނޭޝަނަލް އެއާޕޯޓުންނެވެ.

މި މައްސަލައިގައި ފުރަތަމަ ހައްޔަރުކޮށްފައިވަނީ ޢުމުރުން 40 އަހަރުގެ ދިވެހި ފިރިހެނެކެވެ. އެމީހާ ހައްޔަރުކުރިއިރު އޭނާގެ އަތުން މަސްތުވާތަކެތި ފެނިފައިވާކަމަށް ނޫސްތަކުން ވަނީ ރިޕޯޓްކޮށްފައެވެ. އޭނާ ލައިގެން ހުރި އެއްޗެހީގެ ތެރޭގައި 602 ގްރާމް ކްރިސްޓަލް މެތެމްފެޓަމީން ފޮރުވާފައި ހުރިއިރު، މީގެ ތެރެއިން އެއްބައި ފޮރުވާފައިހުރީ ލައިގެންހުރި ބޮކްސާގެ ތެރޭގައެވެ.

ލަންކާގެ ނޫސްތަކުން ބުނެފައިވަނީ ޕީއެންބީގެ ޑެޕިއުޓީ ޑިރެކްޓަރަށް ލިބުނު ޖާސޫސީ މަޢުލޫމާތަކާ ގުޅިގެން ފުލުހުން ވަނީ އެމީހާ ބޯޓުން ފޭބި ހިސާބުން ފެށިގެން ފާރަލާފައެވެ. މި މައްސަލާގައި އެމީހުންނާ ސުވާލުކުރުމުން ގެނައި މަސްތުވާތަކެތި ޙަވާލުކުރަން ހަމަޖެހިފައި އޮތީ ލަންކާގައި ހަރަކާތްތެރިވާ މައި ޑިސްޓްރިބިއުޓަރަކާ ކަމަށް އެނގުނު ކަމަށްވެސް ނޫސްތަކުން ވަނީ ރިޕޯޓްކޮށްފައެވެ.

މަސްތުވާ ތަކެތީގެ މައްސަލާގައި ދެވަނަ މީހާ ހައްޔަރުކޮށްފައިވަނީ، އިއްޔެ ރޭ ކޮލޮމްބޯގެ ހޮޓަލެއް ތެރެއިންނެވެ. ޢުމުރުން 28 އަހަރުގެ އެ މީހާ ހައްޔަރުކޮށް އޭނާގެ އަތުން 10 ގްރާމާއި 670 މިލީގްރާމުގެ އައިސް ހޯދާފައިވެއެވެ. އިއްޔެ ނެގޮމްބޯ މެޖިސްޓްރޭޓް ކޯޓަށް ހާޒިރުކުރުމުން ކޯޓުން ވަނީ އިތުރު ތަޙުޤީޤަށް އެމީހުން ބަންދުގައި ބައިތިއްބަން 14 ދުވަހުގެ މުއްދަތެއް ޖަހާފައެވެ.

ސްރީލަންކާގެ ޤާނޫނުތައް ބުނާގޮތުން މަސްތުވާތަކެތީގެ ނުރައްކާތެރި ބާވަތްތައް ކަމަށްވާ ހެރޮއިން، ކޮކެއިން، މޯފިން، އަދި މެތައެމްފެޓަމިން ފަދަ ތަކެއްޗާ މެދު ގާނޫނު ތަންފީޒުކުރުމުގައި ވަރަށް ހަރުކަށި އުސޫލުތަކެއް ގެންގުޅެއެވެ. އެގޮތުން މި ބާވަތުގެ މަސްތުވާތަކެތީގެ ތެރެއިން 5 ގުރާމް ނުވަތަ އެއަށްވުރެ ގިނަ މިންވަރެއް އެތެރެކުރުން، އޭގެ ވިޔަފާރިކުރުން ނުވަތަ އަތުގައި ބެހެއްޓުމަކީ މަރުގެ އަދަބު ނުވަތަ އުމުރަށް ޖަލަށްލުން ކަނޑައެޅިގެންވާ ބޮޑު ކުޑެކެވެ. އަދި 5 ގްރާމަށްވުރެ މަދުނަމަ އަދަބަކީ  5 އަހަރާއި 20 އަހަރާ ދެމެދުގެ މުއްދަތަކަށް ޖަލަށްލުމާއެކު، ބޮޑު އަދަދަކުން ޖޫރިމަނާ ކުރެވިދާނެއެވެ.