މަނީ ލޯންޑްރިންގެ ކުށް ސާބިތުވެ ހުކުމް ތަންފީޒު ކޮށްފައިވާ ކުރީގެ ރައީސް ޔާމީން އަބްދުލްގައްޔޫމްގެ އަދަބު ލުއިކޮށްދެވޭނީ ސުޕްރީމް ކޯޓުން ނިމިގެން ކަމަށް ރައީސުލްޖުމްހޫރިއްޔާ އިބްރާޙީމް މުޙައްމަދު ޞާލިޙް ވިދާޅުވެއްޖެއެވެ.
ރާއްޖެ ޓީވީގެ "ފަށާއިރު" ޕްރޮގްރާމްގައި ކުރި ސުވާލަކަށް ޖަވާބުދެއްވަމުން ރައީސް ޞާލިޙް ވިދާޅުވީ ޙުކުމް ތަންފީޒުކުރާ މީހަކަށް މަޢާފްދިނުމަކީ ރަޢީސްކަށް ހުންނަ މީހަކަށް ކުރެވޭނެ ކަމެއް ނޫން ކަމަށެވެ. ނަމަވެސް އޭގެ ބަދަލުގައި ކޮށްދެވޭނެ ކަމަކީ އަދަބު ލުއިކޮށްދިނުންކަމަށް ވިދާޅުވިއެވެ.
ރައީސް އިތުރަށް ވިދާޅުވީ ސުޕްރީމް ކޯޓުން މައްސަލަ ނިންމުމުގެ ކުރިން ކުރެވޭނެ އެއްވެސް ކަމެއް ނޯންނާނެ ކަމަށެވެ.
"އެއްވެސް ޑީލެއްގެ ދަށުން ބަންދެއްގައި ހުރި މީހަކު ދޫކޮށްލުމަކީ އަޅުގަނޑު ކުރާނެ ކަމެއް ނޫން" އެ މަނިކުފާނު ވިދާޅުވިއެވެ.
މަނީ ލޯންޑަރިންގެ އަމަލެއް ހިންގުމުގެ ކުށް ސާބިތުވެފައިވާ ކުރީގެ ރައީސް ޔާމީން އަބްދުލް ގައްޔޫމް ކަމަށް ކްރިމިނަލް ކޯޓުން ނިންމާ ފަސް އަހަރަށް އެމަނިކުފާނު ޖަލަށް ލުމާއެކު ފަސް މިލިއަން އެމެރިކާ ޑޮލަރުން ޖޫރިމަނާކޮށް، އެ ފައިސާ ހަ މަސް ދުވަހުގެ ތެރޭގައި މީރާއަށް ދައްކަން ނޮވެންބަރު 28، 2019 ގައި ވަނީ ހުކުމްކޮށްފައެވެ.
Advertisement
This content is created and paid for by advertisers and does not involve Voice Journalists
