ވޯޓުލާ މަރުކަޒުތަކަށް ރައީސް ނަޝީދު ޒިޔާރަތްކުރައްވަނީ
މިއަދު ހެނދުނު ފެށުނު ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ އިންތިޚާބުގައި މާލޭގައި ވޯޓުލާ މަރުކަޒުތަކަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ޒިޔާރަތްކުރައްވައިފިއެވެ.
އެގޮތުން އެމަނިކުފާނު ވަނީ ބައެއް މަރުކަޒުތަކަށް ވަޑައިގެން އެ ސަރަޙައްދުތަކުގައި ވޯޓުލުމުގެ ކަންތައްތައް ކުރިއަށްދާގޮތް ބައްލަވާލައްވަމުންނެވެ. އަދި އެ ސަރަޙައްދުތަކުގައި ތިބި ބައެއް އާންމުންގެ ފަރާތްތަކާއިވެސް ވަނީ ވާހަކަދައްކަވާފައެވެ.
ނަމަވެސް ބައެއް ފަރާތްތަކުން ދަނީ އެމަނިކުފާނު މިފަދައިން ޢަމަލުކުރައްވަމުން ގެންދަވާތީ އެކަމާއި މެދު ކަންބޮޑުވުން ފާޅުކުރައްވާފައެވެ.
މި އިންތިޚާބުގައި ވޯޓުލުމުގެ އާންމު ގަޑިއެއްގެ ގޮތުގައި ކަނޑައަޅާފައިވަނީ ހެނދުނު 7 އިން ފެށިގެން ހަވީރު ފަހެއް ޖެހުމާއި ހަމައަށެވެ. އަދި ކަރަންޓީން/އައިސޮލޭޝަންގައި ތިބި ފަރާތްތަކަށް ވޯޓުލެވޭނެ ވަގުތެއްގެ ގޮތުގައި ކަނޑައަޅާފައިވަނީ ހަވީރު 5 އިން ފެށިގެން އިރުއޮއްސި ހައެއް ޖެހުމާއި ހަމައަށެވެ.
މި އިންތިޚާބުގައި ޖުމްލަ 713 ވޯޓުފޮށި ވަނީ ބަހައްޓާފައެވެ. ލޯކަލް ކައުންސިލްތަކުގެ އިންތިޚާބުގައި 2234 ކެނޑިޑޭޓުން ވާދަކުރާއިރު، އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ އިންތިޚާބުގައި 1580 ކެނޑިޑޭޓުން ވާދަކުރާނެއެވެ.
Advertisement
This content is created and paid for by advertisers and does not involve Voice Journalists