އިހުމާލުގެ ސަބަބުން މަރުވެގެންދާ ކޮންމެ މީހަކީ މަރާލެވޭ މީހެއްކަމަށް މަޝްހޫރު ދީނީ ޢިލްމުވެރިޔާ ޝައިޚް ޒަމްޒަމް ފާރިޝް ވިދާޅުވެއްޖެއެވެ.

ޒަމްޒަމް ފާރިޝް މިއަދު ކުރެއްވި ޓްވީޓެއްގައި ވިދާޅުވީ، އިހުމާލުގެ ސަބަބުން މަރުވެގެންދާ ކޮންމެ މީހަކީ މަރާލެވޭ މީހެއް ކަމަށާއި މިވަރަށް މީހުން މެރި ބަޔަކު ދިވެހި ތާރީޚަކުން ނުދެކޭ ކަމަށެވެ.

ޝައިޚްގެ ޓްވީޓު ނިސްބަތް ކޮށްފައިވަނީ އަދުގެ ސަރުކާރަށްކަމަށް ބެލެވެއެވެ. އަދި މިއީ ކޮވިޑް-19 އާއި ގުޅިގެން ރާއްޖޭގައި އެބަލީގައި މީހުން މަރުވަމުންދާ މިންވަރު އިތުރުވެފައިވާ ދުވަސްވަރެއް ކަމަށްވާތީ ކުރައްވާފައިވާ ޓްވީޓެއް ކަން ފާހަގަ ކުރެވެއެވެ.

ޝައިޚް ޒަމްޒަމް ފާރިޝް ފާހަގަ ކުރެވިފައިވަނީ، މި ސަރުކާރުގެ އެކި ކަންކަމަށް ވަރަށް ފާޅުގައި ފާޑު ވިދާޅުވަމުން ގެންދަވާ ބޭފުޅެއްގެ ގޮތުގައެވެ.

ރާއްޖޭގައި ކޮވިޑްގެ ހާލަތު ގޯސްވެ ދުވާލަކު މި ބަލީގައި ދުނިޔެ ދޫކުރާ މީހުންގެ އަދަދު ވަނީ ވަރަށް ބޮޑުތަން އިތުރު ވެފައެވެ. އެގޮތުން، މިއަދު އެކަނިވެސް މިހާތަނަށް 10 މީހަކު ވަނީ މި ބަލީގައި ނިޔާވެފައެވެ.

ގިނަ އަދަދެއްގެ މީހުން އެއް ދުވަހާއި ނިޔާވަމުން ދާއިރު ސަރުކާރުން އެންމެ އެކަށީގެންވާ ފިޔަވަޅުތަކެއް އަޅަމުން ނުގެންދާ ކަމުގެ ޝަކުވާ ޞިއްޙީ ދާއިރާގައި މަސައްކަތް ކުރަމުން ގެންދާ ފަރާތްތަކާއި އެނޫން އާންމު ފަރާތްތަކުންވެސް އަންނަނީ ކުރަމުންނެވެ.

ފޮޓޯ: އިންޓަނެޓް