ޓެރަރިޒަމްގެ އަމަލުތަކެއް ހިންގައި އައިއެސް ޖަމާއަތަށް ނިސްބަތްވާ މީހެއް ކަމަށް ތުހުމަތުކޮށް، އައްޑޫ ސިޓީން ހައްޔަރުކުރި މީހާ، ސުޕްރީމް ކޯޓުން މިދިޔަ ބުދަދުވަހު ދޫކޮށްލާފައިވަނިކޮށް އަނެއްކާވެސް ހައްޔަރުކޮށްފިއެވެ.

ފުލުހުންގެ މީޑިއާ އޮފިޝަލް މީޑިއާއަށް މަޢުލޫމާތު ދެއްވަމުން ވިދާޅުވީ، ދޫކޮށްލިތާ އެއް ދުވަސް ފަހުން ގއ. ކޮލަމާފުށި، ވިކްޓްރީ މަފްތޫހު ސައީދު އަނެއްކާވެސް ހައްޔަރުކުރީ، ކުރިން ވެސް ކުރި ތުހުމަތުތަކުގައި، މިދިޔަ ބުރާސްފަތި ދުވަހު ކަމަށެވެ.

ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް ދިން ހަމަލާއަށްފަހު ފުލުހުން ހިންގި އޮޕަރޭޝަންގައި އައްޑޫ ސިޓީން މަފްތޫހްއާއެކު ނުވަ މީހަކު ހައްޔަރުކުރިއެވެ.

އެ މީހުން ހައްޔަރުކޮށް ބަންދު ފުރަތަމަ ޖެހީ އިންޓެލިޖެންސް ރިޕޯޓެއްގެ މައްޗަށް ކަމަށްވާތީ ސުޕްރީމް ކޯޓުން އޭނާ ދޫކޮށްލީ އިންޓެލިޖެންސް ރިޕޯޓެއް ފިޔަވައި އިތުރު ހެއްކެއް ހުށަހަޅާފައި ނެތްކަމަށް ބުނެއެވެ.

ބޮޑެތި ތުހުމަތުތަކާ އެކު ހައްޔަރުކުރި މީހުންގެ މައްޗަށް ތުހުމަތުކޮށްފައި އޮތީ، ހަރުކަށި ފިކުރު ފެތުރުމަށްޓަކައި ޓެރަރިޒަމްގެ އަމަލުތަކަށް ހިތްވަރުދީ، އައިއީޑީ ހެދުމަށް ބޭނުންކުރާ ތަކެތި ގެންގުޅެ އެ ތަކެތިން ބަޔަކަށް އަދި މުދަލަށް ގެއްލުންދީފާނެ ކަމުގެ ތުހުމަތެވެ.

ދެ ފަހަރަކަށް ބަންދު އިތުރު ކުރުމަށް ފަހު އޭގެ ތެރެއިން ފަސް މީހަކު ހިތަދޫ މެޖިސްޓްރޭޓް ކޯޓުން ދޫކޮށްލިއެވެ. އެ ފަސް މީހުން ދޫކޮށްލީ ތުހުމަތުވާ މައްސަލާގައި އެމީހުންގެ ބައިވެރިވުން އޮތް ކަމަށް ހެކި ހުށަހަޅާފައި ނެތް ކަމަށް ބުނެއެވެ.

އޭގެ ތެރެއިން ސްޕްރީމް ކޯޓަށް ދިޔަ މަފްތޫހް، ސުޕްރީމް ކޯޓުގައި ފާހަގަކޮށްފައިވަނީ އިންޓެލް ރިޕޯޓްގެ އިތުރުން އެހެން ހެއްކެއް އޭނާގެ މައްޗަށް ނެތުމުން ބަންދުގައި ބަހައްޓަން ޖެހޭ ސަބަބެއް ނެތް ކަމަށެވެ.

ފޮޓޯ: އެޑިޝަން