ރާއްޖޭގެ ރަށްރަށަށް ކަރަންޓްގެ ހިދުމަތް ފޯރުކޮށްދޭ ކުންފުނިކަމުގައިވާ ފެނަކަ ކޯޕަރޭޝަނުން ފޯރުކޮށްދޭ ކަރަންޓްގެ ހިދުމަތް އަގުހެޔޮކުރުމުގެ މަސައްކަތް އެކުންފުނިން ފަށައިފިއެވެ.

އެކުންފުނިން މި މަސައްކަތް ފައްޓާފައިވާކަން އެކުންފުނީގެ މެނޭޖިންގް ޑިރެކްޓަރ އަހުމަދު ސައީދު މުހައްމަދުވެސް ވަނީ ޔަގީންކޮށްދެއްވާފައެވެ.

ރާއްޖެޓީވީގެ ފަލަސުރުޚީ ޕްރޮގްރާމްގައި ވާޙަކަފުޅު ދައްކަވަމުން ސައީދު ވިދާޅުވީ ކަރަންޓްގެ އަގުހެޔޮކުރުމަކީ ރައީސް ސޯލިހުގެ ވައުދެއްކަމަށާއި އެކަމަށް މަސައްކަތްކުރަމުންދާ ކަމަށެވެ. އަދި ސަރުކާރުގެ ސިޔާސަތުގެ ތެރެއިން ރައްޔިތުންނަށް ލުއިވާނެ ގޮތަކަށް ކަރަންޓްގެ އަގު ހެޔޮވެގެންދާނެކަމަށެވެ.

ސައީދުވަނީ ރަށްރަށުން ކަރަންޓް ކެނޑޭ މައްސަލައަކީ ބޮޑު މައްސަލައެއްގެ ގޮތުގައި ފާހަގަކުރައްވާ އެކަންތައް ހައްލުކުރުމަށް މަސައްކަތްތަކެއް ކުރެވެމުންދާކަމަށް ފާހަގަކުރައްވާފައެވެ.

އެގޮތުން ބާއިންޖީނުގެތައް އާ ތަންތަންކަމުގައި ހަދާ އެތަންތަން ހަރުދަނާކުރުމުގެ މަސައްކަތް ކުރަމުންދާކަމަށް ސައީދު ވަނީ ބުނެފައެވެ.

އަދި ފެނަކަ ކުންފުނިއަކީ ސިޔާސީ ކަންކަމުން ދުރުވެފައިވާ ކުންފުންޏަކަށް ހައްދަވާނެކަމަށްވެސް ސައީދު ވަނީ ވިދާޅުވެފައެވެ.