ކުރިއަށް އޮތް ދެތިން މަސް ތެރޭގައި ބޭހުގެ މައްސަލައަށް ދާއިމީ ހައްލެއް ލިބިގެންދާނެ ކަމުގެ ޔަގީންކަން ރައީސް ޑރ މުޙައްމަދު މުޢިއްޒު ދެއްވައިފިއެވެ.
މިނިވަންދުވަހުގެ ރަސްމިއްޔާތުގައި ބޭއްވި ޖަލްސާގައި ވާހަކަދައްކަވަމުން ބޭސް ލިބުމުގައި ދަތިތަކެއް ހުރި ކަން ފާހަގަކުރައްވައި ރައީސް މުޢިއްޒު ވަނީ އެހެން އެކަން ދިމާވި ސަބަބުގެ މައްޗަށް އަލިއަޅުވާލައްވާފައެވެ.
ބޭހުގެ މާފިޔާއެއް މިތާންގައި އޮތީ. އަޅުގަނޑުމެން މެކްސިމަމް ރީޓެއިލް ޕްރައިޒެއް ކަނޑައެޅީ، ރައްޔިތުންގެ ފައިސާއިން، އާސަންދައިގެ ތެރެއިން ބޭހުގެ ބައެއް ބާވަތްތަކަށް، 2000 ޕަސެންޓަށްވުރެ ބޮޑު ޕްރޮފިޓެއް ނަގަމުންދިޔައީ އަމިއްލަ ފަރާތްތަކުން. މި މާފިޔާއަށް. މި ވޭސްޓޭޖު، މި ލީކޭޖު، ރައްޔިތުންގެ ހައްގުގައި އަޅުގަނޑުމެން ނިމުމަކަށް ގެނައީ. އޭގެ ސަބަބުން ކޮންމެ އަހަރަކު 500 އެތައް މިލިއަން ރުފިޔާއެއް ސަލާމަތް ކުރެވޭ.
ރައީސް ޑރ މުޙައްމަދު މުޢިއްޒު
ރައީސް ވިދާޅުވީ، ބޭހުގެ އަގު ކޮންޓްރޯލް ކުރުމަށް ސަރުކާރުން އެޅި ފިޔަވަޅުތަކުގެ ބަދަލެއްގެ ގޮތުން، ރައްޔޮތުން ހާލުގައި ޖެއްސުމަށް ބައެއް ފަރާތްތަކުން ކުރި މަސައްކަތުގެ ސަބަބުން ބޭސް ލިބުމަށް ދަތިތަކާ ކުރިމަތިލާން ޖެހުނީ ކަމަށެވެ.
އެހެންކަމުން، އެ މައްސަލަ ހައްލުކުރުމަށް، ސްޓޭޓްފާމާ އުފައްދައި ސަރުކާރުގެ ތެރެއިން ބޭސް ލިބުމުގެ ދަތިތަކަށް ހައްލު ހޯދުމުގެ މަސައްކަތް ފައްޓަވާފައިވާ ކަމަށާ ކުރިއަށް އޮތް ދެތިން މަހެއްހާ ދުވަހުގެ ތެރޭ ބޭހުގެ މައްސަލައަށް ދާއިމީ ހައްލެއް ލިބޭނެ ކަމަށް ރައީސް ވިދާޅުވިއެވެ.
”އެދަނީ ފަހަރަކު ފިޔަވަޅެއް އަޅަމުން އަޅަމުން، އަޅުގަނޑުމެންގެ ވަރަށް ބޮޑު އުއްމީދެއް އަދި ޔަގީންކަމެއް، ކުރިއަށް އޮތް ދެތިން މަހެއްގެ ތެރޭގައި ފެނިގެންދާނީ، ބޭހުގެ މި ދިމާވެގެން އުޅޭ މައްސަލައަށް ދާއިމީ ހައްލެއް ގެނެވި، ރައްޔިތުން މިކަމުގައި އެއްވެސް ވަރަކަށް ކަންބޮޑުވާން ނުޖެހޭ ގޮތަށް ބޭހުގެ މައްސަލަ އެއްކޮށް ހައްލުވެގެންދާނެ. އެކަން އަޅުގަނޑުމެން ހާސިލް ކޮށްދޭނަން. އެ ޔަގީންކަން އަޅުގަނޑުމެން އަރުވަން“ ރައީސް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
