ދައުލަތް ޒިންމާވާ ގޮތަށް ލޯނު ނަގާއިރު ރައްޔިތުންގެ ރުހުން ހޯދުމަށް ދައުލަތުގެ މާލިއްޔަތު ގާނޫނަށް އިސްލާހު ހުށައެޅީ ދައުލަތުގެ އަތް ބަނުމަށްކަމަށް ރައްޔިތުންގެ މަޖިލީހުގެ ވިލިނގިލީ ދާއިރާގެ މެމްބަރު ސައުދު ހުސެއިން ވިދާޅުވެއްޖެއެވެ.
މާލިއްޔަތު ގާނޫނަށް ހުށައަޅާފައިވާ އިސްލާހާއި ގުޅޭގޮތުން މަޖިލީހުގައި ވާހަކަދައްކަވަމުން ސައުދު ވިދާޅުވީ، ގައުމު މިއޮތް ހާލަތުން ނަގައިގަތުމަށް ގިނަ މަސައްކަތްތަކެއް ކުރަން ޖެހިފައިވާކަމަށެވެ. އަދި މި ދަނޑިވަޅަކީ މާލިއްޔަތު ގާނޫނަށް އިސްލާހު ގެނައުމަށް އެންމެ މުނާސަބު ވަގުތުކަމަށް ގަބޫލުފުޅު ނުކުރައްވާކަމަށް އޭނާ ވިދާޅުވިއެވެ.
އޭގެ އިތުރުން މިހާރު ހުށައަޅާފައިވާ އިސްލާހަކީ ގައުމު ހަމަމަށް އެޅުމަށް ސަރުކާރުން މަސައްކަތްކުރުމަށް ހުރަސްއަޅާ ދައުލަތުގެ އަތް ބަނުމަށް ހުށައަޅާފައިވާ އިސްލާހެއްގެ ގޮތުގައި އޭނާ ސިފަކުރެއްވިއެވެ.
"މި އިސްލާހަކީ މި ވަގުތަށް ބަލައިގަންނަން އެހާ މުހިންމު އިސްލާހެއް ނޫން. މިހެން މި ދެންނެވީ ގައުމު މި އޮތް ހާލަތުން އަރައިގަތުމަށްޓަކައި ކުރަން ޖެހޭ މަސައްކަތް ވަރަށް ގިނަ. މިއަދު މިހާލަތުން އަރައިގަތުމުގެ މަސައްކަތުގައި ދައުލަތުގެ އަތް ބަނދެ ކަންކަން ނުކުރެވޭ ހާލަތަށް ދައުލަތް ގެންދުމަށްޓަކައި މިފަދަ އިސްލާތުގައް ހުށައަޅައިގެން ކަންކަން ކުރުމަކީ އަސްލު ސަރުކާރު ހުއްޓުވަން ކުރަމުންދާ މަސައްކަތް" ސައުދު ވިދާޅުވިއެވެ.
ސައުދު އިތުރަށް ވިދާޅުވީ ރައްޔިތުންނަށް ދޭން ޖެހިފައި ހުރި ޚިދުމްތަކާއި ރައްޔިތުންގެ ބޭނުންތައް ވަރަށް ގިނަ ކަމަށެވެ. އެދި އެކަންކަން ފުއްދުމަށްޓަކައި ސަރުކާރުން ލޯނު ނަގަން ޖެހޭނެކަމަށެވެ. އަދި ދައުލަތުގެ މާލީ ހާލަތާއި ގުޅޭގޮތުން ރައީސުލް ޖުމްހޫރިއްޔާއާއި ފިނޭންސް މިނިސްޓަރު އަބަދުވެސް މައުލޫމާތު ހިއްސާކުރައްވަމުން ގެންދަވާކަމަށް އޭނާ ވިދާޅުވިއެވެ.
އެއާއެކު ސައުދު ވިދާޅުވީ ލޯނު ނެގުމަށް ސަރުކާރަށް ލިބިފައިވާ ބާރުގައި މަޖިލީހުން ތަޅިއަޅުވަން ނުޖެހޭކަމަށެވެ. މަޖިލީހުގެ ރުހުން ނުލިބިގެން ލޯނު ނަގައިގެން ކުރަން ޖެހޭ ކަންކަން މަޑުޖެހިފައި އޮތުމަކީ ރައްޔިތުންނަށް މާ ބޮޑެތި ގެއްލުންތައް ވާނެ ކަމެއްކަމަށް ސައުދު ވިދާޅުވިއެވެ. އަދި މިހާރު ހުށައަޅާފައިވާ އިސްލާހަށް ތާއީދު ނުކުރައްވާކަންވެސް އޭނާ ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
