ފުލުހުންނަށް ޚާއްސަކޮށްގެން ހުޅުމާލޭގައި އިމާރާތް ކުރަމުން އަންނަ ފްލެޓުތަކުގެ މަސައްކަތާއި ގުޅިގެން ޕްލޭނިން މިނިސްޓަރު މުހައްމަދު އަސްލަމާއި ކުރި ސުވާލަށް މިނިސްޓަރު ޖަވާބެއް ނުދެއްވިއެވެ.
މިއަދު ކުރިއަށް ދިޔަ ރައްޔިތުންގެ މަޖިލީހުގެ ޖަލްސާއަށް ޕްލޭނިން މިނިސްޓަރު ހާޒިރުކޮށް މެމްބަރުން ވަނީ ރާއްޖޭގައި ކުރިއަށް ދާ މަޝްރުއުތަކުގެ ކުރިއެރުންތަކާއި، އަދި ވައުދުވެފައިވާ މަޝްރޫއުތަކާއި ގުޅޭގޮތުން ގިނ ސުވާލުތަކެއް ކުރައްވާފައެވެ.
އެގޮތުން ރައްޔިތުންގެ މަޖިލީހުގެ ދާންދޫ ދާއިރާގެ މެމްބަރު ޔައުގޫބު އަބްދުﷲ ވަނީ ފްލުހުންގެ ފްލެޓުތަކުގެ މަސައްކަތް ނިމި އެ ފަރާތްތަކަށް ފްލެޓުތައް ހަވާލުކުރެވޭނީ ކިހާ ހިސާބަކު ތޯ އައްސަވާ މިނިސްޓަރާއި ސުވާލުކުރައްވާފައެވެ.
ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން އަޅަމުންދާ ފްލެޓުތަކަށް ކިހާ އަވަހަކަށް، މި އަންނަ އަހަރުގެ ކިހާ ހިސާބެއްގައި މީހުންނަށް ވަދެވޭވަރު ވާނެ ތޯ؟ އަނެއްކަމަކީ ފުލުހުންނަށް ސިފައިންނަށް އަޅަމުންދާ ފްލެޓުތަކުގެ މަސައްކަތް ކިހާ ތާކަށް ނިންމާލެވޭނެތޯ؟ މެމްބަރު ޔައުގޫބު އެއްސެވިއެވެ.
މިނިސްޓަރު ޖަވާބު އެރުވީ އެ ސުވާލުގެ ފުރަތަމަ ބަޔަށެވެ.
އެގޮތުން ސަރުކާރުން އަޅާ ފްލެޓުތައް ނިންމާލެވޭނެ ވަކި ތަރީހެއް ދަންނަވަން އުނދަގޫކަމަށް މިނިސްޓަރު ވިދާޅުވިއެވެ.
އެއަށްފަހު ފްލުހުންގެ ފެލްޓުތަކާއި ގުޅިގެން ކުރެއްވި ސުވާލަށް ޖަވާބު ނުދެއްވާ މިނިސްޓަރު ވަނީ ވާހަކަފުޅު ކުރުކޮށްލައްވާފައެވެ.
އެ ސުވާލަށް މިނިސްޓަރު ޖަވާބުދެއްވާފައި ނުވި ނަމަވެސް ފުލުހުންނަށް ޚާއްސަކޮށްގެން ހުޅުމާލޭގައި އަޅާ ފްލެޓުތަކުގެ މަސައްކަތް މިއަހަރު ނިމުމުގެ ކުރިން ނިންމާނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވަނީ ވިދާޅުވެފައެވެ.
ފުލުހުންގެ ފްލެޓުތައް ނުވަތަ "ބްލޫ ހައުސިން" މަޝްރޫއަކީ މީގެ ހަތް އަހަރު ކުރިން ފެށި މަޝްރޫއެކެވެ. އެ މަޝްރޫއުގެ ދަށުން 300 ފްލެޓު އުޅުމަށް ވަނީ ނިންމާފައެވެ. އަދި މި ފްލެޓުތައް ލިބޭނެ ފަރާތްތައްވެސް އޮތީ 2013 ވަނަ އަހަރު ކަނޑައަޅާ ނިންމާފައެވެ.
Advertisement
This content is created and paid for by advertisers and does not involve Voice Journalists
