ސަރުކާރުން ފަށާފައިވާ ބޯހިޔާވަހިކަމުގެ މަޝްރޫއުގެ ދަށުން އަންނަ އަހަރުތެރޭގައި ނިންމާލެވޭނީ ކިތަށް ހައުސިން ޔުނިޓުކަން ދަންނަވަން އެނގިވަޑައިނުގަންނަވާކަމަށް ޕްލޭނިން މިނިސްޓަރު މުހައްމަދު އަސްލަމް ވިދާޅުވެއްޖެއެވެ.

އަސްލަމް މިފަދައިން ވިދާޅުވެފައިވަނީ ސަރުކާރުގެ ބޯހިޔާވަހިކަމުގެ މަޝްރޫއާއި ގުޅޭގޮތުން ރައްޔިތުންގެ މަޖިލީހުގެ ދާންދޫ ދާއިރާގެ މެމްބަރު ޔައުގޫބު އަބްދުﷲ ކުރެއްވި ސުވާލަކަށް ޖަވާބުދެއްވަމުންނެވެ.

"ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން އަޅަމުންދާ ފްލެޓުތަކަށް ކިހާ އަވަހަކަށް، މި އަންނަ އަހަރުގެ ކިހާ ހިސާބެއްގައި މީހުންނަށް ވަދެވޭވަރު ވާނެ ތޯ؟" ޔައުގޫބު އެއްސެވިއެވެ.

Advertisement

ސުވާލަށް ޖަވާބުދެއްވަމުން މިނިސްޓަރު ވިދާޅުވީ 2023 ވަނަ އަހަރު ނިންމާލެވޭނީ ކިތައް ފެލްޓުކަން ދަންނަވަން އެނގިނުލައްވާކަމަށެވެ.

"ސަރުކާރުން އަޅަމުން ގެންދާ ބޯހިޔާވަހިކަމުގެ މަޝްރުއުގެ ތެރެއިން ސީދާ ނިމޭނީ މިވެނި އަދަދެކޭ މިތާ ހުރެ އަޅުގަނޑަކަށް ދަންނަވާކަށް ނޭނގޭ. ބާރަށް މަސައްކަތްދާ ބައެއް ތަންތަން އެބަހުރި. ބައެއް ޔުނިޓުތައް ތަންކޮޅެއް ސްލޯކޮށް ހުރި ތަންތަންވެސް އެބަހުރި. އެހެންވީމާ ހަމަ ސީދާ މިހާ އަދަދަކަށް މީހުންނަށް ވަދެވޭނެ އޭ ދަންނަވާކަށް އަޅުގަނޑަކަށް ނޭނގޭ." އަސްލަމް ވިދާޅުވިއެވެ.

އޭގެ އިތުރުން ފުލުހުންނާއި ސިފައިންނަށް ޚާއްސަކޮށްގެން ހަދަމުންދާ ފްލެޓުތައް ނިމޭނެ ތާރީޚާއި ގުޅޭގޮތުން ކުރެއްވި ސުވާލަށްވެސް މިނިސްޓަރު ޖަވާބުދެއްވާފައެއް ނުވެއެވެ.

ބޯހިޔާވަހިކަން ކަށަވަރުކޮށްދިނުމަށް ދައުރު ނިމެންވާއިރަށް 20000 ހައުސިން ޔުނިޓު އަޅުއްވާނެކަމަށް ރައީސުލޖުމްހޫރިއްޔާ އިބްރާހިމް މުހައްމަދު ސޯލިހު ވަނީ ވައުދުވެވަޑައިގެންފައެވެ.

އެހެން ނަމަވެސް މިހާތަނަށް އެމަނިކުފާނުގެ ވައުދު ފުއްދެވުމަށް އެއްވެސް މަޝްރޫއެއް ނިންމާދެވިފައި ނުވާކަން ފާހަގަކޮށްލެވެއެވެ.