Advertisement

"ހޭންޑް ޕިކް" ކޮށްގެން ބޯހިޔާވަހިކަން ދިނުމަކީ ސަރުކާރަށް އޮތް އިޚްތިޔާރެއް ނޫން: ސައީދު

24 Aug 2022 | 17:49
މެމްބަރު ސައީދު މަޖިލީހުގައި ވާހަކަދައްކަވަނީ.... ފޮޓޯ: މަޖިލިސް

"ހޭންޑް ޕިކް" ކޮށްގެން ނުވަތަ ހޮވައިގެން ވަކި ބަޔަކަށް ބޯހިޔާވަހިކަން ދިނުމަކީ ސަރުކާރަށް އޮތް އިޚްތިޔާރެއް ނޫންކަމަށް ރައްޔިތުންގެ މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދު ވިދާޅުވެއްޖެއެވެ. 

ސައީދު މިފަދައިން ވިދާޅުވެފައިވަނީ މާލޭގެ ރައްޔިތުންނަށް ހިލޭ ގޯތި ދޫކުރުމަކީ އަތޮޅުތެރޭގެ ރައްޔިތުން ކަންބޮޑުވާން ޖެހޭ ކަމެއް ނޫންކަމަށް ވިދާޅުވެ ޕްލޭނިން މިނިސްޓަރު މުހައްމަދު އަސްލަމް ދެއްކެވި ވާހަކަތަކަށް، މަޖިލީހުގެ ރައްދުދެއްވަމުންނެވެ. 

ސައީދު ވިދާޅުވީ މިއަދުވެސް ލޭންޑް ޔޫސް ޕްލޭނެއް ހަދައިގެން ނޫނީ އަތޮޅުތެރޭގެ ރައްޔިތުންނަށް ގޯތި ނުލިބޭ ކަމަށާއި، އެ ޕްލޭން ނެހެދި އޮތުމުގެ ސަބަބުން އެތައް ރައްޔިތުންނެއް ގޯތީގެ އިންތިޒާރުގައި ތިބިކަމަށެވެ.

Advertisement

އެހެން ނަމަވެސް މާލެ ސަރަހައްދުން ގޯތި ދޫކުރުމަށް ލޭންޑް ޔޫސް ޕްލޭނެއް ހަދަންވެސް ނުޖެހޭކަން އޭނާ ފާހަގަކުރެއްވިއެވެ. 

"ޕްލޭނިން މިނިސްޓަރު އަރިހުން އަހާލަން ބޭނުން ކާކު ބުނެގެން ތޯ ލޭންޑް ޔޫސް ޕްލޭން ކިޔާ އެއްޗެއް ރާއްޖެ ތެރެއަށް އައިސްގެން މި އުޅެނީ. ލޭންޑް ޔޫސް ޕްލޭން ހަދަން ޖެހޭތޯ؟ ރާއްޖޭގެ އަތޮޅެއްގެ ރަށެއް ވީމަ ލޭންޑް ޔޫސް ޕްލޭން. މާލޭގައި ކޮން ލޭންޑް ޔޫސް ޕްލޭނެއްތޯ ހަދާފައި އޮތީ؟ ވަރަށް ގިނަ ރަށްރަށް އެބަހުރި ހިއްކާފަ. އެހެން ނަމަވެސް ރަށްރަށުގެ ނިކަމެތި ރައްޔިތުން އެ ތިބެނީ ގޯއްޗެއް ނުލިބިފަ ލޭންޑް ޔޫސް ޕްލޭން ނުނިމިގެން" ސައީދު ވިދާޅުވިއެވެ. 

އެއާއެކު ސައީދު ވިދާޅުވީ މާލެއަށް މީހުން އައުމަށް މަޖުބޫރު ކުރުވި ހާލަތު އުފައްދާފައިވަނީ އެކި ސަރުކާރުތަކުންކަމަށާއި، މާލެއާއި އަތޮޅުތެރެ އަޅާ ކިޔުއްވާއިރު މާލެ ފަދަ ސަރހައްދުތަކެއް މިހާތަނަށް އައިރު އަތޮޅުތެރޭގައި ގާއިމްކޮށްދެއްވިފައިވެސް ނުވާކަމަށެވެ. 

"އަތޮޅުތަކުގެ މީހުން މި މާލެއަށް ޖަމާވީ، މީ ކާކު ބުނެގެން ކުރި ކަމެއްތޯ؟ ކުޑަ ސިޓީ ހައްދައިގެން މާލެއަށް ގެނައީ ރައްޔިތުން ބުނެގެނެއް ނޫނޭ. ރައްޔިތުން ބުނެގެނެއް ނޫނޭ މާލެ ތަރައްގީ ކުރީ. އެހެން ކަމަށް ވަންޏާ އައްޑޫ ސިޓީ ފުވައްމުލަށް ހުވަދޫ، ލާމު، މިހެން ގޮސް ހަތަރު އަތޮޅުން ހަތަރު އަތޮޅުން ސޮވެރެއިން ގެރެންޓީ ދީގެން މާލެ ތަކެއް ބިލްޑު ކުރަން ވީ ނޫން ތޯ؟" ސައީދު ވިދާޅުވިއެވެ. 

މާލެ ސަރަހައްދުން ހިލޭ ގޯތި ދޫކުރާ އުސޫލަށް ކުރީގެ އިކޮނިމޮކް މިނިސްޓަރުކަންވެސް ކުރައްވާފައިވާ ސައީދު ވަނީ ގިނަ ފާޑުކިޔުންތަކެއް އަމާޒުކުރައްވާފައެވެ. 

އެގޮތުން އޭނާ ވިދާޅުވީ ސަރުކާރުން އަބަދުވެސް ދައްކަނީ ބިންކޮޅު މަދު ވާހަކައާއި، އާބާދީއާއި އެއްވަރަށް ގޯތި ދިނުމަށް ބިން ނެތް ވާހަކަކަމަށެވެ.

އެހެންކަމަށް ވާނަމަ މި ހާލަތުގައި ރައްޔިތުންނަށް އެންމެ ފައިދާ ބޮޑު ގޮތަކަށް ވާނީ ހޮވާލެވޭ ވަކި ބަޔަކަށް ގޯތި ދޫކުރުން ތޯ ނުވަތަ ފްލެޓުތައް އަޅާ ގިނަ ބަޔަކަށް ފްލެޓުތައް ދިނުންތޯ ސައީދު ސުވާލުކުރެއްވިއެވެ. 

"ރައްޔިތުންނަށް ޗޮއިސްއެއް އޮތިއްޔާ ބޯހިޔާވަހިކަން ނުހޯދާނީ ކާކުތޯ؟ ދައްކާހާވެސް ވާހަކައަކީ ރާއްޖޭގެ ބިމުގެ ތަނަވަސްކަމެއް ނެތޭ ރާއްޖޭގެ އާބާދީ ބިޔަވެގެން އަންނަ ނިސްބަތަށް ބަލާއިރު، އެހެންވެއްޖެ ކަމަށްވަންޏާ ބޮޑެތި ގޯތި ތޯ ދޫކުރަންވީ ފްލެޓު އަޅައިގެން ގިނަ ރައްޔިތުންނަށް ގެ މަންފާއެއް ކުރާނެ ގޮތަށް މި ކަން ކުރާނީތޯ؟ ސައީދު ސުވާލުކުރެއްވިއެވެ. 

އެކަންކަން ފާހަގަކުރައްވާ ސައީދު ވިދާޅުވީ ބޯހިޔާވަހިކަމުގެ ހައްގަކީ އަސާސީ ހައްގަކަށްވާއިރު، އެފަދަ މަޝްރޫއުތައް ހިންގަން ވާނީ މުސްތަގުބަލުގައި ކޮންމެ މީހަކަށްވެސް އެ ހައްގު ކަށަވަރުވާނެގޮތަށް ބަލައިގެންކަމަށެވެ. އަދި ހޮވާލެވޭ ވަކި ބަޔަކަށް ބޯހިޔާވަހިކަން ފޯރުކޮށްދިނުމަކީ ސަރުކާރަށް ލިބިގެންވާ އިޚްތިޔާރެއް ނޫންކަމަށް އޭނާ ވިދާޅުވިއެވެ. 

Advertisement

ކޮމެންޓް