މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ތަހުގީގު ކުރުމަށް ރައީސް އިބްރާހިމް މުހައްމަދު ޞާލިހް އުފެއްދެވި ކޮމިޝަނަށް ސީނިއާ އެޑްމިނިސްޓްރޭޓިވް އޮފިސަރެެއް ހޯދުމަށް އިއުލާނު ކޮށްފި އެވެ.
ރައީސް އޮފީހުން ކުރި އިއުލާނުގައި ބުނީ، ކޮންޓްރެކްޓެ އުސޫލުން އަދާކުރާ މި ވަޒީފާގެ އަސާސީ މުސާރައަަކީ 6،295 ރުފިޔާ ކަމަށެވެ. އަދި އޭގެ އިތުރުން، ސާވިސް އެލަވަންސްގެ ގޮތުގައި 2،000 ރުފިޔާ، ލިވިން އެލަވަންސްގެ ގޮތުގައި 2،500 ރުފިޔާ ލިބޭއިރު ހާއްސަ އެލަވަންސްގެ ގޮތުގައި މުސާރައިގެ 45 ޕަސެންޓް ލިބޭނެ ކަންވަނީ ފާހަގަކޮށްފައެވެ. އެއީ 2،832.75 ރުފިޔާއެވެ.  
މި މަގާމަށް ކުރިމަތިލާ ފަރާތަކީ، މަގާމުގެ މަސައްކަތް ކުރުމުގެ ހުނަރު/ޤާބިލްކަން ސާބިތުކޮށްދިނުމާއެކު، މަގާމަށް ބޭނުންވާ ދާއިރާއިން ދިވެހިރާއްޖޭގެ ޤައުމީ ސަނަދުތަކުގެ އޮނިގަނޑުގެލެވެލް 4 (ސެޓްފިކެޓް 4) ގެ ސަނަދެއް ޙާޞިލުކޮށްފައިވުމާއެކު މަގާމުގެ މަސައްކަތާ ގުޅޭ ދާއިރާއެއްގައި 6 އަހަރު ދުވަހުގެ މަސައްކަތުގެ ތަޖުރިބާ ލިބިފައިވާ ފަރާތްތަކަށް ވާންޖެހެއެވެ.
ނުވަތަ، މަގާމުގެ މަސައްކަތް ކުރުމުގެ ހުނަރު/ ޤާބިލުކަން ސާބިތުކޮށްދިނުމާއެކު، މަގާމަށް ބޭނުންވާ ދާއިރާއަކުން ދިވެހިރާއްޖޭގެ ޤައުމީ ސަނަދުތަކުގެ އޮނިގަނޑުގެ ލެވެލް 5 (ޑިޕްލޮމާ) ނުވަތަ ލެވެލް 6 (ޕްރޮފެޝަނަލް ސެޓްފިކެޓް/ އެޑްވާންސްޑް ޑިޕްލޮމާ/ އެސޯސިއޭޓް ޑިގްރީ/ ފައުންޑޭޝަން ޑިގްރީ) ގެ ސަނަދެއް ޙާޞިލުކޮށްފައިވުމާއެކު މަގާމުގެ މަސައްކަތާ ގުޅޭ ދާއިރާއެއްގައި 3 އަހަރު ދުވަހުގެ މަސައްކަތުގެ ތަޖުރިބާ ލިބިފައިވާންޖެހެއެވެ. 
އެ ޝަރުތުތައް ފުރިހަމަ ނުވާ ނަމަ، އެފާރަތަކީ މަގާމުގެ މަސައްކަތް ކުރުމުގެ ހުނަރު/ ޤާބިލުކަން ސާބިތުކޮށްދިނުމާއެކު، މަގާމަށް ބޭނުންވާ ދާއިރާއަކުން ދިވެހިރާއްޖޭގެ ޤައުމީ ސަނަދުތަކުގެ އޮނިގަނޑުގެ ލެވެލް 7 (ބެޗްލަރސް ޑިގްރީ/ ޕްރޮފެޝަނަލް ސެޓްފިކެޓް/ ޕްރޮފެޝަނަލް ޑިޕްލޮމާ) ނުވަތަ ލެވެލް 8 (ގްރެޖުއޭޓް/ ޕޯސްޓް ގްރެޖުއޭޓް ސެޓްފިކެޓް/ ގްރެޖުއޭޓް/ ޕޯސްޓް ގްރެޖުއޭޓް ޑިޕްލޮމާ/ ބެޗްލަރސް ޑިގްރީ ވިތް އޮނަރސް) ގެ ސަނަދެއް ޙާޞިލުކޮށްފައިވާ ފަރާތަކަށް ވާންޖެހެއެވެ.
އަދި މީގެ އިތުރުން، އަމިއްލައަށް މަސައްކަތްތައް ރާވާ ހިންގުމުގެ ގާބިލުކަން ހުރި / މުވައްޒަފުންނާ ގުޅިގެން ޓީމެއްގެ ގޮތުގައި މަސައްކަތް ކުރުމުގެ ގާބިލްކަން ހުރުމާއި ފަރިތަކަމާއެކު ދިވެހި އަދި އިނގިރޭސި ބަހުން ވާހަކަ ދެއްކުމާއި ލިޔުމުގެ ގާބިލުކަން ހުރި އަދި މައިކްރޮސޮފްޓް އޮފީސްގެ ޕްރޮގްރާމުތައް ބޭނުން ކުރުމުގެ ގާބިލްކަން ހުރި މީހަކަށް އިސްކަން ދެވޭނެ ކަމަށްވެސް އިއުލާންގައި ބުނެފައިވެއެވެ.
ރައީސް އޮފީހުން ވަނީ މަގާމަށް ޝަރުތު ފުރިހަމަވާ މީހުން ރައީސުލްޖުމްހޫރިއްޔާގެ އޮފީހުގެ ވަޒީފާއަށް އެދޭ މީހުން ފުރިހަމަކުރާ މައުލޫމާތު ފޯމާއެކު މި މަހުގެ 31 ގެ ކުރީން ހުށައެޅުމަށް އެދިފައެވެ.