މި އަހަރުގެ ޒުވާނުންގެ އިނާމަށް ނަން ހުށަހެޅުމުގެ ފުރުސަތު ޔޫތު މިނިސްޓްރީން ހުޅުވާލައިފިއެވެ.

މި އަހަރުގެ ޒުވާނުންގެ ޤައުމީ އިނާމަން ނަން ހުށަހެޅުމުގެ ފުރުސަތު ހުޅުވާލައި، އެ އިނާމާ ގުޅޭ ތަފުސީލްތަކާއި، މާކްސް ދޭނެ ގޮތުގެ ތަފްސީލް ގެޒެޓްގައި ވާއިރު، އިނާމަށް ނަން ހުށަހެޅުމުގެ ފުރުސަތު ހުޅުވާލެވިފައިވަނީ އަންނަ ސެޕްޓެމްބަރު މަހުގެ 29 ވާ ބުރަސްފަތި ދުވަހުގެ 13:00 އާ ހަމައަށެވެ.

މިދިޔަ އަހަރު ޒުވާނުންގެ އިނާމު 10 ދާއިރާއަކުން 10 މީހަކަށް ދީފައިވާއިރު މި އަހަރު ޒުވާނުންގެ އެވޯޑުގެ ގޮތުގައި ތަފާތު 18 ދާއިރާއަކުން އިނާމު ދިނުމަށް ވަނީ ކަނޑައެޅިފައެވެ.

އެވޯޑް ދޭން ނިންމާފައިވާ ދާއިރާތައް:

- ވިޔަފާރި އާއި އިގުތިސާދު

- އާޓް: ފަންނުވެރި ޒުވާނާ

- މަސްތުވާތަކެއްޗާ ދެކޮޅަށް މަސައްކަތްކުރުން

- ސިއްހީ ނުރަނގަޅު އާދަތަކާއި ދެކޮޅަށް މަސައްކަތްކުރުން

- ކުޅިވަރަށް ހިދުމަތްކުރުން

- ދަރުމަވެރިކަން

- ވޮކޭޝަނަލް ޓްރެއިނިން-ދަސްކޮށްދިނުން

- ނަފްސާނީ ދުޅަހެޔޮ ސިއްޙަތެއް ބިނާ ކުރުމަށް މަސައްކަތްކުރުން

- ތިމާވެށި ހިމާޔަތް ކުރުމަށް މަސައްކަތް ކުރުން

- މަސްވެރިކަމުގެ ދާއިރާ

- ދަނޑުވެރިކަމުގެ ދާއިރާ

- މިންތީގެ ހަމަހަމަކަން ގާއިމް ކުރުމަށް މަސައްކަތްކުރުން

- ނުކުޅެދުންތެރިކަން ހުންނަ ފަރާތްތަކުގެ ބާރުވެރިކަން އިތުރު ކުރުމަށް މަސައްކަތްކުރުން

- ޒުވާނުންގެ ބާރުވެރިކަން އިތުރުކުރުމަށް މަސައްކަތްކުރުން

- ހަށިހެޔޮ ދުޅަހެޔޮ ސިއްޙަތެއް ބިނާކުރުމަށް މަސައްކަތްކުރުން

- ދިވެހިބަހާއި ސަގާފަތަށް ހިދުމަތްކުރުން

- ޝަހީދު ޖަވާދު ޢުމަރުގެ ހަނދާނީފިލާ

- ނޭޝަނަލް ޔޫތު ވޮލަންޓިއަ
ޒުވާނުންގެ އިނާމަކީ ތަފާތު ދާއިރާތަކުން ޤައުމުގެ ތަރައްޤީއަށް ފާހަގަކޮށްލެވޭ ޚިދުމަތްތަކެއް ކުރާ ޒުވާނުންގެ އަގުވަޒަންކޮށް, ހިތްވަރު ދިނުމުގެ ގޮތުން ދޭ އިނާމެކެވެ. ޒުވާނުންގެ ދުވަސް ފާހަގަ ކުރުމަށް ހަމަޖެހިފައިވަނީ މި އަންނަ އޮކްޓޯބަރު 22 ގައެވެ.
ޤައުމީ ފެންވަރުގައި ރާއްޖެއިން ޒުވާނުންގެ ދުވަހެއް ފާހަގަކުރެއްވުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ނިންމެވީ 2019 ވަނަ އަހަރުގެ ޑިސެމްބަރު މަހުއެވެ.