ހދ. ނޮޅިވަރަންފަރުގައި އުނދުނުން ގޭސް ލީކުވެގެން ހިނގައިދިޔަ ހާދިސާއެއްގައި އެ ގޭގައި ދިރިއުޅެމުން އައި އަންހެނަކާއި އޭނާގެ ކުޑަ ދަރިފުޅަށް އަނިޔާވެއްޖެއެވެ.
ނޮޅިވަރަންފަރު ކައުންސިލްގެ މެންބަރު އަމީނާ މުހައްމަދު "ވޮއިސް" އަށް މައުލޫމާތު ދެއްވި ގޮތުގައި، މިއަދު ހެނދުނު ހިނގައިދިޔަ އެ ހާދިސާ ހިނގާފައިވަނީ ގޭސް ފުޅި ލީކުވެފައި ހުއްޓައި އުނދުން ޖެއްސުމުންނެވެ.
"ބަދިގޭގައި ހުންނަ ގޭސް އުނދުނުން ކޮންމެ ވެސް ވަރަކަށް ލީކުވެފައި ހުއްޓާ އުނދުން ޖައްސާލެވުނީ. އެ ގަޑީ އުނދުނުން "ޕޮއް" ކިޔާފައި އަލިފާން އެރީ. އަނެންހެން ތަނަކު ރޯވެ ހުޅުހިފައި، އެފަދަ ކަމެއް ނުވޭ." ކައުންސިލްގެ މެންބަރު މައުލޫމާތު ދެއްވި އެވެ.
މި ހާދިސާގައި އަނިޔާވެފައި ވަނީ އެ ގޭގައި ދިރިއުޅޭ އަންހެން މީހާ އާއި އޭނާގެ ދެ އަހަރުގެ ކުޑަ ދަރިފުޅަށް ކަމަށާ، އެ ދެމީހުންނަށްވެސް މިވަގުތު ކުޅުދުއްފުށި ސިޓީއަށް ގެންގޮސް، ކުޅުދުއްފުށީ ރީޖަނަލް ހޮސްޕިޓަލްގައި ފަރުވާ ދެމުން އަންނަ ކަމަށް އަމީނާ ވިދާޅުވި އެވެ.
މީގެ އިތުރުން އަމީނާ ވިދާޅުވީ، އަނިޔާވި ދެމައިންގެ ހާލު ވެސް ރަނގަޅު ކަމަށާ، އަދި މި ހާދިސާ އާއި ގުޅިގެން އިތުރު މާބޮޑު ގެއްލުމެއް އެ ގެއަށް ލިބިފައި ނުވާކަމަށެވެ.
ނޮޅިވަރަންފަރުގައި ގޭސްފުޅި ލީކުވެގެން އަލިފާނުގެ ހާދިސާއެއް ހިނގިއިރު، ގދ. ރަތަފަންދޫގައި ވެސް ގޭސްފުޅިއެއް ގޮވައިގެން މިމަހު ތެރޭގައި އަލިފާނުގެ ހާދިސާއެއް ވަނީ ހިނގާފައެވެ. އެ ހާދިސާގައި އަނިޔާވި 53 އަަހަރުގެ އަންހެން މީހާ މާލޭގައި ފަރުވާ ދެމުން ދަނިކޮށް މި މަހު 20 ވަނަ ދުވަހު ވަނީ ނިޔާވެފައެވެ.
Advertisement
This content is created and paid for by advertisers and does not involve Voice Journalists
