ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ މި ސަރުކާރަކީ ހަމައެކަނި ބިންގާ އަޅާފައި ދޫކޮށްލާ ސަރުކާރެއް ނޫންކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.

މ. ދިއްގަރު ގޮނޑުދޮށް ހިމާޔަތްކުރުމުގެ މަސައްކަތް ނިންމުމުގެ ގޮތުން އިއްޔެ އެ ރަށުގައި ބޭއްވި ރަސްމިއްޔާތެއްގައި ވާހަކަދައްކަވަމުން އާޒިމް ވިދާޅުވީ، މި ސަރުކާރަކީ ވައުދެއް ވުމަށްފަހު އެ ވައުދު ނުފުއްދައި ދޫކޮށްލާ ސަރުކާރެއް ނޫންކަމަށެވެ. އަދި އަދިގެ ސަރުކާރަކީ ވައުދުތައް ފުއްދަމުގައި ފާއިތުވެދިޔަ އެހެން ސަރުކާރުތަކާއި ނުބައްދަލު، އެ ސަރުކާރުތަކަށްވުރެ މާ ކާމިޔާބު ސަރުކާރެއް ކަމަށްވެސް ވިދާޅުވިއެވެ.

"މި ސަރުކާރަކީ ހަމައެކަނި ބިންގާތަކެއް އަޅާދީފައި އެ ބިންގާ އެޅިތަނުގައި ވިނަފަޅާ ބޯ ޖަންގައްޔަކަށް އެތަން ވެގެންދާއިރު ވެސް ބިންގާ ބާވެފައި އޮންނާނެ ސަރުކާރެއް ނޫން." އާޒިމް ވިދާޅުވިއެވެ.

އާޒިމް ވިދާޅުވީ ހަމައެކަނި ދިއްގަރަށް ބަލާލުމުން ވެސް އެކަން ހާމަވެގެންދާނެ ކަމަށެވެ. އެގޮތުން ދިއްގަރުގައި މިވަގުތު ފެންނަން އޮތީ ވޭތުވެދިޔަ 40 އަހަރުތެރޭ ނުވެ ހުރި ކަންކަން މި ސަރުކާރުންކޮށްދީ ނިންމަމުންދާ މަންޒަރު ކަމަށާ، ދިއްގަރު ރައްޔިތުން ހުރިހާ ސަރުކާރުތަކެއްގައި އެދުނު ރަށުގެ ގޮނޑުދޮށް ހިމާޔަތްކޮށްދީ ރަށުން ގިރާލި ބައި އިޔާދަކޮށްދީފައިވަނީވެސް މިސަރުކާރުން ކަމަށެވެ. 

އާޒިމް އިތުރަށް ވިދާޅުވީ، ދިއްގަރަށް 25 ހެކްޓަރުގެ ބިން އިތުރުކޮށްދިނުމުގެ މަޝްރޫއުވެސް މިހާރު ކުރިއަށްދާ ކަމަށާއި ރައީސް ޞާލިޙަކީ ވައުދުވެ ވައުދު ފުއްދަވާ ރައީސެއް ކަމަށެވެ. އަދި ރައީސަށް ދެވަނަ ދައުރެއް ދެއްވައިފިނަމަ އޭގެ ލާބަޔާއި މަންފާ އޮތީ ރައްޔިތުންނަށާއި ގައުމަށް ކަމަށްވެސް އޭނާ ވިދާޅުވިއެވެ.

ދިއްގަރު ގޮނޑުދޮށް ހިމާޔަތް ކުރުމުގެ މަޝްރޫޢުގެ ދަށުން، 566,109 ކިއުބިކް މީޓަރުގެ ވެލި އެޅުމާއި، 532 މީޓަރުގެ ސަރަޙައްދެއްގައި ރިވެޓްމެންޓް ޖެހުމާއި، 60.235 މީޓަރުގެ ސަރަޙައްދެއްގައި ބޭރުތޮށި ލުމުގެ އިތުރުން ބީޗް ހެދުމުގެ މަސައްކަތް ވަނީ ކޮށްފައެވެ.