އެމްއެމްޕީއާރްސީގެ ހިޔާނާތުގެ ފައިސާ ލިބުނު ކަމަށް ތުހުމަތު ކުރެވޭ ޔޫތު މިނިސްޓަރު އަހުމަދު މަހްލޫފްގެ މައްޗަށް ދައުލަތުން އުފުލާފައިވާ ރިޝްވަތުގެ ދައުވާގެ ޝަރީއަތް މިއަދަށް ތާވަލް ކުރުމަށްފަހު ކެންސަލް ކޮށްފިއެވެ.

މިއަދު ހެނދުނު ނުވައެއް ޖަހާއިރު އޮންލައިން ކޮށް ކުރިއަށް ގެންދިޔުމަށް ތާވަލް ކުރި މި ޝަރީއަތް ކެންސަލް ކޮށްފައިވަނީ ޕްރޮސެކިއުޓާ ޖެނެރަލްގެ އޮފީހުން އެދިގެން ކަމަށް ކްރިމިނަލް ކޯޓުން ބުންޏެވެ.

މަހްލޫފް މިވަގުތު ހުންނެވީ ރައީސް އިބްރާހިމް މުހައްމަދު ސޯލިހު، މ. އަތޮޅުގެ ފަސް ރަށަކަށް ކުރައްވަމުން ގެންދަވާ ދަތުރުފުޅުގައި އެމަނިކުފާނުގެ އަރިހުގަ އެވެ.

މީގެ ކުރިންވެސް މަހްލޫފުގެ މައްޗައް ކުރާ ރިޝްވަތުގެ ދައުވާ ކުރިއަށް ދިޔައިރު ރައީސް ޞާލިހް އާއި އެކު އެބޭފުޅާ އެކި ދަތުރު ތަކުގައި ބައިވެރި ވަމުން ގެންދެވުމުން ފާޑުކިޔުން އަމާޒުވެ އެ ފަހަރު މަހްލޫފު ވަނީ މިނިސްޓަރު ކަމުން ސަސްޕެންޑުވެސް ކުރައްވާފަކަން ފާހަގަ ކޮށްލެވެއެވެ. މައްސަލަ ފެށުނީއްސުރެވެސް މިނިސްޓަރ މަހްލޫފު ގެންދަވަނީ މި ދައުވާ އަށް އިންކާރު ކުރައްވަމުންނެވެ.

މަހްލޫފްގެ މައްޗަށް ރިޝްވަތުގެ ދައުވާކުރީ އޭބޭފުޅާ ރައްޔިތުންގެ މަޖިލީހުގެ މެމްބަރަކަށް ހުންނެވިއިރު އެސްއީޒެޑް ބިލަށް ވޯޓުު ދިނުމަށްޓަކައި 33،000 ޑޮލަރު ކުރީގެ ނައިބު ރައީސް އަހުމަދު އަދީބުގެ އަތުން ނެންގެވި ކަމަށް ބުނެ އެވެ. ނަމަވެސް މި ދައުވާ މީގެ ކުރިން ކްރިމިނަލް ކޯޓުން ވަނީ މަދަނީ މިންގަނޑުން ބަލާއިރު އެ މައްސަލަ ކުރިއަށް ގެންދެވޭނެ މިންވަރުގެ ހެކި ނެތް ކަމަށް ބުނެ ބޭރުކޮށްލައިފަ އެވެ.

ކްރިމިނަލް ކޯޓުން މައްސަލަ ބެއްލެވި ގާޒީ މުހައްމަދު މިސްބާހު ވިދާޅުވެފައިވަނީ މިނިސްޓަރ މަހްލޫފަށް 33،000 ޑޮލަރު ލިބުނުކަން ސާބިތު ކުރެވެން އޮތް ނަމަވެސް، އެ ފައިސާ އަކީ އެސްއީޒެޑް ބިލަށް ވޯޓު ދިނުމުން ރިޝްވަތުގެ ގޮތުގައި ދިން ފައިސާއެއް ކަން ސާބިތުކޮށްދެވޭނެ ކަމަށް ނުފެންނަ ކަމަށެވެ. އެހެންވެ، ޝަރީއަތުގެ މަރުހަލާ ކުރިއަށް ގެންގޮސް ހެކިބަސް ނެގިޔަސް އެ ދައުވާ ސާބިތު ކުރެވޭނެ ކަމަށް ނުފެންނާތީ އެ ދައުވާ ކުރިއަށް ނުގެންދަން ނިންމައި، ދައުވާ ބާތިލްކުރީ ކަމަށެވެ.

ނަމަވެސް ކްރިމިނަލް ކޯޓުގެ ނިންމުން ގޯސް ކަމަށާއި އެ މައްސަލަ އަލުން އެ ކޯޓުން ބަލަން ހައި ކޯޓުން ވަނީ ހުކުމް ކޮށްފައެވެ.