ދިވެހި ދައުލަތުން ގެއްލުވާލާފައިވާ ފައިސާގެ ތެރެއިން ދައުލަތަށް ލިބެންޖެހޭ 1.9 ބިލިޔަން ރުފިޔާ މިއަދާ ހަމައަށްވެސް ލިބިފައި ނުވާ ކަމަށް ފިނޭންސް މިނިސްޓަރު އިބްރާހީމް އަމީރު ވިދާޅުވެއްޖެ އެވެ.

އެސެޓް ރިކަވާ ކުރުމުގެ ނިޒާމު ގާއިމުކުރުމަށް އެންޓި ކޮރަޕްޝަން ކޮމިޝަން (އޭސީސީ) އިން އިސްނަގައިގެން މިއަދު ފެށި މަސައްކަތު ބައްދަލުވުން ޝަރަފްވެރި ކޮށްދެއްވައި ވާހަކަދައްކަވަމުން އަމީރު ވިދާޅުވީ، ދައުލަތުން އެކި ގޮތްގޮތުން ގެއްލުވާލާ ފައިސާ ދައުލަތަށް އަނބުރާ ހޯދޭނެ ގޮތެއް އެކަމާ ގުޅޭ ނިޒާމެއް އޮންނަންޖެހޭ ކަމަށެވެ.

"މިދަންނަވާ ދޮރުތައް ބަންދު ކުރުމަކީ ސަރުކާރުގެ ވަރަށް މުހިއްމު ސިޔާސަތެއް. މިސިޔާސަތުގެ ދަށުން މިދިޔަ ދުވަސްތަކުގައި ކުރެވުނު މަސައްކަތްތަކާ ގުޅިގެން ދައުލަތުގެ މާލީ ނިޒާމު ހަރުދަނާ ކުރެވި ޕަބްލިކް ފައިނޭންސްގެ ކަންކަން ވަރުގަދަ ކުރެވިއްޖެ،" މިނިސްޓަރު ވިދާޅުވި އެވެ.

އަމީރު އިތުރަށް ވިދާޅުވީ، ދައުލަތުގެ ފައިސާއިން ކޮރަޕްޝަންގެ އަމަލުތައް ހިންގާ މައްސަލަތައް ހުއްޓުވުމަށް އަދުގެ ސަރުކާރުން ކުރަމުންދާ މަސައްކަތްތަކުގެ ތެރެއިން މާލިއްޔަތު ގާނޫނާއި، މާލިއްޔަތު ގަވާއިދަށް ބަދަލުތަކެއް ގެނެސް ދައުލަތުގެ މުދަލާއި ފައިސާ ނަހަމަ ގޮތުގައި ބޭނުން ކުރުމަށް އޮތް ފުރުސަތުތައް ހަނިކުރެވިފައިވާ ކަމަށެވެ. ނަމަވެސް އަދިވެސް ގާނޫނުތަކާއި ގަވައިދުތަކަށް ގެންނަންޖެހޭ ބަދަލުތަކެއް ހުރި ކަމުގައިވެސް ވިދާޅުވި އެވެ.

އަމީރު ވިދާޅުވީ ކޮރަޕްޝަން ހުއްޓުވުމަށް ސަރުކާރުން ކުރަމުންދާ މަސައްކަތްތަކުގެ ނަތީޖާއެއްގެ ގޮތުން ދުނިޔޭގެ ކޮރަޕްޝަން އިންޑެކްސް ގައި، ރާއްޖެ 2021 އޮތީ 85 ވަނައިގައި ކަމަށެވެ. އެއީ 2018 ވަނަ އަހަރާ ބަލާއިރު ދަރަޖައިގެ ގޮތުން ބޮޑު ކުރިއެރުމެއް ކަމަށާ، އެ އަހަރު ރާއްޖެ އޮތީ 124 ވަނައިގައިކަންވެސް އަމީރު ފާހަގަކުރެއްވިއެވެ.

މީގެ އިތުރުން އަމީރު ވިދާޅުވީ،ދައުލަތުން ގެއްލުވާލާފައިވާ ފައިސާގެ ތެރެއިން 2009 ވަނަ އަހަރުން ފެށިގެން 2020 ވަނަ އަހަރާ ހަމައަށް ލިބެންޖެހޭ 1.9 ބިލިޔަން ރުފިޔާ އޮތް ކަމަށާ، ކޮރަޕްޝަންގެ ތެރެއިން ގެއްލުވާލާ ފައިސާ ގިނަ ކަމުން އެގޮތަށް ގެއްލުވާލާ ފައިސާ ހޯދުމަށް ހަރުދަނާ ނިޒާމެއް ގެނައުން އަވަސްކުރަންޖެހޭ ކަމުށެވެ.

އެހެން ނަމަވެސް އެ ގެއްލުވާލާފައިވާ ފައިސާ އާއި ގުޅޭ ތަފްސީލް އަމީރު ހިއްސާކުރައްވާފައެއް ނުވެ އެވެ.