ފެނަކައިން ހދ.މަކުނުދޫ ޕިކަޕު ޑްރައިވަރުންނާއި، ލޯންޗް ތަކަށް ކުލި ނުދައްކާ މައްސަލައެއް ފެންމަތިވެއްޖެއެވެ.
ތަހޭ ނަމުގައި ހިންގާ ޓުވިޓާ އެކައުންޓަކުން ކުރި ޓުވީޓެއްގައި ބުނީ، މަކުނުދޫ ފެނަކައިން ޕިކަޕު ދުއްވާ ފަރާތްތަކުގެ ބިލް ތަކަށް ދައްކަންޖެހޭ ފައިސާ ނުދައްކާތާ 6 މަސް ވުމުން، އެފަރާތްތަކުން ފެނަކައާއިއެކު ވިޔަފާރީގެ ގުޅުން ކަނޑާލާފައިވާކަމަށެވެ. އެހެން ކަމުން ފެނަކައިން މިހާރު ތެޔޮ އުފުލަނީވެސް އެތަނުގެ މުވައްޒަފުން ލައްވާ ކަމަށް އޭނާ ބުނެފައިވެއެވެ.

މި މައްސަލަ އާއި ގުޅިގެން މަކުނުދޫ ކައުންސިލްގެ މެންބަރު މުހައްމަދު ޝައްމާޚް "ވޮއިސް" އަށް މައުލޫމާތު ދެއްވަމުން ވިދާޅުވީ، ފެނަކައިން މަކުނުދޫ ޕިކަޕު ދުއްވާ ފަރާތް ތަކަށް ފައިސާ ނުދައްކާ މައްސަލައެއް އެފަރާތްތަކުން އޭނާއާއި ވެސް ހިއްސާ ކޮށްފައިވާކަމަށެވެ. އެގޮތުން، ފާއިތުވެދިޔަ ހަމަސް ދުވަސް ތެރޭގައި އެތަނުން ޕިކަޕު ދުއްވާ އެއްފަރާތަށް 11,000 ރުފިޔާ އަށްވުރެ ގިނަ ރުފިޔާ ފެނަކައިން ދޭން ޖެހޭ ކަމަށެވެ. އަދި އެހެން ފަރާތަކަށް 21,000 ރުފިޔާ ދައްކަން ޖެހޭ އިރު، ފެނަކައިގެ ބޭނުމަށް ލޯންޗު ދަތުރުތައް ކުރުމަށްފަހު އޭގެ ވެރިވަފަރާތްތަކަށްވެސް ފައިސާ ނުދައްކާ މައްސަލަތައް ފެންމަތިވެފައިވާކަން އޭނާ ފާހަގަކުރެއްވިއެވެ. 
މީގެ ސަބަބުން ޕިކަޕު ދުއްވާ ފަރާތްތަކުން ފެނަކައާއި އެކު ބާއްވަމުން އައި ވިޔަފާރީގެ ގުޅުން ކަނޑާލާފައިވާ ކަމަށާ، އޭގެ ނަތީޖާއެއްގެ ގޮތުން ފެނަކައަށް ގެންދަންޖެހޭ ބޮޑެތި ތެޔޮ ފީފާވެސް އިންޖީނުގެއާއި ހަމައަށް ގެންދަންޖެހުނީ އެތަނުގެ މުވައްޒަފުންނަށް ކަމަށް އޭނާ ވިދާޅުވިއެވެ.
މި މައްސަލަ އާއި ގުޅިގެން ފެނަކައިން ވަކި އެއްޗެއް މިހާތަނަށް ހާމަކޮށްފައެއް ނުވެއެވެ.