ކުރީގެ އިސްލާމިކް މިނިސްޓަރު ޑރ ޝަހީމް ޢަލީ ސަޢީދު ރާނީ އެލިޒަބަތު އަށް ތައުރީފްކުރައްވައި ކުރެއްވި ޓުވީޓަށް ފާޑުކިޔުންތައް އަމާޒުވެފައިވަނިކޮށް އެ ޓުވީޓު ޑިލީޓްކޮށްލައިފިއެވެ.

ރާނީ އެލިޒަބަތު އިއްޔެ އަވަހާރަވެފައިވާއިރު، އެކަމާއި ގުޅިގެން ޝަހީމް ކުރެއްވި ޓްވީޓެއްގައި ވަނީ، ރާނީ އެލިޒަބަތު އަކީ އެކަމަނާގެ ދައުލަތުގެ ހިޔަލުން މުސްލިމުންނަށް ފުރުސަތު ދެއްވައި އިސްލާމީ އުއްމަތާއެކު ސުލްހަވެރި ގުޅުމެއް ބޭއްވުމަށް ބާރު އެޅުއްވި ޝަޚުޞިއްޔަތެއް ކަމަށް ވިދާޅުވެ އެލިޒަބަތު އަށް ތައުރީފް ކުރައްވާފައެވެ.

"އެކަމަނާގެ ވަކިވެ ދިޔުމަކީ ހުޅަނގާއި އިރުމަތީގެ ސުލްހަވެރި ސަގާފީ ގުޅުމަށް ލިބިގެންދިޔަ ހިތާމައެއް". ޝަހީމް ޑިލީޓް ކުރެއްވި ޓުވީޓުގައި ވިދާޅުވިއެވެ.

Advertisement

ޝަހީމްގެ މި ޓުވީޓާއި ގުޅިގެން ގިނަ ބައެއްގެ ފާޑުކިޔުންތައް އޭނާ އަށްވަނީ އަމާޒުވެފައެވެ. އެގޮތުން ޖަމިއްޔަތުއް ސަލަފުގެ ޗީފް މާކެޓިންގ އޮފިސަރ ޢަލީ ރަމީޒު އެ ޓުވީޓު ރިޓުވީޓް ކުރައްވައި, ލަދުވެތިވާންޖެހޭ ކަމަށް ވަނީ ވިދާޅުވެފައެވެ.

ޢަލީ ރަމީޒުގެ އެ ޓުވީޓާއި ގުޅިގެން ޝަހީމް ކުރެއްވި ޓުވީޓުގައި، އޭނާ އެލިޒަބަތު އަށް ތައުރީފްކޮށް ކުރެއްވި ޓުވީޓުގެ މައްސަލަ އަކީ ކޮބައިތޯ ވަނީ ސުވާލު ކުރައްވާފައެވެ. އަދި، އެހެން ދީނެއްގެ، ގައުމެއްގެ ވެރިއެއް މަރުވުމުން، އެ ގައުމެއްގެ ރައްޔިތުންނަށް ތައުޒިޔާކިޔުން ގޯސްވަނީ ކީއްވެތޯވެސް ޝަހީމް ޢަލީ ރަމީޒާއި ސުވާލުކުރައްވާފައިއެވެ.

"ތި ސުވާލު ބްރަދަރ އަޅުގަނޑާއި ކުރެއްވީމާ އިތުރަށް އަޅުގަނޑު ހައިރާންވެއްޖެ. އަޅުގަނޑު ގަބޫލުކޮށްގެން ހުރީ ތިއީ ދުނިޔޭގެ ތާރީޚް ވަރަށް ބޮޑަށް އެނގިވަޑައިގެން ހުންނެވި ބޭފުޅެއް ކަމަށް." ޝަހީމް ގެ އެ ސުވާލު ތަކަށް ރައްދު ދެއްވައި ޢަލީ ރަމީޒު ކުރެއްވި ޓުވީޓުގައިވެއެވެ.

ޝަހީމް އެލިޒަބަތު އަށް ތައުރީފްކޮށް ކުރެއްވި ޓުވީޓާއި، އޭގެ ފަހުން ޢަލީ ރަމީޒު އަށް ރައްދު ދެއްވައި ކުރެއްވި ޓުވީޓުވެސް ޑިލީޓްކޮށްލައްވާފައިވާއިރު، އެ ޑިލީޓް ކޮށްލެއްވި ސަބަބު ސާފެއް ނުވެއެވެ.