އެއްޖިންސުން ގުޅުން ހިންގި މައްސަލަ ތަކަކާއި ގުޅިގެން އިއްޔެވެސް އިތުރު ތިން މީހަކު ހައްޔަރުކޮށްފިއެވެ.

ފުލުހުން މިއަދު ބުނީ އެއްޖިންސުން ގުޅުން ހިންގި މައްސަލަތަކަކާއި ގުޅިގެން 8 ސެޕްޓެމްބަރު ގައި ކޯޓު އަމުރެއްގެ ދަށުން އިތުރު ތިން މީހަކު ހައްޔަރުކޮށްފައިވާ ކަމަށެވެ.

އެގޮތުން ހައްޔަރު ކޮށްފައިވަނީ އުމުރުން 44 އަހަރުގެ މީހަކާއި، 47 އަހަރުގެ މީހެއްގެ އިތުރުން، 50 އަހަރުގެ މީހެއް ކަމަށް ފުލުހުން ބުނެފައިވެއެވެ.

އަދި އެ ހައްޔަރު ކޮށްފައިވާ މީހުންގެ ބަންދާއިމެދު ގޮތެއް ނިންމުމަށް ކޯޓަށް ހާޒިރު ކުރުމުން 44 އަހަރުގެ މީހާއަށް 10 ދުވަސް، 47 އަހަރުގެ މީހާއަށް 10 ދުވަސް އަދި 50 އަހަރުގެ މީހާއަށް 10 ދުވަސް ވަނީ ދީފައިވާކަމަށް ފުލުހުން ބުނެފައިވެއެވެ. އެހެން ނަމަވެސް އެމީހުންގެ ވަނަވަރު ފުލުހުން ހާމަކޮށްފައެއް ނުވެއެވެ.

އެއްޖިއްސުން ގުޅުންހިންގި ކަމުގެ ތުހުމަތުގައި މިދިޔަ އަންގާރަ ދުވަހުވެސް ވަނީ 3 މީހަކު ހައްޔަރުކޮށްފައެވެ.

އެތައް ބަޔަކާއި އެކު އެއްޖިންސުން ގުޅުން ހިންގި އަލަމްގީރް އާއި އެކު އެއްޖިންސުން ގުޅުން ހިންގި ކަމަށް ތުހުމަތު ކުރެވޭ މީހުންގެ ތެރޭގައި ގާނޫނީ ވަކީލް ނާޒިމް ސައްތާރާއި ކުރީގެ މަޖިލިސް މެމްބަރު މުހައްމަދު ނަޝީދު (ކާނަލް)ގެ އިތުރުން ފުލުހުންގެ ޑްރަގް އެންފޯސްމެންޓް ޑިޕާޓްމެންޓުގެ ސީނިއާ މީހެއް ކަމުގައިވާ ސާޖަންޓް އަބްދުއްރަހުމާން ރަފީއު ހިމެނެއެވެ. ތަހުގީގަށް ފަހު ބަންދުން އެ މީހުން ދޫކޮށްލާފައިވާއިރު އެ މީހުންގެ މައްޗަށް ވެސް ވަނީ ދައުވާ އުފުލާފައެވެ. އޭގެ އިތުރުން ބައެއް މުދިމުންނާއި ޓީޗަރުންކަމަށް ބުނާ ބައެއްގެ ވީޑިއޯވެސް ވަނީ ލީކްވެފައެވެ.