މިއަދު މާލެގައި ތިން ފުލުހަކަށް ހަމަލާދީފައި ވަނީ ހެންވޭރަށް ނިސްބަތްވާ ގޭންގަކުން ކަމަށާއި، އެކަން ސީރިއަސްކޮށް ބަލާނެ ކަމަށް ކޮމިޝަނާ އޮފް ޕޮލިސް މުހައްމަދު ހަމީދު (ސީޕީ ހަމީދު) ވިދާޅުވެއްޖެއެވެ.
މިއަދު ހެނދުނު ގާތްގަނޑަކަށް 11:52 ގައި ފުލުހުންގެ ޑްރަގް އެންފޯސްމެންޓްގައި މަސައްކަތް ކުރާ ތިން ފުލުހަކަށް ހަމަލާދިނުމާއި ގުޅިގެން އެ ތިން މީހުންނަށް އަންނަނީ އޭޑީކޭގައި ފަރުވާ ދެމުންނެވެ.
އެ ފަރުވާ ދެމުންދާ ފުލުހުންގެ ގާތަށް ޒިޔާރަތް ކުރުމަށްފަހު ސީޕީ ހަމީދު ކުރެއްވި ޓްވީޓެއްގައި ވިދާޅުވީ، އެ ދެ ފުލުހުންނަށް ހަމަލާ ދީފައިވަނީ ހެންވޭރަށް ނިސްބަތްވާ ގޭންގަކުން ކަމަށާއި، މި ހާދިސާ ހިނގާފައި ވަނީ އެ ފުލުހުން ޑިއުޓީގައި އުޅުނު ގަޑިއެއްގައި ނޫން ކަމަށެވެ.
ފުލުހުންނަށް ހަމަލާ ދިން މީހުން ހަމަލާ ދީފައިވަނީ ހަތިޔާރު ބޭނުން ކޮށްގެންކަމަށް ސީޕީ ވިދާޅުވިއެވެ. ނަމަވެސް އެއީ ކޮންބާވަތެއްގެ ހަތިޔާރެއްކަން އަދި އެކަމުގެ ތަފްސީލެއް ސީޕީ ދެއްވާފައި ނުވެއެވެ.
އެއާއެކު ހަމީދު ވިދާޅުވީ، އެ މައްސަލައިގެ ތުހުމަތު ކުރެވޭ ދެ މީހަކު ހައްޔަރުކޮށްފައިވާ ކަމަށާއި، އެ މައްސަލައިގެ ހިމެނޭ އިތުރު މީހުންވެސް ހައްޔަރު ކުރާނެ ކަމަށެވެ.
"މި މައްސަލައިގައި ވޭހާވެސް އަވަސް ފިޔަވަޅު އަޅަން އަޅުގަނޑު ވަނީ ޓީމަށް އިރުޝާދު ދީފައި. ފުލުހުންނާއި މެދު އަނިޔާވެރިވާ މީހުންގެ ކަންކަން ސީރިއަސްކޮށް ބަލާނަން. މިފަދަ ކަންކަމުގެ ސަބަބުން ގޭންގްތަކާއި، މަސްތުވާތަކެތީގެ ވިޔަފާރި ހުއްޓުވުމަށް ފުލުހުން ކުރާ މަސައްކަތުގައި ފަހަތަށް ނުޖެހޭނަން." ސީޕީ ވިދާޅުވިއެވެ.
މީގެ އިތުރުން ހަމީދު ވިދާޅުވީ، ޑްރަގް ޓްރެފިކިންގ އާއި ގޭންގްތައް ހުއްޓުވުމަށް މަސައްކަތްތައް އިތުރަށް ހަރުދަނާ ކޮށް، ފުޅާ ކުރަންޖެހޭ ކަމަށާ، މުޖުތަމައު އަމާން ތަނަކަށް ހަދައި، މުޖުތަމައު ގައި ދިރިއުޅެމުންދާ މީހުންގެ ފުރާނަތައް ސަލަމާތް ކުރުމުގެ މަސައްކަތަށް އެހީވުމަށް، ފުލުހުންނަށްވެސް އިތުރު އެހީތެރިކަމާއި ރައްކާތެރިކަން ކަށަވަރު ކޮށްދޭން ޖެހޭ ކަމަށެވެ.
Advertisement
This content is created and paid for by advertisers and does not involve Voice Journalists
